పారిశ్రామిక, వైద్యేతరాల్లో ద్రవ ఆక్సిజన్ వాడకంపై నిషేధం

దేశంలో ఆక్సిజ‌న్‌కు డిమాండ్ పెరిగిన నేప‌థ్యంలో పారిశ్రామిక, వైద్యేత‌ర వినియోగం కోసం ద్ర‌వ ఆక్సిజ‌న్ వాడ‌కంపై కేంద్ర ప్ర‌భుత్వం నిషేధం విధించింది.

April 25, 2021 / 09:25 PM IST

పారిశ్రామిక, వైద్యేతరాల్లో ద్రవ ఆక్సిజన్ వాడకంపై నిషేధం

న్యూఢిల్లీ : దేశంలో ఆక్సిజ‌న్‌కు డిమాండ్ పెరిగిన నేప‌థ్యంలో పారిశ్రామిక, వైద్యేత‌ర వినియోగం కోసం ద్ర‌వ ఆక్సిజ‌న్ వాడ‌కంపై కేంద్ర ప్ర‌భుత్వం నిషేధం విధించింది. తక్షణ ప్రభావంతో ఈ ఉత్త‌ర్వులు అమ‌లులోకి వ‌స్తాయ‌ని కేంద్రం తెలిపింది. ఈ ఉత్త‌ర్వుల ప్ర‌కారం క‌రోనా సంక్షోభం ముగిసేంత‌వ‌ర‌కు ద్ర‌వ‌ ఆక్సిజన్ వాడకం వైద్యేతర లేదా పారిశ్రామిక వాడకానికి అనుమతించరు.

కేంద్ర హోంమంత్రి అమిత్ షా అధ్యక్షతన ఉన్నతాధికారుల సమీక్ష సమావేశం అనంత‌రం హోంశాఖ కార్యదర్శి అజయ్ భల్లా సంతకం చేసిన ఉత్తర్వును ఆదివారం రాత్రి జారీ చేశారు.

ప్రస్తుతం ఉన్న ద్రవ ఆక్సిజన్ స్టాక్‌కు కూడా ఈ ఉత్త‌ర్వులు వర్తించ‌నున్నాయని తెలిపారు. విపత్తు నిర్వహణ చట్టంలోని సెక్షన్లు 10 (2) (ఎల్), 65 కింద ఇవ్వబడిన అధికారాల అనుగుణంగా హోం వ్యవహారాల మంత్రిత్వ శాఖ రాష్ట్రాలు / యూటీలను ఆదేశించింది.

అన్ని ద్రవ ఆక్సిజన్‌ను వైద్య ప్రయోజనాల కోసం మాత్రమే ఉపయోగిస్తామని, వాటి ఉత్పత్తిని పెంచడానికి తయారీ యూనిట్ల ఏర్పాటుకు అనుమతించనున్నట్లు ఉత్త‌ర్వులో పేర్కొన్నారు. ఈ ద్రవ ఆక్సిజన్‌ను వైద్య ఉపయోగం కోసం ప్రభుత్వానికి అందుబాటులో ఉంచనున్నారు. ఈ ఉత్తర్వు నుంచి ఏ పరిశ్రమకు మినహాయింపు ఉండదు.