Crypto Investersకు షాక్‌.. విదేశాల‌కు నిధుల మ‌ళ్లింపుకు ఐసీఐసీఐ నో!

Crypto Investersకు షాక్‌.. విదేశాల‌కు నిధుల మ‌ళ్లింపుకు ఐసీఐసీఐ నో!| క్రిప్టో ఇన్వెస్ట‌ర్ల‌కు ఐసీఐసీఐ బ్యాంక్ గ‌ట్టి షాక్ ఇచ్చింది. వాటిల్లో ...

July 9, 2021 / 08:29 PM IST

న్యూఢిల్లీ: మీరు క్రిప్టో క‌రెన్సీల్లో ఇన్వెస్ట్ చేయాల‌ని సంక‌ల్పించారా.. అందుకు విదేశాల‌కు నిధులు మ‌ళ్లించాల‌ని యోచిస్తున్నారా.. అయితే, ఇక అలా చేయ‌డానికి నిబంధ‌న‌లు అనుమ‌తించ‌బోవు. దేశంలోనే అతిపెద్ద ప్రైవేట్ బ్యాంక్ ఐసీఐసీఐ బ్యాంక్ ఈ మేర‌కు నిషేధం విధించింది.

ఇక విదేశాల‌కు డ‌బ్బెందుకు పంపుతున్నారో చెప్పాల్సిందే

విదేశాల‌కు డ‌బ్బులు పంప‌డానికి కార‌ణాలు తెలియ‌జేయాల‌ని త‌న ఖాతాదారుల‌కు ఐసీఐసీఐ బ్యాంక్ స్ప‌ష్టం చేసింది. క్రిప్టో క‌రెన్సీల్లో ఇన్వెస్ట్ చేయ‌డానికి కాద‌ని పేర్కొనాల‌ని తెలిపింది.

ఈ మేరకు రిటైల్ ఔట్‌వార్డ్స్ రిమిట్టెన్స్ అప్లికేష‌న్ ఫామ్‌లో మార్పులు కూడా చేసింది. దీని ప్ర‌కారం విదేశాల‌కు డ‌బ్బు పంపే ఖాతాదారులు ఔట్‌వార్డ్ రిమిట్టెన్స్ అప్లికేష‌న్ ఫామ్ స‌మ‌ర్పించాల్సి ఉంటుంది.

విదేశాల్లో ఆస్తులు కొనాల‌న్నా, స్టాక్స్ కొనాల‌న్నా ఆయా బ్యాంకుల ఖాతాదారులు లిబ‌ర‌లైజ్డ్ రెమిట్టెన్స్ స్కీమ్ (ఎల్ఆర్ఎస్‌) కింద సంత‌కం చేయాల‌ని ఆర్బీఐ నిబంధ‌న తెచ్చింది.

నేరుగా క్రిప్టో క‌రెన్సీల్లో మ‌దుపు చేయ‌డానికి మాత్ర‌మే కాక ఇత‌ర లావాదేవీల‌కు కూడా ఎల్ఆర్ఎస్ డిక్ల‌రేష‌న్ త‌ప్ప‌నిస‌రిగా మారింది.

బ్యాంకు నిబంధ‌న‌ల‌కు ఖాతాదారులు త‌లొగ్గాల్సిందే

బిట్ కాయిన్ వంటి క్రిప్టో క‌రెన్సీల్లో పెట్టుబ‌డులు పెట్ట‌డానికి మ్యూచువ‌ల్ ఫండ్స్‌, షేర్ల‌లో నిధులు మ‌దుపు చేయ‌డం లేద‌ని పేర్కొంటూ ఎల్ఆర్ఎస్ రిమిట్టెన్స్ నిబంధ‌న‌కు త‌లొగ్గాల్సిందే.

ఇప్ప‌టికే క్రిప్టో క‌రెన్సీల‌తో లావాదేవీల‌ను ప‌లు బ్యాంకులు నిలిపేశాయి. ఈ నేప‌థ్యంలో ఎల్ఆర్ఎస్ రిమిట్టెన్స్‌ను క్రిప్టో అనుబంధ పెట్టుబ‌డుల‌కు వాడుకోవ‌ద్ద‌ని త‌న ఖాతాదారుల‌ను ఐసీఐసీఐ కోరింది.

ఫెమా నిబంధ‌న‌ల కింద ఈ మేర‌కు ఐసీఐసీఐ బ్యాంక్ త‌న రిటైల్ ఔట్ వార్డ్స్ రిమిట్టెన్స్ అప్లికేష‌న్ ఫామ్‌లోనూ మార్పులు తీసుకొచ్చింది. అన్ని ర‌కాల ఎల్ఆర్ఎస్ లావాదేవీల నిర్వ‌హ‌ణ‌కు ఈ నిబంధ‌న వ‌ర్తిస్తుంది.

ఐసీఐసీఐతోపాటు ఇత‌ర ప్ర‌ధాన బ్యాంకులు కూడా..

దేశంలోని ఓ క్రిప్టోక‌రెన్సీ ఎక్స్చేంజ్ వ్య‌వ‌స్థాప‌కుడు స్పందిస్తూ.. క్రిప్టో క‌రెన్సీల్లో పెట్టుబ‌డుల‌ను నియంత్రించేందుకు ఐసీఐసీఐతోపాటు ఇత‌ర ప్ర‌ధాన బ్యాంకులు కూడా ఇదే నిబంధ‌న‌ను అమ‌లులోకి తెచ్చాయ‌ని చెప్పారు.

దీంతో ఎల్ఆర్ఎస్‌తో క్రిప్టో క‌రెన్సీలో పెట్టుబ‌డులు పెట్ట‌డానికి దారులు మూసుకు పోయాయి. దీంతో భార‌త క్రిప్టో క‌రెన్సీ మార్కెట్ లావాదేవీల‌పై ప్ర‌తికూల ప్ర‌భావం చూపుతుంది. 2004లో ఆర్బీఐ ఈ ఎల్ఆర్ఎస్ నిబంధ‌న‌ను అమలులోకి తెచ్చింది.