Visit:
Quadruplet Girls : ఆస్ట్రేలియా (Australia) కు చెందిన ఓ 34 ఏళ్ల మహిళ ఆశ్చర్యకరమైన పరిస్థితిని ఎదుర్కొంటున్నది. ఆమె ఇటీవల నలుగురు ఆడపిల్లలకు జన్మనిచ్చింది. నలుగురూ ఎంతో ఆరోగ్యంగా ఉన్నారు. అప్పటికే ముగ్గురు చిన్న పిల్లలను పెంచుతున్న ఆ ఇంటిసభ్యుల సంఖ్య ఈ నలుగురు పిల్లల రాకతో మొత్తం 9 కి పెరిగింది. కానీ ఈ సంతోషకరమైన పరిణామం రాత్రికి రాత్రే వారికి సరికొత్త సవాళ్లను తెచ్చిపెట్టింది.
నలుగురు ఆడపిల్లలు పుట్టడం తల్లిదండ్రులుగా తాము మర్చిపోలేని ఆశీర్వాదమని ఆ దంపతులు అన్నారు. అయితే వారిని సంరక్షించేందుకు ఆర్థిక వనరులు అవసరమని, ముఖ్యంగా డైపర్లు, పాలు, బట్టలు లాంటి రోజువారీ ఖర్చులు ఊహించని భారమేనని ఆందోళన చెందుతున్నారు. ఒకేసారి నలుగురు నవజాత శిశువులను పోషించేందుకు స్నేహితులు, అభిమానులు చాలా సాయంగా నిలిచారని తెలిపారు. మరికొంత మంది కూడా ఆ దంపతులపట్ల ప్రశంసలు కురిపిస్తూ ప్రోత్సాహాన్ని అందిస్తున్నారు.
ఇంత పెద్ద కుటుంబాన్ని నిర్వహించే క్రమంలో సమాజం నుంచి లభిస్తున్న మద్దతు వారికి ఎంతో విలువైందిగా మారింది. అయితే పిల్లలు అందరితో కలిసి ఒకేసారి బయటికి వెళ్లడం ఇప్పుడు ఆ దంపతులకు ఒక సమస్యగా మారింది. ప్రస్తుతం వాళ్లకు ఉన్న కారులో అందరూ సురక్షితంగా కూర్చోవడానికి సరిపడా సీట్లు లేవు. ఆసుపత్రి పర్యటనలు, స్కూల్ డ్రాప్లు, ఇతర ప్రయాణాలు సులభంగా సాగేందుకు 10 సీట్ల వ్యాన్ అవసరం ఉంటుందని ఆ కుటుంబం భావిస్తున్నది. అలాంటి వ్యాన్ను కొనుగోలు చేయడానికి ఆ తల్లి ఆన్లైన్లో విరాళాల సేకరణను ప్రారంభించింది.
మోనోజైగోటిక్ క్వాడ్రప్లెట్స్ ప్రపంచంలోనే అత్యంత అరుదైన గర్భధారణ రకాల్లో ఒకటి. అయితే నామోనా పేరుగల ఈ మహిళ విషయంలో విశేషం ఏమిటంటే.. ఆమెకు పుట్టిన ఈ నలుగురు శిశువులకు ఒకే మాయ ఉందని ఆమెకు వైద్యం చేసిన డాక్టర్అలెక్సా బెండాల్ తెలిపారు. ఇలా 1.5 కోట్ల కేసుల్లో ఒకరికి మాత్రమే జరుగుతుందని చెప్పారు. ప్రపంచంలో ఇతర ప్రాంతాల్లో ఒకటి రెండు కేసులు ఉండి ఉండవచ్చు కానీ ఆస్ట్రేలియాలో తమకు తెలిసినంత వరకు ఇదే ఏకైక కేసు అని చెప్పారు.
