Haritha Haram Trees | అడవిని తలపించే ‘హరితహారం’ వృక్షాలు.. కానీ పచ్చదనాన్ని చెరిపేందుకు దుండగుల కుట్ర

Haritha Haram Trees | గత కేసీఆర్ ప్రభుత్వ హయాంలో ప్రతిష్టాత్మకంగా చేపట్టిన 'హరితహారం' కార్యక్రమంలో భాగంగా రోడ్డుకు ఇరువైపులా నాటిన మొక్కలు, నేడు పెనువృక్షాలుగా ఎదిగాయి. ఇవి ప్రయాణికులకు నీడనివ్వడమే కాకుండా, రోడ్డుకు ఇరువైపులా కమ్ముకుని అడవిని తలపించే ఆహ్లాదకరమైన వాతావరణాన్ని సృష్టిస్తున్నాయి. అయితే ఈ పచ్చదనాన్ని నాశనం చేసేందుకు కొందరు గుర్తుతెలియని దుండగులు కుట్ర పన్నారు.

February 8, 2026 / 06:00 PM IST

Haritha Haram Trees | అడవిని తలపించే ‘హరితహారం’ వృక్షాలు.. కానీ పచ్చదనాన్ని చెరిపేందుకు దుండగుల కుట్ర

Haritha Haram Trees | జూలూరుపాడు, ఫిబ్రవరి 08 : భవిష్యత్‌ తరాలకు స్వచ్చమైన గాలిని, ప్రశాంత జీవనశైలిని అందించాలనే లక్ష్యంతో తెలంగాణ తొలి సీఎం కేసీఆర్‌ అత్యంత ప్రతిష్టాత్మకంగా చేపట్టిన కార్యక్రమాల్లో ఒకటి హరితహారం. ఈ కార్యక్రమం లక్షల సంఖ్యలో మొక్కలతో మొదలై రాష్ట్రవ్యాప్తంగా ఉద్యమంలా సాగింది. కొందరు దుండగుల కండ్లు పర్యావరణాన్ని కాపాడే పచ్చని చెట్లపై పడింది. చెట్లకు నీరు, పోషకాలు అందకుండా చేసి వాటిని మెల్లమెల్లగా ధ్వంసం చేసే కుట్రకు తెరలేపారు. ఈ ఘటన భద్రాద్రి కొత్తగూడెం జిల్లా జూలూరుపాడు మండలంలో వెలుగు చూసింది.

వివరాల్లోకి వెళ్తే.. భద్రాద్రి కొత్తగూడెం జిల్లా జూలూరుపాడు మండలంలో పర్యావరణానికి తీరని ముప్పు వాటిల్లుతోంది. దశాబ్దాల కాలం పాటు పెరిగి పెద్దవై, బాటసారులకు చల్లని నీడనిస్తున్న భారీ వృక్షాలు కొందరు దుండగుల విద్వేషపూరిత చర్యలకు బలవుతున్నాయి. జూలూరుపాడు మండలం పడమట నరసాపురం గ్రామపంచాయతీ పరిధిలోని దండు మిట్ట తండా సమీపంలో తల్లాడ – కొత్తగూడెం ప్రధాన రహదారి వెంబడి ఈ దారుణం చోటుచేసుకుంది.

గత కేసీఆర్ ప్రభుత్వ హయాంలో ప్రతిష్టాత్మకంగా చేపట్టిన ‘హరితహారం’ కార్యక్రమంలో భాగంగా రోడ్డుకు ఇరువైపులా నాటిన మొక్కలు, నేడు పెనువృక్షాలుగా ఎదిగాయి. ఇవి ప్రయాణికులకు నీడనివ్వడమే కాకుండా, రోడ్డుకు ఇరువైపులా కమ్ముకుని అడవిని తలపించే ఆహ్లాదకరమైన వాతావరణాన్ని సృష్టిస్తున్నాయి. అయితే ఈ పచ్చదనాన్ని నాశనం చేసేందుకు కొందరు గుర్తుతెలియని దుండగులు కుట్ర పన్నారు.

చెట్లను క్రూరమైన పద్ధతిలో..

చెట్లను నేరుగా నరికివేయకుండా అత్యంత క్రూరమైన పద్ధతిలో వాటిని చంపేస్తున్నారు. చెట్టు మొదలు భాగంలో చుట్టూ ఉన్న బెరడును (Bark) పదునైన ఆయుధాలతో నున్నగా చెక్కి వేస్తున్నారు (దీనిని సాంకేతికంగా ‘Ring-barking’ లేదా ‘Girdling’ అంటారు). ఇలా చేయడం వల్ల చెట్టుకు భూమి నుండి అందాల్సిన నీరు, పోషకాలు సరఫరా నిలిచిపోయి, ఆ భారీ వృక్షాలు కొద్ది రోజుల్లోనే నిలువునా ఎండిపోతున్నాయి.

ఇప్పటికే ఈ రహదారి వెంబడి ఉన్న అనేక భారీ వృక్షాలు ఈ కారణంగా పూర్తిగా ఎండిపోయి మోడువారిపోయాయి. కళ్ల ముందే పచ్చని చెట్లు ప్రాణాలు కోల్పోతుండటం పట్ల స్థానికులు, పర్యావరణ ప్రేమికులు తీవ్ర ఆవేదన వ్యక్తం చేస్తున్నారు. ఎంతో శ్రమకోర్చి పెంచిన ఈ సంపదను ఇలా నాశనం చేయడం దారుణమని వాపోతున్నారు.
ఇప్పటికైనా సంబంధిత అటవీ శాఖ అధికారులు, రెవెన్యూ యంత్రాంగం, పోలీసులు తక్షణమే స్పందించి ఈ ఘటనపై విచారణ జరపాలని స్థానికులు డిమాండ్ చేస్తున్నారు. ఈ దుశ్చర్యకు పాల్పడుతున్న దుండగులను గుర్తించి కఠినంగా శిక్షించాలని, అలాగే మిగిలిన చెట్లకు రక్షణ కల్పించి పర్యావరణాన్ని కాపాడాలని స్థానిక ప్రజలు, పర్యావరణ పరిరక్షణ ప్రేమికులు కోరుతున్నారు.

Trees