No Kissing Zone : ఇక్కడ ముద్దులు నిషేధం.. ముంబైలో స్పెషల్‌ జోన్‌

No Kissing Zone : ముంబైలోని ఓ హౌజింగ్ సొసైటీ వాళ్లు ఏర్పాటుచేశారు. బహిరంగంగా ముద్దులు పెట్టుకోవడాన్ని నిరోధించేందుకే ఈ ప్రత్యేక జోన్‌ (forbidden to kiss) ను ఏర్పాటుచేశామంటున్నారు వాళ్లు.

August 2, 2021 / 05:16 PM IST

No Kissing Zone : ఇక్కడ ముద్దులు నిషేధం.. ముంబైలో స్పెషల్‌ జోన్‌

ముంబై : సిగరెట్ స్మోకింగ్‌ జోన్‌ అని, నో స్విమ్మింగ్‌ జోన్‌ అని.. రకరకాల జోన్స్‌ మనం విని ఉంటాం.. చూసి ఉంటాం. అయితే, ‘నో కిస్సింగ్‌ జోన్‌’ గురించి ఎప్పుడైనా విన్నారా..? విని ఉండరు. ఎందుకంటే ఇలాంటి జోన్స్‌ సాధారణంగా మనకు ఎక్కడా కనిపించవు. అచ్చం ఇలాంటి జోన్‌ ఒకటి ముంబైలోని ఓ హౌజింగ్ సొసైటీ వాళ్లు ఏర్పాటుచేశారు. బహిరంగంగా ముద్దులు పెట్టుకోవడాన్ని నిరోధించేందుకే ఈ ప్రత్యేక జోన్‌ (No Kissing Zone) ను ఏర్పాటుచేశామంటున్నారు వాళ్లు.

ముంబైలోని బోరివలి ప్రాంతంలో ఉన్న సత్యం శివం సుందరం సొసైటీ ప్రధాన గేటు వద్ద లాక్‌డౌన్‌ సమయంలో నిత్యం ఎన్నో జంటలు వచ్చి బహిరంగంగా ముద్దులిచ్చుకుంటున్నారు. పలు జంటలకు ఎన్నిసార్లు చెప్పినా ఫలితం లేకపోయింది. వీరి కోసం కాపలాకాయడం సొసైటీ వారికి తలనొప్పిగా తయారైంది. దాంతో ప్రధాన గేటు రోడ్డుపై పెద్ద పెద్ద అక్షరాలతో ‘నో కిస్సింగ్‌ జోన్‌’ అని రాయించారు. దాంతో బహిరంగ ముద్దులు పెట్టుకోవడం నిలిచిపోయిందని సొసైటీ వాళ్లు సంతోషం వ్యక్తం చేస్తున్నారు. ‘బహిరంగంగా ముద్దులు పెట్టుకోవడం సరైంది కాదు. హౌజింగ్‌ సొసైటీలోకి రావాలంటే కళ్లు మూసుకుని నడవాల్సి వస్తుంది. జంటలు ఎంత చెప్పినా వినిపించుకోకపోవడంతో ఇలా పెద్ద అక్షరాలతో బోర్డు పెట్టాల్సి వచ్చింది’ అని సొసైటీకి చెందిన వారంటున్నారు.

కరోనా ఫస్ట్‌ వేవ్‌ సమయంలో ఇక్కడ బహిరంగంగా ముద్దులు పెట్టుకోవడాన్ని వీడియో చిత్రీకరించి స్థానిక కార్పొరేటర్‌, పోలీసులకు పంపినా ఫలితం లేకపోయింది. ‘ఇక్కడికి వచ్చే జంటలకు మేం వ్యతిరేకంగా కాదు, అయితే, వారు బహిరంగంగా ఇలాంటి కార్యక్రమాలను పూనుకోవడాన్నే వ్యతిరేకిస్తున్నాం’ అని స్థానిక న్యాయవాది వినయ్‌ అన్సుకర్‌ చెప్పారు. బహిరంగ ప్రదేశాల్లో అసభ్యకరమైన చర్యలకు శిక్ష విధించే అవకాశం ఉంది. అయినప్పటికీ పోలీసులు ఈ బహిరంగ ముద్దుల విషయంలో ఎలాంటి చర్యలు తీసుకోలేదు.