వకీల్ సాబ్ ఆడుతున్న‌ థియేటర్లు సీజ్

వకీల్ సాబ్ ఆడుతున్న‌ థియేటర్లు సీజ్ | పవన్ కళ్యాణ్ వకీల్ సాబ్ విడుదలైనప్పటి నుంచి కూడా దానిపై కొందరు కావాలనే కుట్రలు చేస్తున్నారు. మరీ ముఖ్యంగా ఆంధ్రప్రదేశ్‌లో పవన్ కళ్యాణ్ సినిమాను రాజకీయ కోణంలో చూస్తున్నారు అంటూ అభిమానులు కూడా విమర్శిస్తున్నారు.

April 12, 2021 / 06:48 PM IST

ఎందుకో తెలియదు కానీ పవన్ కళ్యాణ్ వకీల్ సాబ్ విడుదలైనప్పటి నుంచి కూడా దానిపై కొందరు కావాలనే కుట్రలు చేస్తున్నారు. ఇది బయటకు చాలా స్పష్టంగా అందరికీ అర్థమవుతుంది కూడా. మరీ ముఖ్యంగా ఆంధ్రప్రదేశ్‌లో పవన్ కళ్యాణ్ సినిమాను రాజకీయ కోణంలో చూస్తున్నారు అంటూ అభిమానులు కూడా విమర్శిస్తున్నారు. సినిమాను సినిమాలా చూడాలి కానీ వ్యక్తిగతంగా తీసుకొని రాజకీయ కక్ష సాధింపు ఏంటని ప్రశ్నిస్తున్నారు. ఇప్పటికే అక్కడ టికెట్ల రేట్లు పెంపుపై విషయం కోర్టు వరకు వెళ్లింది. ఎప్పుడో విడుదలైన సినిమాలకు 150 రూపాయల టికెట్లు ఉంటే మొన్న విడుదలైన వకీల్ సాబ్ సినిమాకు మాత్రం 110 రూపాయల టికెట్ ఉంది. దీనివల్ల కలెక్షన్లపై కూడా చాలా ప్రభావం పడుతుంది.ఇదంతా ఇలా ఉంటే తాజాగా వకీల్ సాబ్ ఆడుతున్న‌ థియేటర్లు సీజ్ చేయడం ఆసక్తికరంగా మారింది.

మూలిగే నక్కపై తాటిపండు పడినట్లు బాగా ఆడుతున్న థియేటర్లను సీజ్ చేశారు అధికారులు. అయితే ఇది జరిగింది మన రాష్ట్రంలో కాదు.. శ్రీకాకుళం సరిహద్దుల్లో ఒడిశా రాష్ట్రంలోని పర్లకిమిడి అనే ఊరిలో జరిగింది. పేరుకు ఒడిశా కానీ అక్కడ తెలుగు సినిమాలకు చాలా డిమాండ్ ఉంటుంది. ముఖ్యంగా తెలుగు రాష్ట్రాలకు ఆనుకొని ఉన్న సరిహద్దు ప్రాంతాలు కావడంతో మన హీరోల సినిమాలకు అక్కడ కూడా క్రేజ్ ఉంటుంది. మరీ ముఖ్యంగా పవన్ కళ్యాణ్, బాలకృష్ణ లాంటి స్టార్ హీరోలకు అక్కడ అభిమాన సంఘాలు ఉన్నాయి. వాళ్ల‌ సినిమాలు విడుదలైతే పండగ వాతావరణం ఉంటుంది.

అయితే కరోనా వైరస్ సెకండ్ వేవ్ మొదలైన కారణంగా అక్కడ థియేటర్లలో 50 శాతం ఆక్యుపెన్సీకి ప్రభుత్వం అనుమతి ఇచ్చింది. అది ఖాతరు చేయకుండా హౌస్ ఫుల్ టికెట్స్ అమ్మడంతో.. సమాచారం అందుకున్న అధికారులు జై మా, లక్ష్మి థియేటర్లను సీజ్ చేశారు. దాంతో పాటు అదనంగా 10 వేల రూపాయల జరిమానా కూడా విధించారు. ప్రస్తుతం ఈ వార్త సోషల్ మీడియాలో వైరల్ అవుతుంది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి