ఈపీఎఫ్‌వో రిలీఫ్‌.. స‌భ్యుల‌కు రెండో కోవిడ్ అడ్వాన్స్‌!

ఈపీఎఫ్‌వో రిలీఫ్‌.. స‌భ్యుల‌కు రెండో కోవిడ్ అడ్వాన్స్‌! స‌బ్‌స్క్రైబ‌ర్లు మ‌రో ద‌ఫా నాన్‌-రీఫండ‌బుల్ అడ్వాన్స్ తీసుకునేందుకు ఈపీఎఫ్‌వో అనుమ‌తి......

May 31, 2021 / 05:18 PM IST

న్యూఢిల్లీ: ఉద్యోగ భ‌విష్య నిధి సంస్థ (ఈపీఎఫ్‌వో) స‌భ్యుల‌కు గొప్ప రిలీఫ్‌. క‌రోనా వేళ త‌న స‌బ్‌స్క్రైబ‌ర్ల‌కు మ‌ద్ద‌తుగా నిలిచేందుకు ముందుకు వ‌చ్చింది. స‌బ్‌స్క్రైబ‌ర్లు త‌మ ఈపీఎఫ్ డిపాజిట్ల నుంచి మ‌రో ద‌ఫా నాన్‌-రీఫండ‌బుల్ అడ్వాన్స్ తీసుకునేందుకు అనుమ‌తినిచ్చింది. ఆదివారం జ‌రిగిన ఈపీఎఫ్‌వో గ‌వ‌ర్నింగ్ బాడీ స‌మావేశం ఈ నిర్ణ‌యం తీసుకున్న‌ది.

ప్ర‌ధాన‌మంత్రి గ‌రీబ్ క‌ల్యాణ్ యోజ‌నా (పీఎంజీకేవై) కింద గ‌తేడాది మార్చిలో క‌రోనా మ‌హ‌మ్మారి వేళ‌.. ఆర్థిక అవ‌స‌రాల‌ను తీర్చేందుకు ఈపీఎఫ్ డిపాజిట్ల నుంచి ప్ర‌త్యేక విత్‌డ్రాయ‌ల్స్‌కు నిబంధ‌న జ‌త చేసింది.

ఈ నిబంధ‌న కింద త‌మ స‌బ్‌స్క్రైబ‌ర్ల మూడు నెల‌ల క‌నీస వేత‌నం ప్ల‌స్ క‌రువు భ‌త్యం/ ఈపీఎఫ్ ఖాతాలో స‌భ్యుడి క్రెడిట్‌లో 75 శాతంల్లో ఏది త‌క్కువైతే దాన్ని విత్ డ్రా చేసుకోవ‌చ్చు.

నెల‌స‌రి వేత‌నం రూ.15 వేల లోపు ఉన్న ఈపీఎఫ్ స‌భ్యుల‌కు క‌రోనా మ‌హ‌మ్మారి వేళ కోవిడ్‌-19 అడ్వాన్స్ గొప్ప స‌హాయ‌కారిగా ఉంటుంది. ఇప్ప‌టివ‌ర‌కు కోవిడ్‌-19 అడ్వాన్స్ కోసం 76.31 ల‌క్ష‌ల క్లెయిమ్‌ల‌కు పైగా ఆమోదించింది. దీని కింద రూ.18,698.15 కోట్లు పంపిణీ చేసింది.

క‌రోనా మ‌హ‌మ్మారి సెకండ్ వేవ్‌తోపాటు బ్లాక్ ఫంగ‌స్‌ను అంటువ్యాధిగా కేంద్రం ప్ర‌క‌టించింది. క‌నుక త‌మ స‌భ్యులు తొలిద‌ఫా కోవిడ్‌-19 అడ్వాన్స్ మాదిరిగానే రెండో ద‌ఫా అడ్వాన్స్ కోసం ద‌ర‌ఖాస్తు చేసుకోవ‌చ్చు. ఫ‌స్ట్ అడ్వాన్స్ టైంలో మాదిరే ఇప్పుడు విత్‌డ్రాయ‌ల్స్ కోసం ప్రాసెస్ చేసుకోవాలి.

ఇందుకోసం ఈపీఎఫ్‌వో ఆటో-క్లెయిమ్ సెటిల్మెంట్ ప్రాసెస్ పేరిట ఒక వ్య‌వ‌స్థ‌ను రూపొందించింది. స‌భ్యులు కేవైసీ స‌మ‌ర్పించిన త‌ర్వాత క్లెయిమ్ సెటిల్మెంట్ ప్ర‌క్రియ మూడు రోజుల్లో పూర్తి చేయాల‌ని నిర్ణ‌యించింది. మామూలుగా ఈ క్లెయిమ్‌ల‌ను ఆమోదించ‌డానికి 20 రోజులు ప‌డుతుంది.