Jamili Elections | ఈనెల 16న లోక్‌సభ ముందుకు వన్‌ నేషన్‌ వన్‌ ఎలక్షన్‌ బిల్లు..!

Jamili Elections | ‘వన్ నేషన్ వన్ ఎలక్షన్ బిల్లు’ (One Nation One Election bill) ఈనెల 16వ తేదీన లోక్‌సభ (Lok Sabha) ముందుకు రానున్నట్లు తెలిసింది.

Jamili Elections | దేశంలో జమిలి ఎన్నికల (Jamili Elections) నిర్వహణకు సంబంధించి రూపొందించిన రెండు కీలక బిల్లులకు కేంద్ర కేబినెట్‌ ఆమోదం తెలిపిన విషయం తెలిసిందే. ఈ ముసాయిదా బిల్లులు ఈనెల 16వ తేదీన లోక్‌సభ (Lok Sabha) ముందుకు రానున్నట్లు తెలిసింది. ఈ మేరకు అధికారిక వర్గాలను ఊటంకిస్తూ జాతీయ మీడియా పేర్కొంది.

డిసెంబర్ 16న ‘వన్ నేషన్ వన్ ఎలక్షన్ బిల్లు’ (One Nation One Election bill)ను లోక్‌సభలో ప్రవేశపెట్టనున్నట్లు సదరు వర్గాలు పేర్కొన్నాయి. కేంద్ర న్యాయశాఖ మంత్రి అర్జున్ రామ్ మేఘ్వాల్ (Arjun Ram Meghwal) 129వ రాజ్యాంగ సవరణ బిల్లు కింద జమిలి బిల్లును ప్రవేశపెట్టనున్నట్లు వెల్లడించాయి. ఆ తర్వాత దీనిని చర్చ కోసం జాయింట్ పార్లమెంటరీ కమిటీ (Joint Parliamentary Committee)కి పంపనున్నారు.

దేశవ్యాప్తంగా అన్ని రాష్ర్టాల అసెంబ్లీలకు, లోక్‌సభకు, స్థానిక సంస్థలకు ఒకేసారి ఎన్నికలను నిర్వహించడమే జమిలి ఎన్నికల ప్రధాన ఉద్దేశం. వాస్తవానికి మన దేశంలో జమిలి ఎన్నికల నిర్వహణ కొత్తదేమీ కాదు. 1952లో తొలి సాధారణ ఎన్నికలు మొదలుకొని, 1967 వరకు లోక్‌సభకు, రాష్ర్టాల అసెంబ్లీలకు చాలావరకు ఒకేసారి ఎన్నికలు జరిగాయి. అయితే అనంతర కాలంలో సుస్థిర ప్రభుత్వాలు ఏర్పడకపోవడం, గడువుకు ముందే పలు రాష్ర్టాల శాసనసభలను బర్తరఫ్‌ చేయడం తదితర కారణాలతో జమిలి ఎన్నికలు పట్టాలు తప్పాయి. దీంతో లోక్‌సభ, అసెంబ్లీలకు వేర్వేరుగా ఎన్నికలు జరుపడం మొదలైంది.

జమిలి నిర్వహణ ఇలా.. (కోవింద్‌ కమిటీ సిఫారసులు)

• మొదటి దశలో లోక్‌సభ, అన్ని రాష్ర్టాల అసెంబ్లీ ఎన్నికలు ఏకకాలంలో నిర్వహించాలి.
• రెండో దశలో లోక్‌సభ, అసెంబ్లీల ఎన్నికలు ముగిసిన 100 రోజుల్లో స్థానిక సంస్థల ఎన్నికలు జరపాలి.
• లోక్‌సభ, అసెంబ్లీ ఎన్నికలను ఒకేసారి జరిపేందుకు వీలుగా సాధారణ ఎన్నికల తర్వాత లోక్‌సభ భేటీ అయిన మొదటి రోజును ‘అపాయింటెడ్‌ డేట్‌’గా రాష్ట్రపతి నోటిఫై చేయవచ్చు.
• జమిలి నాటికి కాలపరిమితి ముగియని అసెంబ్లీల గడువును కుదించాలి. గడువు తీరిన అసెంబ్లీల కాలపరిమితిని పెంచాలి.
• హంగ్‌ ఏర్పడినప్పుడు, ప్రభుత్వం మధ్యలోనే కూలిపోయినప్పుడు లోక్‌సభకు మధ్యంతర ఎన్నికలు నిర్వహించాలి.
• మధ్యంతర ఎన్నికలు నిర్వహించగా ఏర్పడే కొత్త ప్రభుత్వం ఐదేండ్లలో మిగిలి ఉన్న గడువుకు మాత్రమే పని చేస్తుంది.
• అసెంబ్లీలకు మధ్యంతర ఎన్నికలు నిర్వహించినా కొత్త ప్రభుత్వం గడువు లోక్‌సభతో పాటే ముగుస్తుంది.
• అన్ని ఎన్నికలకు ఒకే ఓటరు జాబితా ఉండాలి. రాష్ట్ర ఎన్నికల కమిషన్‌లతో సంప్రదించి కేంద్ర ఎన్నికల కమిషన్‌ ఈ జాబితా రూపొందించాలి.
• జమిలి ఎన్నికలకు అవసరమైన ఈవీఎంలు, వీవీప్యాట్లు, సిబ్బంది, భద్రత వంటి ఏర్పాట్లపై ఈసీ ప్రణాళిక రూపొందించాలి.

Also Read..

“Jamili Elections | జమిలికి కేంద్ర క్యాబినెట్‌ ఆమోదం.. వచ్చే వారం పార్లమెంటు ముందుకు ముసాయిదా బిల్లులు”

“అంబేద్కర్‌ను విస్మరించిన జమిలి!”

“జమిలి ఎన్నికలు వద్దు”

“జమిలిపై మూడు బిల్లులు!”