చిట్టి కథ

ఇల్లంతా.. మాటలు. నిశ్శబ్దం కావాలనిపించేది. ఇల్లంతా.. నిశ్శబ్దం. మాటలు కావాలనిపిస్తుంది.

ఆశ

ఇల్లంతా..
మాటలు.
నిశ్శబ్దం
కావాలనిపించేది.
ఇల్లంతా..
నిశ్శబ్దం.
మాటలు
కావాలనిపిస్తుంది.
(పిల్లలు ఎగిరిపోయిన
ఓ ముసలి పెన్షనర్‌ ఆశ)

అన్నయ్య

రెండు చాక్లెట్లు.
ఒకటి తనకు..
ఒకటి తమ్ముడికి.
రెండు కిడ్నీలు.
ఒకటి తనకు.
ఒకటి తమ్ముడికి.
అన్నయ్య..
అస్సలు మారలేదు.

ప్రిస్క్రిప్షన్‌

‘మీరు డిప్రెషన్‌లో ఉన్నారు.
మంచి కౌన్సెలర్‌ను కలవండి’
సలహా ఇచ్చాడు డాక్టర్‌.
వెంటనే ఫోన్‌ చేశాను..
స్నేహితుడికి.

ఎర్రచీర

‘నా ఎర్రచీర ఏమైంది?’
‘లిప్‌స్టిక్‌ ఇక్కడే ఉండాలే?’
‘ఐ లైనర్‌ ఎవరు తీశారు?’
భర్తకు కాల్‌ చేసింది.
‘పార్ట్‌టైమ్‌ జాబ్‌లో బిజీ’
అంటూ కట్‌ చేశాడు.
ఖైరతాబాద్‌ చౌరస్తాలో
ఆమె ప్రశ్నకు
జవాబు దొరికింది.

పాత పుస్తకం

ఫుట్‌పాత్‌ మీద
పాత పుస్తకం కొన్నాను.
అక్షరాలు
ఒక కథ చెబితే.
అండర్‌లైన్‌లు
ఇంకో కథ చెప్పాయి.