ఎల్ఓసీపై 3 నెల‌లుగా ఒక్క బుల్లెట్ పేల‌లేదు : జ‌న‌ర‌ల్ ఎంఎం న‌ర‌వ‌ణె

స‌రిహ‌ద్దు రేఖ వెంబ‌డి గ‌త మూడు నెల‌లుగా ఒక్క బుల్లెట్ కూడా పేల‌లేద‌ని భార‌త ఆర్మీ చీఫ్ జ‌న‌ర‌ల్ ఎంఎం న‌ర‌వ‌ణె అన్నారు. పాకిస్తాన్ వైపు నుంచి కాల్పుల విర‌మ‌ణ త‌ర్వాత ఎల్ఓసీ వెంట ప్ర‌శాంతత నెల‌కొన్న‌ద‌ని చెప్పారు

May 30, 2021 / 04:36 PM IST

ఎల్ఓసీపై 3 నెల‌లుగా ఒక్క బుల్లెట్ పేల‌లేదు : జ‌న‌ర‌ల్ ఎంఎం న‌ర‌వ‌ణె

న్యూఢిల్లీ : స‌రిహ‌ద్దు రేఖ వెంబ‌డి గ‌త మూడు నెల‌లుగా ఒక్క బుల్లెట్ కూడా పేల‌లేద‌ని భార‌త ఆర్మీ చీఫ్ జ‌న‌ర‌ల్ ఎంఎం న‌ర‌వ‌ణె అన్నారు. పాకిస్తాన్ వైపు నుంచి కాల్పుల విర‌మ‌ణ త‌ర్వాత ఎల్ఓసీ వెంట ప్ర‌శాంతత నెల‌కొన్న‌ద‌ని చెప్పారు. ఇది ఇలాగే కొన‌సాగితే రెండు దేశాల మ‌ధ్య సంబంధాలు మ‌రింత బ‌ల‌ప‌డ‌తాయ‌ని ఆయ‌న ఆశాభావం వ్య‌క్తం చేశారు. శ‌నివారం ఒక వార్తా సంస్థ‌కు ఇచ్చిన ఇంట‌ర్వ్యూలో న‌ర‌వ‌ణె ప‌లు విష‌యాలు వెల్ల‌డించారు. ఆయ‌న ఇంట‌ర్వ్యూలోని కొన్ని ముఖ్య అంశాలు ఆయ‌న మాట‌ల్లోనే..

చాలా కాలం తర్వాత‌ భారతదేశం-పాకిస్తాన్ మధ్య సంబంధాలలో మెరుగుదల కనిపిస్తున్న‌ది. గత 3 నెలలుగా ఎల్ఓసీపై కాల్పులు జరుగలేదు. ఇరు దేశాల మధ్య సంబంధాన్ని మెరుగుపర్చడానికి ఇది మొదటి మెట్టు. సరిహద్దులో చొరబాట్లు, ఉగ్రవాద సంఘటనలను తగ్గించడం వల్ల ఇరు దేశాల మధ్య సంబంధాలు మెరుగుపడతాయి.

జమ్ముక‌శ్మీర్‌లో గ‌త ఏడాదిలో హింసాకాండ కేసులు గణనీయంగా త‌గ్గాయి. ఉగ్రవాదులపై నిరంతరం దృష్టి పెడుతున్నాం. సెర్చ్‌ ఆపరేషన్‌ను క‌ఠినంగా అమలు చేస్తున్నాం. బ‌య‌టి నుంచి ఆయుధాలు స‌ర‌ఫ‌రా కాకుండా గట్టి చ‌ర్య‌లు తీసుకుంటున్నాం.

గ‌తంలో కశ్మీర్ యువత పెద్ద సంఖ్యలో ఆయుధాలు, మాదకద్రవ్యాల అక్రమ రవాణాకు పాల్పడేవారు. వీటిపై నిరంతరం నిఘా ఉంచాం, వీటి బారిన ప‌డ‌కుండా యువతను రక్షించాం. ఇక్కడి యువత ప్రతిభావంతులు. చాలా మంది యువకులు క్రీడలు, విద్యలో ప్రతిభను ప్రదర్శిస్తున్నారు. స్థానిక యువకులు ఉగ్రవాద సంస్థల్లో చేరే సంఘటనలు బాగా తగ్గాయి. కశ్మీర్ సామాన్యులు శాంతిని కోరుకుంటున్నారు.

జమ్ముక‌శ్మీర్ ప్రత్యేక హోదాను భారత్ తొలగించిన‌ప్ప‌టి నుంచి దీనిని పాకిస్తాన్ అంతర్జాతీయ సమస్యగా మార్చడానికి ప్రయత్నించింది, అయితే, అది విజయవంతం కాలేదు. ఉగ్రవాద రహిత వాతావరణం కావాల‌ని పాకిస్థాన్‌కు స్ప‌ష్టం చేశాం.

ఆఫ్ఘ‌నిస్తాన్ నుంచి అమెరికా త‌న సైనిక‌ దళాలను ఉపసంహరించుకోవడంపై ఆందోళనగా ఉన్న‌ది. రానున్న రోజుల్లో తాలిబాన్లు గ‌తంలో మాదిరిగా రెచ్చిపోర‌ని గ్యారంటీ ఏదీ లేదు. పూర్తిగా శాంతి నెల‌కొనేంత వ‌ర‌కు అమెరికా సైన్యం ఆఫ్ఘ‌నిస్తాన్‌లో ఉంటే బాగుండేద‌ని ఎంఎం న‌ర‌వ‌ణె అభిప్రాయ‌ప‌డ్డారు.