Fishing | స్మార్ట్ఫోన్, కంప్యూటర్, ట్యాబ్.. గ్యాడ్జెట్ ఏదైనా ఫిషింగ్ మాయగాళ్ల దారుణాలు పెరిగిపోతున్నాయి. ప్రజల నమ్మకాన్ని, బలహీనతను క్యాష్ చేసుకునేందుకు.. బ్లూలింక్ల ఎరవేసి ‘ఏ క్షణంలో అయినా దొరక్కపోతారా?’ అని ఎదురు చూస్తుంటారు మోసగాళ్లు. ఫ్రెండ్ లింక్ పంపాడనో, బాస్ మెయిల్ చేశాడనో, గిఫ్ట్ డబ్బులు వస్తాయనో, అమ్మాయిలతో సెక్స్టాక్ చేయొచ్చనో బ్లూలింక్లను క్లిక్ చేస్తే.. ఫిషింగ్ వలలో చిక్కినట్లే.
రాజస్థాన్కు చెందిన సుందర్ ఓ కార్పొరేట్ కంపెనీలో అకౌంట్స్ మేనేజర్. కంపెనీ లావాదేవీలన్నీ అతనికి తెలుసు. సదరు కంపెనీపై ఎప్పటి నుంచో కన్నేశారు సైబర్ దొంగలు. సుందర్కు పోర్న్ వ్యసనం ఉందని వారికి అర్థమైపోయింది. నూతన సంవత్సరం సందర్భంగా ఓ అందమైన అమ్మాయి డీపీతో వాట్సాప్ చాటింగ్ మొదలుపెట్టారు. అతను కూడా కనెక్ట్ అయ్యాడు. ఆ సుందరాంగి ఫొటోలు, వీడియోలు బ్లూ లింక్ల ద్వారా పంపేసి. మెల్లగా దారికి తెచ్చుకున్నారు. వారం తర్వాత సుందర్కు బాస్ నుంచి ఓ మెయిల్ వచ్చింది.. వెంటనే రూ.20 లక్షలు బదిలీ చేయమంటూ! కన్ఫర్మ్ చేసుకోడానికి కాల్ చేయొద్దని, విదేశీ ప్రతినిధులతో మీటింగ్లో ఉన్నాననీ నమ్మించారు. అది బాస్ అధికారిక మెయిల్ ఐడీ కావడంతో ఆలస్యం చేయకుండా.. మెయిల్ వెనకాలే వచ్చిన క్యూఆర్ కోడ్కు సొమ్ము పంపాడు. మరుసటి రోజు బాస్తో డబ్బు విషయం ప్రస్తావించాడు. అంతే, ఆ పెద్దమనిషి అవాక్కయి పోయాడు. సాక్ష్యంగా మెయిల్స్ చూపించాడు సుందర్. అసలు తాను మెయిలే పంపలేదంటూ అతను పోలీసులకు ఫిర్యాదు చేయడంతో రికవరీ పనిలో పడ్డారు పోలీసులు.
ఇప్పటికీ ఎంతోమంది డబ్బు దురాశతో ఫిషింగ్ మోసాల బారిన పడుతున్నారు. ఫోన్కాల్స్, ఎస్ఎంఎస్, ఈమెయిల్స్ ద్వారా ఫిషింగ్ లింక్లు పంపి.. వాటి ద్వారా వైరస్ను మన ఫోన్, కంప్యూటర్, ట్యాబ్లోకి చొప్పిస్తారు. ఆ తర్వాత బాధితుల డేటా సేకరించి.. వారి బలాలు, బలహీనతలు తెలుసుకొని.. డబ్బు దోచుకునే మార్గాలు ఎంచుకుంటారు. ఆ ఎత్తుగడలూ
విచిత్రంగా ఉంటాయి. అందుకే వీటిని ‘ఫిషింగ్ మెయిల్స్’ అంటారు. సైబర్ దాడుల్లో ఫిషింగ్ మోసాలు అగ్రస్థానంలో ఉన్నాయి. డార్క్వెబ్లో మన డేటాను కొనుగోలు చేసి, మనంవాడే సోషల్ మీడియా అకౌంట్ల ద్వారా విస్తృతంగా ప్రచారం కల్పిస్తారు. ఓపెన్ చేయగానే ర్యాన్సమ్వేర్ వంటి వైరస్లు పంపి నిలువు దోపిడీ చేస్తారు. ‘స్పియర్ ఫిషింగ్’ అంటే ఒక నిర్దిష్ట వ్యక్తిని టార్గెట్ చేసి మోసపూరిత సందేశాలు పంపడం ద్వారా దారిలోకి తెచ్చుకోవడం. ‘వేల్ ఫిషింగ్’ అంటే చాలా పెద్దవారిని.. అంటే సీయీవోలు, అంతకంటే పెద్దవారిని లక్ష్యంగా చేసుకోవడం.
ఫిషింగ్ లింక్స్, మెయిల్స్, ఎస్ఎంఎస్ల ద్వారా మన మానసిక ప్రవర్తనను పక్కాగా అధ్యయనం చేసిన తర్వాతే రంగంలోకి దిగుతారు సైబర్ నేరగాళ్లు. మన అమాయకత్వమే వాళ్ల పెట్టుబడి. ‘సోషల్ ఇంజినీరింగ్’తో సైబర్ నేరాలపై అవగాహన లేని వ్యక్తులను టార్గెట్ చేస్తారు. ‘దొంగే.. దొంగా దొంగా’ అన్నట్లు.. మోసగాళ్లు పెరిగిపోయారని భయపెడతారు. జాగ్రత్తగా ఉండేందుకు టిప్స్ చెబుతారు. మనం వాళ్ల దారిలోకి వెళ్లగానే చెప్పినట్లు ఆడిస్తూ.. ఓటీపీలు రాబట్టి డబ్బులు గుంజేస్తారు. బహుమతులు పంపుతున్నామని ఊరిస్తారు. స్క్రాచ్ కార్డులు పంపి నమ్మకం కలిగిస్తారు. డబ్బులు గెలుచుకున్నారని తీపి కబురు చెబుతారు. పన్నులు, కస్టమ్స్ ఫీజులంటూ కొల్లగొడతారు. వరద బాధితులకు, కొవిడ్ రోగులకు సాయం చేయాలంటూ వీడియోలు పంపి దారికి తెచ్చుకుంటారు.
➣ www.unshorten.it www.isitphishing.org www.urlvoid.com www.checkshorturl.com ఉపయోగించి నిజమైనవో కాదో తెలుసుకోండి.
➣ తెలియని వ్యక్తుల నుంచి వచ్చే బ్లూలింక్లు అస్సలు క్లిక్ చేయకండి. బ్యాంకు నుంచి చేస్తున్నామని చెప్పినా నమ్మకండి. ఎందుకంటే బ్యాంకు వాళ్లెవరూ మీకు కాల్ చేయరు.
➣ సున్నితమైన వ్యక్తిగత, కంపెనీ సమాచారాన్ని ఎట్టి పరిస్థితుల్లోనూ ఎవరికీ పంపొద్దు.
➣ సెర్చ్ ఇంజిన్లో ఎప్పుడూ కస్టమర్ కేర్ నంబర్ల కోసం సెర్చ్ చేయకండి. సరైన కస్టమర్ కేర్ నంబర్ కోసం సంబంధిత యాప్లోనే వెతకండి.
➣ అన్ని సోషల్ మీడియా, బ్యాంకింగ్, ఈమెయిల్ ఖాతాల కోసం ‘టూ ఫ్యాక్టర్ ఆథెంటికేషన్’ (2FA) ఎంచుకోండి.
➣ ఒరిజినల్ యాంటీ వైరస్, యాంటీ మాల్వేర్ సాఫ్ట్వేర్ మాత్రమే ఇన్స్టాల్ చేయండి.
– అనిల్ రాచమల్ల, వ్యవస్థాపకులు ఎండ్నౌ ఫౌండేషన్
“Crypto Currency | అమ్మ బాబోయ్.. భారత్లో పన్నులమోత.. క్రిప్టోకు అనుకూలం కాదు..!”
cyber blackmail | అమ్మాయిలూ.. మీ పర్సనల్ వీడియోలు పంపించి బ్లాక్మెయిల్ చేస్తున్నారా?
అమ్మాయిలు ఆన్లైన్లో ఎలా మోసపోతున్నారు? వాటి నుంచి ఎలా బయటపడాలి?