పల్లెప్రగతితో మారిన గ్రామ రూపురేఖలు
జీపీ పరిధిలో మూడు పల్లె ప్రకృతి వనాలు, వైకుంఠధామం ఏర్పాటు
ప్రతిరోజూ చెత్తాచెదారం తొలగింపు
పంచాయతీ ట్రాక్టర్తో డంపింగ్ యార్డుకు చెత్త తరలింపు
అద్దాల్లా మెరుస్తున్న వీధులు
హర్షం వ్యక్తం చేస్తున్న ప్రజలు
మహబూబాబాద్, ఏప్రిల్ 8(నమస్తే తెలంగాణ): పల్లెప్రగతితో నేరడ రూపురేఖలు మారాయి. నెలనెలా ప్రభుత్వం మంజూరు చేస్తున్న నిధులను జీపీ పాలకులు, అధికారులు సద్వినియోగం చేసుకుంటూ గ్రామంలో అభివృద్ధిని పరుగులు పెట్టిస్తున్నారు. గ్రామంలో పేరుకుపోయిన చెత్తాచెదారం తొలగించారు. వైకుంఠధామం నిర్మించి చివరి మజిలీ చింత తీర్చారు. పల్లె ప్రకృతి వనాలు ఏర్పాటు చేసి ఆహ్లాదకర వాతావరణం కల్పించారు.
ఒకప్పుడు గ్రామాల్లో అపరిశుభ్ర వాతావరణం కనిపించేది. కానీ ప్రస్తుతం పరిస్థితులు అందుకు భిన్నంగా మారాయి. పల్లె ప్రగతి ద్వారా జరుగుతున్న అభివృద్ధి పనులతో గ్రామాల రూపురేఖలు మారాయి. రాష్ట్ర ప్రభుత్వం ఇప్పటి వరకు 3సార్లు పల్లెప్రగతి ద్వారా గ్రామాల్లో పనులు చేపట్టింది. ఇప్పుడు పల్లెలు అభివృద్ధిలో పట్టణాలతో పోటీ పడుతున్నాయి. పల్లెప్రగతి ఫలాలను మండలంలోని నేరడ గ్రామ పంచాయతీ అందిపుచ్చుకున్నది. ప్రణాళికాబద్ధంగా అభివృద్ధి పనులు చేపట్టడంతో నేరడ గ్రామపంచాయతీకి కొత్తకళ వచ్చింది. గ్రామంలో కొత్తగా సీసీ రోడ్లు నిర్మించారు. విద్యుత్ స్తంభాలు వేసి ఎల్ఈడీ లైట్లు బిగించారు. చెత్తాచెదారం లేకుండా వీధులను శుభ్రం చేస్తుండడంతో అద్దాల్లా మెరుస్తున్నాయి. చెత్తను సేకరించి గ్రామపంచాయతీ ట్రాక్టర్ ద్వారా డంపింగ్ యార్డ్కు తరలిస్తున్నారు. ప్రతి ఏటా హరితహారంలో మొక్కలు నాటుతున్నారు. నర్సరీని ఏర్పాటు చేశారు. వీటన్నింటితో గ్రామంలో ఆహ్లాదకర వాతావరణం నెలకొన్నది. దీంతో గ్రామస్తులు హర్షం వ్యక్తం చేస్తున్నారు.
ఆహ్లాదకరంగా పల్లె ప్రకృతి వనం..
నేరడ గ్రామ పంచాయతీ పరిధిలో అధికారులు మూడు చోట్ల పల్లెప్రకృతి వనాలు ఏర్పాటు చేశారు. నేరడ గ్రామంలో ఎకరం స్థలంలో పల్లెప్రకృతి వనం ఏర్పాటు చేసి జామ, మామిడి, దానిమ్మ, ఇతర నీడనిచ్చే మొక్కలను పెంచుతున్నారు. వాకింగ్ ట్రాక్ను ఏర్పాటు చేశారు. బాల్యతండా, రాయినిపట్నంలో పల్లెప్రకృతి వనాలు నిర్మించారు. పిల్లలు ఆడుకునేందుకు ఊయల, జారుడుబల్లలతో పాటు ఇతర ఆట పరికరాలు సమకూర్చారు. గ్రామ శివారులో డంపింగ్ యార్డ్ ఏర్పాటు చేశారు. తడి, పొడి చెత్తపై ప్రజలకు అవగాహన కల్పిస్తున్నారు. పల్లె ప్రకృతివనం సమీపంలోనే రైతు వేదికను నిర్మించారు.
ఇవి కూడా చదవండి..
బెస్ట్ హెల్త్కేర్ స్పెయిన్.. ఎందుకంటే!