ఇప్పుడు డ్రైవింగ్ లైసెన్స్ పొంద‌డం మ‌రింత సులువు

వాహ‌నాల డ్రైవింగ్ లైసెన్స్ పొంద‌డం ఇప్పుడు మ‌రింత సులువు కానున్న‌ది. డ్రైవింగ్ లైసెన్సుల జారీ ప్ర‌క్రియ‌లో కేంద్ర ప్ర‌భుత్వం ప‌లు మార్పులు తీసుకొచ్చింది. ఈ కొత్త నియ‌మాలు వ‌చ్చే నెల 1 వ తేదీ నుంచి అమ‌ల్లోకి వ‌స్తాయి

June 15, 2021 / 10:34 PM IST

ఇప్పుడు డ్రైవింగ్ లైసెన్స్ పొంద‌డం మ‌రింత సులువు

న్యూఢిల్లీ : వాహ‌నాల డ్రైవింగ్ లైసెన్స్ పొంద‌డం ఇప్పుడు మ‌రింత సులువు కానున్న‌ది. డ్రైవింగ్ లైసెన్సుల జారీ ప్ర‌క్రియ‌లో కేంద్ర ప్ర‌భుత్వం ప‌లు మార్పులు తీసుకొచ్చింది. ఈ కొత్త నియ‌మాలు వ‌చ్చే నెల 1 వ తేదీ నుంచి అమ‌ల్లోకి వ‌స్తాయి. ఈ మేర‌కు కేంద్ర ర‌హ‌దారుల మంత్రిత్వ శాఖ (ఎంఓఆర్‌టీహెచ్‌) మంగ‌ళ‌వారం కొత్త నిబంధ‌న‌లు జారీ చేసింది. తాజా నిబంధ‌న‌ల మేర‌కు ఇక‌పై దేశ వ్యాప్తంగా ఉన్న గుర్తింపు పొందిన డ్రైవ‌ర్ శిక్ష‌ణా కేంద్రాల నుంచి డ్రైవింగ్ లైసెన్సులు పొందవ‌చ్చు.

ఇప్ప‌టివ‌ర‌కు ప్ర‌భుత్వ ప్రాంతీయ‌ ర‌వాణా శాఖ అధికారుల ఎదుట డ్రైవింగ్ నైపుణ్యాన్ని ప్ర‌ద‌ర్శించాల్సి వ‌చ్చేది. తొలుత లెర్నింగ్‌, ఆ త‌ర్వాత ప‌ర్మినెంట్ డ్రైవింగ్ లైసెన్సులు ఇచ్చేవారు. ఈ ప్ర‌క్రియ‌లో డ్రైవ‌ర్ల డ్రైవింగ్ నైపుణ్య‌త‌లు తేల్చ‌డం కాస్తా ఇబ్బందిక‌రంగా ఉండ‌టంతో కేంద్ర ప్ర‌భుత్వం ఈ కొత్త విధానాన్ని అమ‌ల్లోకి తీసుకొచ్చింది. గుర్తింపు పొందిన డ్రైవర్ శిక్షణా కేంద్రాల్లో విజయవంతంగా ఉత్తీర్ణత సాధించిన వ్యక్తులకు వారి డ్రైవింగ్ లైసెన్స్ కోసం దరఖాస్తు చేసే సమయంలో డ్రైవింగ్ పరీక్ష నుంచి మినహాయింపు ఇవ్వనున్నారు. అధిక నాణ్యత గల శిక్షణను నిర్ధారించడానికి గుర్తింపు పొందిన డ్రైవర్ శిక్షణా కేంద్రాలలో సిమ్యులేటర్లతో పాటు ప్రత్యేక డ్రైవింగ్ టెస్ట్ ట్రాక్ ఉండాలి. మోటారు వాహనాల చట్టం, 1988 ప్రకారం అవసరాలకు అనుగుణంగా ఇటువంటి కేంద్రాలు రిమైడ‌ల్‌, రిఫ్రెషర్ కోర్సులను పొందే అవకాశాన్ని కూడా ఇవ్వాలి. ఈ కేంద్రాలు ఇప్పుడు పరిశ్రమ-నిర్దిష్ట ప్రత్యేక శిక్షణను ఇవ్వడానికి కూడా అనుమతిస్తార‌ని నోటిఫికేష‌న్‌లో పేర్కొన్నారు.