ఛ‌త్తీస్‌గ‌ఢ్‌లో 24కు చేరిన న‌క్స‌ల్స్ దాడి మృతులు..!

April 4, 2021 / 01:17 PM IST

కొత్తగూడెం క్రైమ్‌: ఛత్తీస్‌గఢ్ రాష్ట్రం సుక్మా, బీజాపూర్ జిల్లాల స‌రిహ‌ద్దుల్లోని అట‌వీ ప్రాంతంలో మావోయిస్టుల మ‌ధ్య కాల్పులు ఇంకా కొన‌సాగుతున్నాయి. ఈ కాల్పుల్లో ఇప్పటివరకు 24 మంది జవాన్లు మృతిచెందినట్లు సమాచారం. మ‌రో 43 మంది జవాన్లు స్వ‌ల్ప గాయాలతో బయటపడగా, ఇంకో 13 మందికి తీవ్ర గాయాలైనట్లు తెలిసింది. భ‌ద్ర‌తాబ‌ల‌గాలు, మావోయిస్టుల మ‌ధ్య భీక‌రపోరుతో ఛత్తీస్‌గఢ్ లో యుద్ధ వాతావరణం నెలకొన్న‌ది.

మొత్తం రెండు వేల మంది జవాన్లు ఈ ఆపరేషన్‌లో పాల్గొనగా, సుమారు వెయ్యి మందితో కూడిన‌ మావోయిస్టు గెరిల్లా ఆర్మీ గుట్టలపై నుంచి జవాన్లపై మెరుపు దాడి చేసినట్లు పోలీసు వర్గాలు వెల్ల‌డించాయి. ఈ దాడిలో మావోయిస్టులు మోటార్ లాంచ‌ర్‌ల‌ను కూడా వినియోగించిన‌ట్లు స‌మాచారం. ఈ ఘ‌ట‌న‌లో గల్లంతైన జవాన్ల ఆచూకీ కోసం తీవ్రంగా గాలింపు చర్యలు కొన‌సాగుతున్నాయి. దాంతో మృతుల సంఖ్య మ‌రింత పెరిగే అవకాశం ఉన్న‌ది. కాగా, ఈ ఘటనకు సంబంధించి అధికారిక వివరాలు వెల్ల‌డికావాల్సి ఉంది.