అరుదైన బ్ల‌డ్ క్లాట్‌.. జాన్స‌న్ అండ్ జాన్స‌న్ వ్యాక్సిన్‌ నిలిపేసిన అమెరికా

April 13, 2021 / 05:21 PM IST

వాషింగ్ట‌న్‌: క‌రోనా మ‌హ‌మ్మారిని త‌రిమేయ‌డానికి వ‌చ్చిన సింగిల్ డోస్ జాన్స‌న్ అండ్ జాన్స‌న్ వ్యాక్సిన్ వినియోగాన్ని అమెరికా తాత్కాలికంగా నిలిపేసింది. ఈ వ్యాక్సిన్ కార‌ణంగా అరుదైన‌, తీవ్ర‌మైన ర‌క్త‌గ‌డ్డ క‌ట్టే స‌మ‌స్య ఎదుర‌వ‌డమే దీనికి కార‌ణం. ఈ వ్యాక్సిన్ తీసుకున్న ఆరు మందిలో బ్ల‌డ్ క్లాట్ అయిన‌ట్లు గుర్తించారు. జాన్స‌న్ అండ్ జాన్స‌న్ వ్యాక్సిన్‌పై మంగ‌ళ‌వారం ప్ర‌క‌ట‌న విడుద‌ల చేశామ‌ని, ముందు జాగ్ర‌త్త చ‌ర్య‌గా ఈ వ్యాక్సిన్ వినియోగాన్ని నిలిపేయాల‌ని సిఫార్సు చేస్తున్న‌ట్లు అమెరికా డ్ర‌గ్ నియంత్ర‌ణ సంస్థ ఫుడ్ అండ్ డ్ర‌గ్ అడ్మినిస్ట్రేష‌న్ ట్వీట్ చేసింది.

ఏప్రిల్ 12వ తేదీ వ‌ర‌కూ అమెరికాలో మొత్తం 68 ల‌క్ష‌ల జే&జే వ్యాక్సిన్ల‌ను ఇచ్చారు. ఇందులో అరుదైన‌, తీవ్ర‌మైన ర‌క్తం గ‌డ్డ క‌ట్టిన స‌మ‌స్య‌తో బాధ‌ప‌డుతున్న ఆరుగురి డేటాను స‌మీక్షిస్తున్న‌ట్లు ఎఫ్‌డీఏ వెల్ల‌డించింది. అయితే ప్ర‌స్తుతానికి ఈ తీవ్ర స‌మస్య‌లు చాలా అరుదుగానే క‌నిపిస్తున్న‌ట్లు తెలిపింది.

Today FDA and @CDCgov issued a statement regarding the Johnson & Johnson #COVID19 vaccine. We are recommending a pause in the use of this vaccine out of an abundance of caution.
— U.S. FDA (@FDA) April 13, 2021