వ‌యసు పెరుగుద‌ల‌ : కొత్త ప్రోటీన్ క‌నిపెట్టిన‌ ఇజ్రాయెల్

ఇజ్రాయెల్‌కు చెందిన శాస్త్ర‌వేత్త‌లు అందుకు ఉప‌యోగ‌ప‌డే కొత్త ప్రోటీన్ క‌నిపెట్టారంటా. ప్ర‌స్తుతం ఎలుక‌ల్లో విజ‌య‌వంతంగా ప‌రీక్షిస్తున్నార‌ని, త్వ‌ర‌లోనే మ‌నుషులు, కోతుల్లో ప‌రీక్షిస్తామ‌ని సెల‌విస్తున్నారు ఇజ్రాయెల్ శాస్త్ర‌వేత్త‌లు

June 3, 2021 / 06:55 PM IST

వ‌యసు పెరుగుద‌ల‌ : కొత్త ప్రోటీన్ క‌నిపెట్టిన‌ ఇజ్రాయెల్

జెరూస‌లెం : వ‌య‌సును పెంచుకునే మార్గం ఉంటుందంటే అంత‌క‌న్నా ఆశ్చ‌ర్యం ఇంకొక‌టి ఉండ‌దు క‌దూ..! అయితే, ఇజ్రాయెల్‌కు చెందిన శాస్త్ర‌వేత్త‌లు అందుకు ఉప‌యోగ‌ప‌డే కొత్త ప్రోటీన్ క‌నిపెట్టారంటా. ప్ర‌స్తుతం ఎలుక‌ల్లో విజ‌య‌వంతంగా ప‌రీక్షిస్తున్నార‌ని, త్వ‌ర‌లోనే మ‌నుషులు, కోతుల్లో ప‌రీక్షిస్తామ‌ని సెల‌విస్తున్నారు ఇజ్రాయెల్ శాస్త్ర‌వేత్త‌లు. ఈ ప్రోటీన్ అందుబాటులోకి వ‌స్తే మాన‌వులు త‌మ జీవితాన్ని 120 సంవ‌త్స‌రాలు పొడిగించుకోవ‌చ్చునంట‌. బార్-ఇలాన్ విశ్వవిద్యాలయం శాస్త్రవేత్తలు.. మానవ శరీరంలో ఎస్ఐఆర్‌టీ-1 అనే ప్రోటీన్ మొత్తాన్ని పెంచడం ద్వారా జీవితాన్ని పొడిగించవచ్చున‌ని సెల‌విస్తున్నారు. ఈ ప్రోటీన్‌ను పెంచడానికి సహాయపడే అణువులను శాస్త్రవేత్తలు అభివృద్ధి చేస్తున్న‌ట్లు సమాచారం.

దీనికి సంబంధించి ఎలుక‌ల‌పై చేసిన ప‌రిశోధ‌న‌లు విజ‌య‌వంతమ‌య్యాయ‌ని శాస్త్రవేత్తలు చెప్తున్నారు. త‌మ పరిశోధన సమయంలో ఎలుక జీవితం 23 శాతం పెరిగిందని వారు పేర్కొన్నారు. రానున్న రోజుల్లో మానవులు, కోతులపై ఈ ప‌రిశోధ‌న‌లు చేస్తామంటున్నారు. ఈ ప్రోటీన్ అందుబాటులోకి వ‌స్తే ఒక వ్యక్తి జీవిత కాలం 120 సంవత్సరాలకు పెరుగుతుందని వారు భావిస్తున్నారు.

ఎస్ఐఆర్‌టీ-1 అనే ప్రోటీన్ క్యాన్సర్ నుంచి రక్షించడానికి కూడా పనిచేస్తుందని, పరిశోధనలు చేసేట‌ప్పుడు ఎలుకలో దాని ఆయుర్దాయం పెరిగిందని ప‌రిశోధ‌కుడు హైమ్ కోహెన్ తెలిపారు. ఈ ప్రయోగం మగ, ఆడ ఎలుకలపై జరిగిందని, అయితే, మగ ఎలుకల వయస్సు ఎక్కువ పెరిగిందని, మగ ఎలుకల జీవితకాలం 30 శాతం, ఆడవారి జీవితకాలం 15 శాతం పెరిగింద‌ని వెల్ల‌డించారు. వృద్ధ ఎలుకల్లో వయస్సుతో పాటే శక్తి సాధారణంగా తగ్గుతుంది, కానీ, వాటి శరీరంలో ఈ ప్రోటీన్ పెరగడం వల్ల శక్తి కూడా పెరుగుతున్న‌ట్లు గుర్తించిన‌ట్లు కోహెన్ తెలిపారు.