జవాన్‌ రాకేశ్వర్‌ విడుదలకు చర్చలు షురూ!

బీజాపూర్‌ ఎన్‌కౌంటర్‌ సందర్భంగా మావోయిస్టులు తమ బందీగా చేసుకున్న జవాన్ రాజేశ్వర్ మన్హాస్ విడుదల కోసం చర్చలు మొదలయ్యాయి

April 7, 2021 / 04:30 PM IST

రాయ్‌పూర్‌ : బీజాపూర్‌ ఎన్‌కౌంటర్‌ సందర్భంగా మావోయిస్టులు తమ బందీగా చేసుకున్న జవాన్ రాకేశ్వర్ మన్హాస్ విడుదల కోసం చర్చలు మొదలయ్యాయి. జైలు బందీ విడుదల కమిటీ చర్చలు జరిపేందుకు సిద్ధమైంది. కమిటీలోని ఐదుగురు సభ్యులు గ్రౌండ్ జీరోకు బయలుదేరారు. ప్రముఖ సామాజిక కార్యకర్త సోని సోరి కూడా ఈ బృందంలో ఉన్నారు. వీరు నక్సలైట్లతో సమావేశమై చర్చలు జరుపుతారు. అలాగే వారి డిమాండ్లను ప్రభుత్వానికి నివేదిస్తారు.

రెండు రోజుల క్రితం ఎన్‌కౌంటర్‌ సందర్భంగా తమతో తీసుకెళ్లిన సైనికుడు రాకేశ్వర్ మన్హాస్ చిత్రాన్ని నక్సలైట్లు విడుదల చేశారు. అతను పూర్తిగా సురక్షితంగా ఉన్నట్లుగా తెలుస్తున్నది. నక్సలైట్లతో మాట్లాడేందుకు ఏర్పాటైన కమిటీ బీజాపూర్‌ బయల్దేరి వెళ్లింది. ఈ బృందంతో పాటు సామాజిక కార్యకర్త సోని సోరి కూడా బయలుదేరారు. ఆయనతో పాటు కొంతమంది జర్నలిస్టులు కూడా ఉన్నట్లు తెలుస్తున్నది.

ప్రభుత్వంతో చర్చలు జరుగాలంటూ మావోయిస్టులు మంగళవారం నాడు ఒక ప్రకటన విడుదల చేశారు. బీజాపూర్ దాడిలో 24 మంది భద్రతా సిబ్బంది చనిపోగా.. మరో 31 మంది గాయపడ్డారు. కాగా నలుగురు నక్సలైట్లు కూడా మరణించినట్లు పేర్కొన్నారు. నక్సలైట్ల అదుపులో ఒక జవాన్ ఉన్నారని ఆ ప్రకటనలో మావోయిస్టులు తెలిపారు.

పోలీసులు, జవాన్లు తమ శత్రువులు కాదని, తమపై దాడి చేయడానికి వచ్చిన జవాన్లకు తగిన సమాధానం ఇచ్చామని చెప్పుకొచ్చారు. ప్రభుత్వంతో చర్చలు జరిపేందుకు సిద్ధంగా ఉన్నానని చెప్పారు. మధ్యవర్తుల ద్వారా ప్రభుత్వంతో మాట్లాడతామని, ఇందు కోసం త్వరలో మధ్యవర్తులను ప్రకటిస్తామని పేర్కొన్నారు.