కుంభమేళా పనులపై అఖారాల అసంతృప్తి

డెహ్రాడూన్‌: ఉత్తరాఖండ్‌లోని హరిద్వార్‌లో 2021 కుంభమేళా పనులు ఇంకా ప్రారంభం కాకపోవడంపై అఖారాలు అసంతృప్తి వ్యక్తం చేశారు. కుంభమేళా సన్నాహాలు ఇంకా ప్రారంభం కాలేదని, దీనిపై తాము సంతృప్తిగా లేమని అఖారా పరిషత్ చీఫ్ మహంత్ నరేంద్ర గిరి తెలిపారు. మేళా నిర్వహణపై సంబంధిత అధికారికి ఒక వినతిపత్రం సమర్పించినట్లు చెప్పారు. మేళా పనులను జనవరి 1న పరిశీలించాలని కోరుతూ ఉత్తరాఖండ్‌ సీఎంతోపాటు ఇతర అధికారులు తమను ఆహ్వానించారని అన్నారు. అయితే 12 ఏండ్లకు ఒకసారి జరిగే కుంభమేళా ఏర్పాట్లు ఇంకా ప్రారంభం కాకపోవడంపై అసంతృప్తిగా ఉన్నదని చెప్పారు. 2021 కుంభమేళా జనవరి 14 నుంచి ఏప్రిల్‌ 27 వరకు జరుగనున్నది. 9 ముఖ్య రోజుల్లో భక్తులు గంగానదిలో పవిత్ర పుణ్య స్నానాలు ఆచరిస్తారు.