Indian Techieల‌కు గుడ్‌న్యూస్‌: గ్రీన్‌కార్డ్‌పై ప‌రిమితికి ఇక తెర‌

Indian Techieల‌కు గుడ్‌న్యూస్‌: గ్రీన్‌కార్డ్‌పై ప‌రిమితికి ఇక తెర‌| భార‌తీయ ఐటీ నిపుణుల‌కు మ‌రో తీపి క‌బురు అందించింది. ఎంప్లాయి మెంట్ ఆధారిత గ్రీన్..

June 3, 2021 / 11:02 PM IST

వాషింగ్ట‌న్‌: భార‌తీయ ఐటీ నిపుణుల‌కు మ‌రో తీపి క‌బురు అందించింది. ఎంప్లాయిమెంట్ ఆధారిత గ్రీన్ కార్డు జారీ చేయ‌డానికి ఇప్ప‌టివ‌ర‌కు అమ‌లు చేయ‌డానికి దేశాల వారి ప‌రిమితిని ఎత్తివేయాల‌ని అమెరికా ప్ర‌తిపాదించింది. ఈ మేర‌కు అమెరికా ప్ర‌తినిధుల స‌భ‌లో బిల్లును ప్ర‌వేశ‌పెట్టారు.

దీంతో అమెరికాలో ఏండ్ల త‌ర‌బ‌డి ప‌ని చేస్తూ ప‌ర్మ‌నెంట్ రెసిడెంట్ కార్డు (గ్రీన్ కార్డ్‌) కోసం వేచి ఉన్న ఇండియ‌న్ ఐటీ ప్రొఫెష‌న‌ల్స్‌కు బెనిఫిట్ కానున్న‌ది. ఈ బిల్లును కాంగ్రెస్ స‌భ్యులు జో లాఫ్‌గ్రీన్‌, జాన్ క‌ర్టిస్ ప్ర‌వేశ‌పెట్టారు.

చ‌ట్ట‌బ‌ద్ధ‌మైన ఉపాధికి గ్రీన్‌కార్డుల జారీలో స‌మాన అవ‌కాశాలు (ఈగ‌ల్‌) చ‌ట్టం- 2021 పేరుతో ఈ బిల్లును అమెరికా కాంగ్రెస్‌లో ప్ర‌వేశ‌పెట్టారు. సెనెట్ కూడా ఆమోదిస్తే.. అధ్య‌క్షుడు జో బైడెన్ సంత‌కం కోసం వైట్ హౌస్‌కు వెళుతుంది. బైడెన్ సంత‌కం పెట్టాక చ‌ట్టం అమ‌ల్లోకి వ‌స్తుంది.

గ్రీన్‌కార్డు ల‌భిస్తే అమెరికాలో శాశ్వ‌తంగా నివాసం ఉండే వెసులుబాటు ల‌భిస్తుంది. ప్ర‌త్యేకించి భార‌తీయ ఐటీ నిపుణులు.. అందులో హ‌చ్‌-1 బీ వీసా కింద అమెరికాకు వ‌చ్చిన అత్యంత నిపుణులు.. ప్ర‌స్తుత ఇమ్మిగ్రేష‌న్ సిస్ట‌మ్‌తో తీవ్ర ఇబ్బందుల‌ను ఎదుర్కొంటున్నారు.

ప్ర‌స్తుత విధానం ప్ర‌కారం ప్ర‌తియేటా గ్రీన్ కార్డు జారీ చేయ‌డానికి ప్ర‌తి దేశానికి ఏడు శాతం కోటాను అమెరికా కేటాయించింది.

బిల్లు ఆమోదం పొందితే ఉద్యోగం ఆధారిత ఇమ్మిగ్రేంట్ వీసాల జారీపై ఏడు శాతం ప‌రిమితి ఎత్తేస్తారు. అలాగే ఫ్యామిలీ స్పాన్స‌ర్డ్ వీసాల‌ను 7 నుంచి 15 శాతానికి పెంచుతారు.