విడిపోతే క‌ష్టాలు ఎదుర్కొంటాం : అజీమ్ ప్రేమ్‌జీ

భార‌తీయులం అంతా క‌లిసి ఉండి ఈ మ‌హ‌మ్మారిని ఎదుర్కోవాల‌ని విప్రో వ్య‌వ‌స్థాప‌కులు అజీమ్ ప్రేమ్‌జీ సూచించారు. మ‌నమంతా క‌లిసి ఉంటే బ‌ల‌ప‌డ‌తాం.. విడిపోతే క‌ష్టాలు ఎదుర్కొంటాం అనే సామెత‌ను మ‌రిచిపోవ‌ద్ద‌న్నారు.

May 12, 2021 / 10:05 PM IST

విడిపోతే క‌ష్టాలు ఎదుర్కొంటాం : అజీమ్ ప్రేమ్‌జీ

న్యూఢిల్లీ : భార‌తీయులం అంతా క‌లిసి ఉండి ఈ మ‌హ‌మ్మారిని ఎదుర్కోవాల‌ని విప్రో వ్య‌వ‌స్థాప‌కులు అజీమ్ ప్రేమ్‌జీ సూచించారు. మ‌నమంతా క‌లిసి ఉంటే బ‌ల‌ప‌డ‌తాం.. విడిపోతే క‌ష్టాలు ఎదుర్కొంటాం అనే సామెత‌ను మ‌రిచిపోవ‌ద్ద‌న్నారు. దేశం ఒక‌టిగా ఉండాలి, ఈ ప‌రిస్థితిని ఎదుర్కొనేందుకు మ‌న‌మంతా తేడాల‌ను వ‌దిలి ఐక్యంగా ఉండాల‌ని చెప్పారు.

రాష్ట్ర స్వయంసేవక్ సంఘ్ (ఆర్ఎస్ఎస్) నిర్వహించిన “పాజిటివిటీ అన్‌లిమిటెడ్” కార్యక్రమంలో భాగంగా రాజ్య‌స‌భ టెలివిజన్ చేసిన బహిరంగ ప్రసంగంలో ప్రేమ్‌జీ మాట్లాడారు. “మ‌నం అన్నిరంగాల్లో చాలా వేగంతో ప‌నిచేయాలి. ఈ చ‌ర్య‌లు మంచి శాస్త్రంపై ఆధార‌ప‌డి ఉండాలి. సైన్స్ అండ్ ట్రుత్.. ఈ రెండే ఈ సంక్షోభాన్ని ప‌రిష్క‌రించ‌గ‌ల పునాదులు. వీటి వ‌ల్ల‌నే భ‌విష్య‌త్‌లో పున‌రావృతం కాకుండా చూసుకోవ‌చ్చు” అని పేర్కొన్నారు.

మహమ్మారి వల్లనే కాకుండా ఆర్థిక పతనానికి దారితీసే అత్యంత దుర్బలమైన దుస్థితిపై కూడా దృష్టి పెట్టడం చాలా ముఖ్యమ‌ని అన్నారు. గ్రామాల్లో పేద‌వారి ప‌రిస్థితి మ‌రింత హృద‌య విదార‌కంగా ఉన్న‌ద‌ని, బ‌ల‌హీనంగా ఉన్న‌వారికి ప్రాధాన్యం ఇచ్చి వారిని పైకి తీసుకురావాల‌ని సూచించారు. అంద‌రం క‌లిసిక‌ట్టుగా ప‌నిచేస్తే ఈ మ‌హ‌మ్మారి నుంచి బ‌య‌ట‌ప‌డుతామ‌ని, అలాగే సమాజాన్ని, ఆర్థిక వ్య‌వ‌స్థ‌ను పున‌ర్నిర్మించాల్సిన అవ‌స‌రం ఉన్న‌ద‌ని పేర్కొన్నారు.