పైపైకి బంగారం.. డిసెంబ‌ర్‌క‌ల్లా రూ.57 వేల‌కు..!!

పైపైకి బంగారం.. డిసెంబ‌ర్‌క‌ల్లా రూ.57 వేల‌కు..!! క‌రోనా రెండో వేవ్ ప్ర‌భావంతో బంగారం, వెండి ధ‌ర‌లు పైపైకి దూసుకెళ్తున్నాయి. ప‌రిస్థితులు ఇలాగే ఉంటే .......

May 31, 2021 / 07:00 PM IST

న్యూఢిల్లీ: క‌రోనా రెండో వేవ్‌లో బంగారం, వెండి ధ‌ర‌లు ధ‌గ‌ధ‌గ‌లు కొన‌సాగుతున్నాయి. ప‌రిస్థితులు ఇలాగే కొన‌సాగితే ఈ ఏడాది చివ‌రిక‌ల్లా తులం బంగారం ధ‌ర రూ.57 వేలు ప‌లుకుతుంద‌ని ఇండియ‌న్ బులియ‌న్ అండ్ జ్యువెల్ల‌ర్స్ అసోసియేష‌న్ కార్య‌ద‌ర్శి సురేంద్ర మెహ‌తా చెప్పారు.

తాజాగా 10 గ్రాముల బంగారం ధ‌ర మ‌రోమారు రూ.49 వేల మార్క్‌ను దాటేసింది. ఎంసీఎక్స్ మార్కెట్‌లో సోమ‌వారం మ‌ధ్యాహ్నం తులం బంగారం ధ‌ర రూ.49,323 వ‌ద్ద ట్రేడైంది. అదే స‌మ‌యంలో ఇండియ‌న్ బులియ‌న్ అండ్ జ్యువెల్ల‌ర్స్ అసోసియేష‌న్ వెబ్‌సైట్‌లో మాత్రం తులం బంగారం ధ‌ర రూ.48,975 అని చెబుతున్న‌ది.

మ‌రోవైపు కిలో వెండి ధ‌ర రూ.71,575ల‌కు చేరుకున్న‌ది. ఈ నెల‌లో తులం బంగారం ధ‌ర రూ.2,184 పెరిగితే, కిలో వెండి ధ‌ర రూ.3,570 ఎక్కువైంది. ఏప్రిల్ 30న ప‌ది గ్రాముల బంగారం ధ‌ర రూ.46,791 ప‌లికితే, ఇప్పుడు రూ.48,975 వ‌ద్ద స్థిర‌ప‌డింది.

కిలో వెండి ధ‌ర గ‌త నెల 30న రూ.67,800 ప‌లికితే, ఇప్పుడు అది రూ.71,370కి చేరుకున్న‌ది. ఏప్రిల్‌లో తులం బంగారం ధ‌ర రూ.2,601 పెరిగితే, కిలో వెండి ధ‌ర రూ.4,938 ఎక్కువైంది.

ఇంట‌ర్నేష‌న‌ల్ మార్కెట్‌లో గోల్డ్ ధ‌ర 2200 డాల‌ర్లు!

ఈ ఏడాది చివ‌రి క‌ల్లా ఔన్స్ బంగారం ధ‌ర 2200 డాల‌ర్ల‌కు చేరే అవ‌కాశాలు క‌నిపిస్తున్నాయి. ఈ రోజు అంత‌ర్జాతీయ మార్కెట్‌లో ఔన్స్ బంగారం ధ‌ర 1905 డాల‌ర్లు ప‌లికింది. ఈ నెల ప్రారంభంలో అది 1780 డాల‌ర్ల‌కే ప‌రిమిత‌మైంది.

క‌రోనా మ‌హ‌మ్మారి ప్ర‌భావంతో దేశంలో ద్ర‌వ్యోల్భ‌ణం శ‌ర‌వేగంగా పెరిగింది. ఏప్రిల్‌లో ఖ‌ర్చులు పెరిగి పోవ‌డంతో హోల్‌సేల్ ద్ర‌వ్యోల్బ‌ణం 11 ఏండ్ల గ‌రిష్ఠానికి పెరిగి 10.49 శాతానికి పెరిగింది. గ‌త మార్చిలో అది 7.39 శాతం మాత్ర‌మే. ద్ర‌వ్యోల్బ‌ణానికి అనుగుణంగా బంగారం ధ‌ర పైపైకి దూసుకెళ్లింది.

చైనాలో క్రిప్టో క‌రెన్సీపై నిషేధం.. అందుకే

అన్ని ర‌కాల క్రిప్టో క‌రెన్సీ లావాదేవీలు, స‌ర్వీసుల‌పై చైనాలోని ఆర్థిక సంస్థ‌లు, పేమెంట్ సంస్థ‌లు నిషేధం విధించాయి. చైనా స‌ర్కార్ సైతం హెచ్చ‌రించ‌డంతో మ‌దుప‌ర్లు బంగారం వైపు మ‌ళ్లార‌ని తెలుస్తున్న‌ది. అంత‌ర్జాతీయ మార్కెట్‌లో డాల‌ర్ బ‌ల‌హీన ప‌డ‌టం కూడా బంగారం పుంజుకోవ‌డానికి మ‌రో కార‌ణం.

చైనాతోపాటు ప‌లు దేశాల నియంత్ర‌ణ చ‌ర్య‌లు, ఇంట‌ర్నేష‌న‌ల్ కార్పొరేట్ సంస్థ‌ల స‌ల‌హాల‌తో క్రిప్టో క‌రెన్సీల‌పై లావాదేవీలు బంగారం వైపు మ‌ళ్లే అవ‌కాశాలు ఉన్నాయి. బంగారం దిగుమ‌తికి చైనా బ్యాంకులు ఆమోదం తెలిపితే, గోల్డ్‌, వెండి ధ‌ర‌లు మ‌రోద‌ఫా పైపైకి దూసుకెళ్లొచ్చు.

తాజా వార్తల కోసం నమస్తే తెలంగాణ ఫేస్‌బుక్‌ , ట్విటర్‌, టెలిగ్రామ్‌ ను ఫాలో అవండి..