బుర్కా ధరించండని చెప్పి ఇబ్బందుల్లో పడిన ఇమ్రాన్‌ఖాన్‌

దేశంలో పెరుగుతున్న లైంగిక దాడులను నివారించడంలో విఫలమయ్యారని ఆరోపణలు ఎదుర్కొంటున్న పాకిస్తాన్‌ ప్రధాని ఇమ్రాన్‌ఖాన్‌.. ఇప్పడు మరో కొత్త ఇబ్బందిలో పడ్డారు

April 6, 2021 / 02:42 PM IST

బుర్కా ధరించండని చెప్పి ఇబ్బందుల్లో పడిన ఇమ్రాన్‌ఖాన్‌

ఇస్లామాబాద్‌ : దేశంలో పెరుగుతున్న లైంగిక దాడులను నివారించడంలో విఫలమయ్యారని ఆరోపణలు ఎదుర్కొంటున్న పాకిస్తాన్‌ ప్రధాని ఇమ్రాన్‌ఖాన్‌.. ఇప్పడు మరో కొత్త ఇబ్బందిలో పడ్డారు. లైంగిక దాడులు జరుగకుండా ఉండాలంటే మహిళలు బుర్కా ధరించడం ఒక్కటే పరిష్కార మార్గమని ప్రధాని ఇమ్రాన్‌ఖాన్‌ మహిళలకు సలహా ఇచ్చారు.

ప్రధాని సలహా ప్రజల్లో వ్యతిరేక ప్రభావాన్ని చూపించింది. ఆయన గతంలో బికినీ ధరించిన మహిళతో అర్ధనగ్నంగా ఉన్న ఇమ్రాన్‌ఖాన్‌ ఫొటోను సోషల్‌ మీడియాలో పంచుకుని ట్రోలింగ్‌ చేస్తున్నారు. ఇద్దరూ సముద్రంలో స్నానం చేస్తూ ఉన్నట్లుగా ఆ ఫొటోలో కనిపిస్తారు. ఇమ్రాన్‌ఖాన్‌ గారు మొదట మీరే గిరేబాన్‌ను వాడండి అంటూ నెటిజెన్లు కామెంట్లు పోస్ట్‌ చేస్తున్నారు.

ఆదివారం రేడియోలో మహిళలతో నేరుగా ఫోన్‌లో ఇమ్రాన్‌ఖాన్‌ మాట్లాడారు. ఈ సమయంలో పిల్లలపై జరుగుతున్న లైంగిక హింసను అడ్డుకోవడానికి ప్రభుత్వం వద్ద ఏవైనా ప్రణాళికలు ఉన్నాయా? ఒకరు ఇమ్రాన్‌ఖాన్‌ను ప్రశ్నించారు. దానికి ప్రతిస్పందనగా సమాధానమిచ్చిన ఇమ్రాన్‌ఖాన్‌.. దేశంలో క్షీణిస్తున్న శాంతిభద్రతలను కాపాడేందుకు తీసుకుంటున్న చర్యలకు బదులుగా.. మహిళలు బుర్కా ధరించడం ఒక్కటే దీనికి పరిష్కారం అంటూ సలహా ఇచ్చారు.

దీనిపై దేశవ్యాప్తంగా నిరసనలు వ్యక్తమయ్యాయి. ప్రధాని పదవిలో ఉన్న ఒక వ్యక్తి ఇలాంటి చౌకబారు సలహాలు ఇవ్వడమేంటని అక్కడి ప్రజలు ఆగ్రహం వ్యక్తం చేస్తున్నారు. ఇదే సమయంలో బికిని ధరించిన మహిళతో సముద్రం ఒడ్డున స్నానం చేస్తున్న ఇమ్రాన్‌ఖాన్‌ ఫొటోలను కొందరు సోషల్‌ మీడియాలో పోస్ట్‌ చేస్తూ ఇమ్రాన్‌ఖాన్‌కు చురకలంటించారు.

పాకిస్తాన్‌లో నిత్యం 11 అత్యాచార కేసులు నమోదవుతున్నట్లు అక్కడి గణాంకాలు చెప్తున్నాయి. గత 6 సంవత్సరాలలో 22 వేలకు పైగా కేసులు నమోదయ్యాయి. కేవలం 0.3 శాతం మంది మాత్రమే దోషులుగా నిర్ధారించినట్లు తెలుస్తున్నది.