Work Form Home | నమ్మించి మోసం చేయడం ఎప్పట్నుంచో ఉన్నదే! మొబైల్ అప్లికేషన్లు ఇబ్బడిముబ్బడిగా పుట్టుకొస్తున్న ఈ కాలంలో ఆన్లైన్ దగాలు పూటకో రీతిన జరుగుతున్నాయి. పార్ట్టైమ్ ఉపాధి పేరుతో ఫుల్లుగా ముంచేస్తున్న ఉదంతాలు ఈ కోవకు చెందినవే! ఈ ఉచ్చులో చిక్కినవారు ఆర్థికంగా నష్టపోవడంతోపాటు విలువైన కాలాన్నీ కోల్పోతున్నారు. రెండు గంటల పనికి వేలకు వేలు వచ్చిపడతాయన్న సామాన్యుల దురాశ దుఃఖానికి కారణమవుతున్నది.
డిగ్రీ చదివిన భాగ్య సాధారణ గృహిణి. ఒకరోజు సోషల్ మీడియాలో ‘ఇంటి నుంచే పని.. నెలకు రూ.50వేల సంపాదన’ అనే ప్రకటన చూసింది. ఆత్రుతగా లింక్ క్లిక్ చేసింది. వ్యక్తిగత వివరాలు నమోదు చేసింది. వెయ్యి రూపాయలు డిపాజిట్ అనగానే.. తక్కువే కదా అని కట్టేసింది. తొలి టాస్క్గా డేటా ఎంట్రీ పనేదో వచ్చింది. పావుగంటలో పూర్తిచేసింది. తక్షణం ఆమె ఖాతాలో రూ.వెయ్యి డిపాజిట్ అయ్యాయి. భాగ్య తన అదృష్టం పండింది అనుకుంది. రోజుకు వెయ్యి వచ్చినా.. నెలకు రూ.30వేలు సంపాదించుకోవచ్చని సంబురపడింది. ‘రెండువేలు డిపాజిట్ చేయండి, టాస్క్ పూర్తిచేయండి.. నాలుగువేలు పొందండి’ అని మరో ప్రకటన. అరగంటలో పని పూర్తిచేసింది. అర నిమిషంలోనే నాలుగువేలు ఆమె అకౌంట్లో జమయ్యాయి. పది రోజులు గడిచాయి. భాగ్య పొద్దున, సాయంత్రం, రాత్రి పని చేస్తూనే ఉంది. డబ్బులు కడుతూనే ఉంది. అయితే ఇంతకుముందులా ఆమె ఖాతాలోకి డబ్బులు రావడం లేదు. ఆమె పనిచేస్తున్న యాప్లోని వాలెట్లో కనిపిస్తున్నాయి. కానీ, తీసుకునే వెసులుబాటు లేకుండా పోయింది. మరో నాలుగు రోజుల తర్వాత ‘మీ వాలెట్లోని డబ్బు పూర్తిగా తీసుకోవాలంటే వెంటనే రూ.30వేలు డిపాజిట్ చేయండి’ అని మరో సందేశం వచ్చింది. తొలుత సందేహించినా.. అప్పటికే వాలెట్లో రూ.30వేల వరకు ఉండటంతో ఇన్నాళ్ల శ్రమ వృథా అవుతుందని భయపడి అప్పు చేసి మరీ రూ.30వేలు కట్టింది. తర్వాత ఆమె వాలెట్లో సొమ్ము మొత్తానికే కనిపించకుండా పోయింది. యాప్ నిర్వాహకుల నుంచి స్పందన లేదు. అప్పుడు గానీ, తను నిండా మోసపోయానని అర్థం కాలేదు.
ఒక్క భాగ్య మాత్రమే కాదు.. ఇంటర్నెట్లో మునిగితేలుతున్న టీనేజర్లలో 30 శాతం మంది ఇలాంటి సోషల్ ఇంజినీరింగ్ మోసాలకు గురవుతున్నారని సర్వేలు చెబుతున్నాయి. ముఖ్యంగా వ్యక్తిగత అవసరాలు తీర్చుకోవడానికి ‘ఎర్న్ ఆన్లైన్’ ఉచ్చులో చిక్కుకుంటున్నారు చాలామంది. రాబడికి మించిన ఖర్చులు ఉన్న ఉద్యోగులు కూడా ‘ఈజీ సెకండ్ ఎర్నింగ్స్’ బాధితులు అవుతున్నారు.
☞ ‘తక్కువ సమయం.. ఎక్కువ ఆదాయం’ అని ఊదరగొడుతూ ప్రకటనలు వెల్లువెత్తుతాయి. ఈ లింక్లు చాలావరకు ఎంబెడెడ్ మెసేజింగ్ ప్లాట్ఫామ్ను కలిగి ఉంటాయి. లింక్ క్లిక్ చేయగానే చాటింగ్ ప్లాట్ఫామ్ ఓపెన్ అవుతుంది. ఇక సందేశాల పరంపర మొదలవుతుంది. తర్వాత అప్లికేషన్ డౌన్లోడ్ లింక్ వస్తుంది. ఆండ్రాయిడ్ ఫోన్లకు .APK, ఐఫోన్లకు .DMZ అప్లికేషన్ లింక్స్ వస్తాయి. ఈ యాప్లు ప్లేస్టోర్లో గానీ, యాప్స్టోర్లో గానీ అందుబాటులో ఉండవు.
☞ వాళ్లు పంపిన లింక్ ద్వారా యాప్ డౌన్లోడ్ చేసుకున్న తర్వాత అసలు తతంగం మొదలవుతుంది. ఇన్వెస్ట్మెంట్ లింక్ షేర్ చేసి డబ్బులు పంపమని చెబుతారు.
☞ మొదటి నాలుగైదు రోజులు టాస్క్లు పంపుతూ, అవి పూర్తికాగానే చెప్పినంత సొమ్ము చెల్లిస్తారు. నమ్మకం బాగా కుదిరిందని అనుకున్న తర్వాత భారీగా ఇన్వెస్ట్ చేయాల్సిందిగా అడుగుతారు. పైగా మరో ఇద్దరిని జాయిన్ చేస్తే.. మరిన్ని ప్రయోజనాలు కలుగుతాయని నమ్మబలుకుతారు. 200 శాతం లాభాలు గ్యారెంటీ అని నమ్మించి లూటీ చేస్తారు. తస్మాత్ జాగ్రత్త!
☞ ఊహకు అందని లాభాలు ఇస్తామని చెప్పారంటే ఏదో తేడా ఉందని అర్థం.
☞ మల్టీ లెవల్ మార్కెటింగ్ అనగానే, దానినుంచి తప్పించుకోవడం ఉత్తమం.
☞ వాళ్ల ప్రకటనలకు, చేస్తున్న పనులకు మధ్య వ్యత్యాసాన్ని గుర్తించాలి.
☞ యాప్ స్టోర్, ప్లే స్టోర్లో లిస్ట్ అవ్వని అప్లికేషన్లను అన్ఇన్స్టాల్ చేయాలి.
☞ స్క్రీన్ షేరింగ్లో ఉన్నప్పుడు ఫోన్లో ఆర్థిక లావాదేవీలు చేయొద్దు.
☞ డిజిటల్ టెక్నాలజీ, సోషల్ మీడియా వేదికగా చేస్తున్న మోసాలపై చాలామందికి అవగాహన లేకపోవడమే స్కామర్లకు అవకాశంగా మారుతున్నది. డబ్బులు అడిగినప్పుడు పంపించకుండా.. తక్షణం సైబర్ క్రైమ్ పోలీసులను సంప్రదించాలి. https://www.cybercrime.gov.in వెబ్సైట్ ద్వారా ఆన్లైన్లో ఫిర్యాదు చేయవచ్చు. 1930 టోల్ఫ్రీ నెంబర్ ద్వారా కూడా సమస్యను సైబర్ క్రైమ్ దృష్టికి తీసుకుపోవచ్చు.
ఏ కష్టం లేకుండా డబ్బులు ఎవరూ ఊరికే ఇవ్వరు. అలా ఇస్తాం అన్నారంటే ఏదో మోసం ఉందన్నమాటే! యూట్యూబ్, ఇన్స్టాగ్రామ్ వంటి మాధ్యమాల్లో వచ్చే ప్రకటనలను గుడ్డిగా నమ్మితే తప్పులో కాలేసినట్టే!
☞ వర్క్ ఫ్రమ్ హోమ్, జాబ్స్ ఫర్ ఫ్రీ
☞ క్విక్ మనీ
☞ అన్లిమిటెడ్ ఎర్నింగ్
☞ మల్టీ లెవల్ మార్కెటింగ్ ఇలాంటి ఆఫర్ల జోలికి వెళ్లకపోవడం శ్రేయస్కరం.
– అనిల్ రాచమల్ల, వ్యవస్థాపకులు ఎండ్నౌ ఫౌండేషన్
Fishing | అందమైన అమ్మాయిలు క్లోజ్గా మాట్లాడుకుందాం రమ్మని లింకులు పంపిస్తున్నారా?
“Crypto Currency | అమ్మ బాబోయ్.. భారత్లో పన్నులమోత.. క్రిప్టోకు అనుకూలం కాదు..!”
cyber blackmail | అమ్మాయిలూ.. మీ పర్సనల్ వీడియోలు పంపించి బ్లాక్మెయిల్ చేస్తున్నారా?
అమ్మాయిలు ఆన్లైన్లో ఎలా మోసపోతున్నారు? వాటి నుంచి ఎలా బయటపడాలి?