Vaibhav Suryavanshi : దేశవాళీ క్రికెట్లో పాపులర్ అయిన రంజీ ట్రోఫీ(Ranji Trophy) షురూ అయింది. టోర్నీ మొదలైన తొలి రోజే బీహార్ కుర్రాడు వైభవ్ సూర్యవంశీ (Vaibhav Suryavanshi) సంచలనం సృష్టించాడు. శుక్రవారం పాట్నాలో ముంబైతో జరిగిన మ్యాచ్లో బరిలోకి దిగిన వైభవ్.. రంజీల్లో తొలి మ్యాచ్ ఆడిన నాలుగో చిన్న వయస్కుడిగా రికార్డు నెలకొల్పాడు.
ప్రస్తుతం వైభవ్ వయసు 12 ఏండ్ల 284 రోజులు. అతిచిన్న వయసులోనే అరంగేట్రం చేసిన రికార్డు అజ్మీర్కు చెందిన అలీముద్దీన్(Alimuddin) పేరిట ఉంది. అతడు 12 ఏండ్ల 73 రోజుల వయసులో రంజీల్లో తొలి మ్యాచ్ ఆడాడు. 1942-43 సీజన్లో అతడు రాజ్పుతనా జట్టు తరుఫున బరిలోకి దిగాడు.
Vaibhav Suryavanshi of Bihar makes his first-class debut at the age of 12 years and 284 days. He is playing in a Ranji Trophy encounter against Mumbai.#RanjiTrophy #CricketTwitter
Image courtesy: Vaibhav Suryavanshi Instagram pic.twitter.com/d88skTH0F2
— 100MB (@100MasterBlastr) January 5, 2024
వైభవ్ రంజీలకు ఎంపికవ్వడంలో అతడి తండ్రి సంజీవ్ సూర్యవంశీ(Sanjiv Suryavanshi) కీలక పాత్ర పోషించాడు. ఐదేండ్ల వయసులోనే వైభవ్ ప్రతిభను గుర్తించి ప్రోత్సహించి శిక్షణ ఇప్పించాడు. మొదట్లో సమస్తిపూర్లో, ఆ తర్వాత పట్నాలోని అకాడమీలో కొడుకును చేర్పించాడు. పట్నాలో రాటుదేలిన వైభవ్ ఈ మధ్యే కూచ్ బెహర్ ట్రోఫీ(Cooch Behar Trophy)లో బిహార్ తరఫున సత్తా చాటాడు. జార్ఖండ్పై ధనాధన్ ఇన్నింగ్స్ ఆడిన వైభవ్ శతకంతో చెలరేగాడు.
వైభవ్ సూర్యవంశీ
కేవలం 128 బంతుల్లోనే 22 ఫోర్లు, 3 సిక్సర్లతో 151 పరుగులు చేశాడు. రెండో ఇన్నింగ్స్లోనూ 78 రన్స్తో రఫ్ఫాడించాడు. అంతేకాదు నాలుగు జట్ల సిరీస్లోనూ దుమ్మురేపాడు. భారత అండర్ 19 ఏ జట్టు, భారత అండర్ 19 బి జట్టు, ఇంగ్లండ్ అండర్ 19, బంగ్లాదేశ్ అండర్ 19 జట్లు పాల్గొన్న ఈ సిరీస్లో ఈ చిచ్చరపిడుగు రెండు హాఫ్ సెంచరీలతో ఔరా అనిపించాడు. గల్లీ నుంచి ఢిల్లీ దాకా క్రికెటర్లకు కొదవ లేని మనదేశంలో ఫస్ట్ క్లాస్ క్రికెట్కు క్రేజ్ ఎక్కువ. ఇప్పటివరకూ ఈ టోర్నీలో 9 మంది 13 ఏండ్ల వయసులోనే అరంగేట్రం చేశారు.