చండీగఢ్ : కరోనా సెకండ్ వేవ్ నుంచి దేశం ఇప్పుడిప్పుడే కోలుకుంటోంది. కరోనా నుంచి కోలుకున్న తర్వాత వివిధ రకాల ఫంగస్లు వెంటాడుతున్నాయి. ఇప్పటి వరకు బ్లాక్, వైట్, ఎల్లో ఫంగస్ కేసులు వెలుగు చూశాయి. మధ్యప్రదేశ్లో ఇటీవల గ్రీన్ ఫంగస్ తొలి కేసు సైతం నమోదైన విషయం తెలిసిందే. తాజాగా పంజాబ్లోని జలంధర్లో గ్రీన్ ఫంగస్ రెండో కేసు నమోదైంది. దీంతో జిల్లాలో ఒక్కసారిగా కలకలం సృష్టించగా.. వైద్య బృందం అప్రమత్తమైంది. 61 ఏళ్ల వ్యక్తి మార్చిలో కరోనా బారినపడి కోలుకోగా.. తాజాగా గ్రీన్ఫంగస్ నిర్ధారణ అయ్యింది. సదరు వ్యక్తి బాబా బకాలా నివాసి.. అమృత్సర్ రోడ్లోని మక్సూద్లోని సేక్రేడ్ హార్ట్ హాస్పిటల్లోని ఐసీయూలో చేరాడు. గ్రీన్ ఫంగస్ మొదటి కేసు మూడు రోజుల కిందట ఇండోర్లోని శ్రీ అరబిందో ఇన్స్టిట్యూట్ ఆఫ్ మెడికల్ సైన్స్లో గుర్తించారు. జలంధర్లో రెండో కేసును గుర్తించగా.. వైద్యులు సైతం ఆందోళన వ్యక్తం చేస్తున్నారు.
కరోనా నుంచి కోలుకున్నాక శ్వాసకోశ సమస్యలతో..
కరోనా సెకండ్ వేవ్తో పంజాబ్ అల్లాడిపోయింది. ఇప్పుడిప్పుడే పాజిటివ్ కేసులు తగ్గుతున్న క్రమంలోనే గ్రీన్ ఫంగస్ కేసు నమోదవడంపై భయాందోళనలు వ్యక్తమవుతున్నాయి. ఈ సందర్భంగా హాస్పిటల్ చీఫ్ అడ్మినిస్ట్రేటర్ గ్రేస్ మాట్లాడుతూ మార్చి నెలలో రోగికి కరోనా నిర్ధారణ అయ్యిందని, తర్వాత కోలుకున్నాడని తెలిపారు. కానీ, ప్రస్తుతం శ్వాస తీసుకోవడంలో ఇబ్బంది ఉండడంతో ఈ నెల 14న అతని కుటుంబీకులు ఆసుపత్రికి తీసుకువచ్చారని పేర్కొన్నారు. ఆసుపత్రి డాక్టర్ అశుతోష్ పరీక్షలు చేసి.. ఊపిరితిత్తుల్లో ఫంగస్ను గుర్తించారని, నమూనాలు సేకరించి ప్రైవేటు ల్యాబ్కు పంపగా.. శనివారం వచ్చిన నివేదికల్లో గ్రీన్ ఫంగస్గా నిర్ధారణ అయ్యిందని చెప్పారు. ప్రస్తుతం అతనికి చికిత్స కొనసాగుతుందని చెప్పారు. కేసుకు సంబంధించిన నివేదికను కలెక్టర్, సివిల్ సర్జన్, చండీగఢ్ నోడల్ అధికారికి పంపినట్లు చెప్పారు.
గ్రీన్ ఫంగస్ గురించి..
ఆస్పెర్గిల్లస్ ఫంగస్ను సాధారణ పరిభాషలో గ్రీన్ ఫంగస్గా పిలుస్తారని వైద్య నిపుణులు తెలిపారు. ఆస్పెర్గిల్లస్లో చాలా రకాలున్నాయి. ఫంగస్ సోకితే శరీరంపై నలుపు, నీలం ఆకుపచ్చ, పసుపు ఆకుపచ్చ, గోధుమ రంగులో కనిపిస్తుంది. ఫంగస్ కరోనా లాగే ఊపిరితిత్తులపై ప్రభావం చూపుతుంది. ఊపిరితిత్తుల్లో చీము నిండుతుందని, మనుషుల్లో చాలా అరుదుగా ఇలాంటి ఇన్ఫెక్షన్ సోకుతుందని, ఇది ప్రమాదకరమని వైద్యులు పేర్కొంటున్నారు. ముక్కు నుంచి రక్తం కారడం, తీవ్రజ్వరం, బరువు తగ్గడం, బలహీనంగా మారడం వంటి లక్షణాలు కనిపిస్తాయని చెప్పారు. ఫంగస్పై మరింత అధ్యయనం జరుగాల్సిన అవసరం ఉందన్నారు.