ఓట‌మితో మ‌మ‌తకు సీఎంగా నైతిక హ‌క్కు లేదు : త్రిపుర సీఎం బిప్లబ్‌

నందిగ్రాంలో ఓట‌మిపాలైన మమతా బెనర్జీకి సీఎం ప‌ద‌విలోకి వ‌చ్చే నైతిక హ‌క్కు లేద‌ని త్రిపుర ముఖ్య‌మంత్రి బిప్ల‌బ్ కుమార్ దేబ్ అన్నారు

May 5, 2021 / 02:02 PM IST

ఓట‌మితో మ‌మ‌తకు సీఎంగా నైతిక హ‌క్కు లేదు : త్రిపుర సీఎం బిప్లబ్‌

అగ‌ర్తలా : నందిగ్రాంలో ఓట‌మిపాలైన మమతా బెనర్జీకి సీఎం ప‌ద‌విలోకి వ‌చ్చే నైతిక హ‌క్కు లేద‌ని త్రిపుర ముఖ్య‌మంత్రి బిప్ల‌బ్ కుమార్ దేబ్ అన్నారు. ఎన్నికల్లో పోటీ చేయకుండానే చాలా మంది ముఖ్యమంత్రి అయ్యారని, అయితే మమతా బెనర్జీ నందిగ్రామ్‌లో ఓడిపోయి సీఎం ప‌ద‌వి తీసుకుంటున్నార‌ని ఆయన చెప్పారు. ప్రజలు ఎన్నుకోనందున ఆమె నైతికంగా ముఖ్యమంత్రి పదవికి దూరంగా ఉండాల‌ని ఆయ‌న తెలిపారు. తనపై కుట్ర జరిగిందని చెప్తున్న మమతా బెనర్జీ .. ఆమె ఓటమి ఒక కుట్ర అయితే, వారి పార్టీ విజయం వెనుక కూడా కుట్ర దాగి ఉన్న‌ద‌ని ఆయ‌న ఆరోపించారు. బుధ‌వారం నాడు ఆయ‌న అగ‌ర్త‌లాలో మీడియా స‌మావేశంలో మాట్లాడారు.

బెంగాల్‌లో అసెంబ్లీ ఎన్నిక‌ల అనంత‌రం హింస చెల‌రేగ‌డంపై బిప్ల‌బ్ కుమార్ ఆందోళ‌న వ్య‌క్తం చేశారు. బీజేపీకి మ‌ద్ద‌తుగా నిలిచిన వారిపై దాడుల‌కు తెగ‌బ‌డిన టీఎంసీ కార్య‌క‌ర్త‌ల‌పై చ‌ర్య‌లు తీసుకోవాల‌ని ఆయ‌న డిమాండ్ చేశారు. టీఎంసీ నేత‌ల దాడుల‌తో బీజేపీ కార్య‌క‌ర్త‌లు పొరుగున ఉన్న త్రిపుర‌, అసోం రాష్ట్రాల‌కు పారిపోయి త‌ల‌దాచుకోవాల్సిన ప‌రిస్థితులు నెల‌కొంటున్నాయ‌న్నారు. ఇక‌నైనా హింస జ‌రుగ‌కుండా చూడాల‌ని ఆయ‌న మ‌మ‌త‌కు విజ్ఞ‌ప్తి చేశారు. టీఎంసీ దారుణాల‌ను నిర‌సిస్తూ ఈ రోజు సాయంత్రం 7 గంట‌ల‌కు త్రిపుర అంత‌టా బీజేపీ కార్య‌క‌ర్త‌లు క్యాండిల్స్ వెలిగించాల‌ని ఆయ‌న కోరారు.