ఇట్స్ ఆఫీషియల్.. కొరటాల శివతో మరోసారి ఎన్టీఆర్

కొరటాల శివ | కొన్ని రోజుల నుంచి వస్తున్న వార్తలు నిజమయ్యాయి. ఎన్టీఆర్ సినిమా నుంచి ప్రస్తుతానికి త్రివిక్రమ్ తప్పుకున్నాడు. ఈయన 30వ సినిమా కొరటాల శివతో చేయబోతున్నాడు.

April 12, 2021 / 10:10 PM IST

ఇట్స్ ఆఫీషియల్.. కొరటాల శివతో మరోసారి ఎన్టీఆర్

కొన్ని రోజుల నుంచి వస్తున్న వార్తలు నిజమయ్యాయి. ఎన్టీఆర్ సినిమా నుంచి ప్రస్తుతానికి త్రివిక్రమ్ తప్పుకున్నాడు. ఈయన 30వ సినిమా కొరటాల శివ తో చేయబోతున్నాడు. దీనికి సంబంధించిన అప్‌డేట్‌ ఉగాది సందర్భంగా వస్తుందని ముందు నుంచి ఒక ప్రచారం జరుగుతూనే ఉంది. ఇప్పుడు ఉగాది ఒక రోజు ముందుగానే ఈ సినిమా గురించి అధికారికంగా ప్రకటించారు దర్శక నిర్మాతలు. ముందు నుంచి అనుకుంటున్నట్లు త్రివిక్రమ్ శ్రీనివాస్ కాకుండా ఎన్టీఆర్ 30వ సినిమా కొరటాల శివ చేతిలో పెట్టారు. జనతా గ్యారేజ్ తో ఐదేళ్ల కింద సూపర్ హిట్ అందుకున్న ఈ జోడి ఇప్పుడు మరోసారి బాక్సాఫీస్ దగ్గర రిపేరు చేయడానికి వస్తున్నారు.
నందమూరి తారక రామారావు ఆర్ట్స్, యువసుధా ఆర్ట్స్ సంయుక్తంగా ఈ సినిమాను నిర్మించనున్నాయి. కొరటాల శివ స్నేహితుడు మిక్కిలినేని సుధాకర్ ఈ సినిమాతో నిర్మాతగా మారుతున్నాడు. గతంలో మైత్రి మూవీ మేకర్స్ ను మహేష్ బాబు శ్రీమంతుడు సినిమా తో ఈయనే నిర్మాతలుగా మార్చాడు. ఇప్పుడు మరో స్నేహితుడిని ప్రొడ్యూసర్ చేస్తున్నాడు కొరటాల శివ. నందమూరి కళ్యాణ్ రామ్ ఈ సినిమాకు సమర్పకుడిగా ఉన్నాడు. 2021 సెకండ్ హాఫ్ లో సినిమా షూటింగ్ మొదలు పెట్టి 2022 ఏప్రిల్ 29న సినిమాను విడుదల చేస్తామని ప్రకటించారు దర్శక నిర్మాతలు.

పోయినసారి లోకల్ లో రిపేర్ చేశాము కానీ ఈసారి రిపేర్లు నేషనల్ వైడ్ గా ఉండబోతున్నాయి అంటూ కొరటాల శివ ట్వీట్ చేశాడు. ఎన్టీఆర్ తో మరోసారి జోడీ పెట్టడం ఆనందంగా ఉందని తెలిపారు ఈయన. ప్రస్తుతం చిరంజీవి హీరోగా ఆచార్య సినిమా చేస్తున్నాడు కొరటాల. ఇది పూర్తయిన వెంటనే ఎన్టీఆర్ సినిమాపై ఫోకస్ చేయనున్నాడు. మరోవైపు అల్లు అర్జున్ కూడా ఈ దర్శకుడితో సినిమా కమిట్ అయ్యాడు. ఎన్టీఆర్ తర్వాత కొరటాల శివ, బన్నీ సినిమా సెట్స్ పైకి వెళ్లనుంది. మరోవైపు కొరటాల తర్వాత త్రివిక్రమ్ సినిమా సెట్స్ పైకి తీసుకెళ్లనున్నాడు ఎన్టీఆర్.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి