అమెరికా నుంచి ఢిల్లీకి చేరిన‌ 318 ఆక్సిజన్ కాన్సంట్రేట‌ర్లు

అమెరికా నుంచి 318 ఆక్సిజన్ కాన్సంట్రేట‌ర్లు సోమవారం సాయంత్రానికి ఢిల్లీ విమానాశ్రయానికి చేరుకున్నాయి

April 26, 2021 / 05:26 PM IST

అమెరికా నుంచి ఢిల్లీకి చేరిన‌ 318 ఆక్సిజన్ కాన్సంట్రేట‌ర్లు

న్యూఢిల్లీ : ఫ్రాన్స్, రష్యా, బ్రిటన్ తరువాత అమెరికా కూడా క‌రోనా కష్ట సమయంలో భారతదేశానికి సహాయం అందిస్తున్న‌ది. అమెరికా నుంచి 318 ఆక్సిజన్ కాన్సంట్రేట‌ర్లు సోమవారం సాయంత్రానికి ఢిల్లీ విమానాశ్రయానికి చేరుకున్నాయి. అంతకుముందు ఆదివారం రాత్రి అమెరికా అధ్యక్షుడు జో బైడెన్ మాట్లాడుతూ, భార‌త్‌లో వైర‌స్ వ్యాప్తి ఉధృతంగా ఉన్నందున అక్క‌డి ప్ర‌జ‌ల‌కు అవ‌స‌ర‌మైన సాయం అందించేందుకు అమెరికా సిద్ధ‌మ‌ని చెప్పారు. ఇప్పుడు భారత్‌కు మా సాయం అవసరం, మేం సహాయం చేయడానికి సిద్ధంగా ఉన్నామ‌న్నారు.

ఉపాధ్యక్షురాలు కమలా హారిస్ మాట్లాడుతూ.. మేం భారత ప్రభుత్వంతో కలిసి పనిచేస్తున్నాం. కాబట్టి, కరోనా యొక్క ఈ సెకండ్ వేవ్‌ సమయంలో సామగ్రిని వీలైనంత త్వరగా పంపించి ఆదుకుంటామ‌ని తెలిపారు.

అంత‌కు ముందు, టీకా ముడి పదార్థంపై ఉన్న నిషేధాన్ని తొలగించి, వెంటనే భారతదేశానికి ముడిసరుకును సరఫరా చేయాలని అమెరికా నిర్ణయించింది. ప్రపంచంలోని అతిపెద్ద ఔషధ సంస్థ సీరం ఇన్‌స్టిట్యూట్ ఆఫ్ ఇండియా సీఈఓ అదార్ పూనావల్లా అమెరికా అధ్యక్షుడు జో బైడెన్‌ను ముడి పదార్థాల ఎగుమతులపై నిషేధాన్ని తొలగించాలని కోరారు. భార‌త్ విజ్ఞ‌ప్తి ప‌ట్ల అమెరికా సానుకూలంగా ఉన్న‌ద‌ని ఆదేశ ఉపాధ్య‌క్షురాలు క‌మ‌లా హారిస్ చెప్పిన కొద్ది సేప‌టికే ఢిల్లీకి ఆక్సిజ‌న్ కాన్సంట్రేట‌ర్లు, ఇత‌ర వ‌స్తువులు చేరాయి.