Vitamin C: మన శరీరానికి ఎంత సీ విటమిన్‌ అవసరం? నిపుణులేమంటున్నారు..

Vitamin C: విటమిన్-సీ.. శరీరానికి అవసరమైన పోషకం. ఇది తెల్ల రక్త కణాలను పెంచడం ద్వారా మనలో రోగనిరోధక శక్తిని బలపడేలా చేస్తుంది. ఇది శరీరం స్వయంగా...

December 21, 2021 / 07:01 PM IST

Vitamin C: మన శరీరానికి ఎంత సీ విటమిన్‌ అవసరం? నిపుణులేమంటున్నారు..

(Vitamin C) విటమిన్-సీ.. శరీరానికి అవసరమైన పోషకం. ఇది తెల్ల రక్త కణాలను పెంచడం ద్వారా మనలో రోగనిరోధక శక్తిని బలపడేలా చేస్తుంది. ఇది శరీరం స్వయంగా తయారు చేసుకోని యాంటీ ఆక్సిడెంట్. అందువల్ల సహజసిద్ధమైన ఆహారాల నుంచి గ్రహించాలి. ఈ విటమిన్‌ లోపం వల్ల గుండెకు సంబంధించిన నరాలు, ఎముకలు, చర్మం దెబ్బతింటాయి. అందువల్ల మీ ఆహారంలో విటమిన్ సీ, సప్లిమెంట్లు అధికంగా ఉండేలా చూసుకోవాలి.

విటమిన్ సీ అనేది నీటిలో కరిగిపోయే పోషకం. అందుకని నిత్యం తగిన మోతాదులో శరీరానికి అందేలా తినాలి. ప్రొటీన్లను సంరక్షించడంలో విటమిన్‌ సీ సహాయపడుతుంది. మగవారు 90 మిల్లీగ్రాములు, ఆడవారు 75 మిల్లీగ్రాములు నిత్యం శరీరానికి అందించాలి. పెద్దల్లో పిగ్మెంటేషన్‌, ఇతర చర్మ సంబంధ వ్యాధులు వచ్చిన సమయాల్లో 1000 మిల్లీ గ్రాముల వరకు విటమిన్‌ సీ తీసుకోవాలి. గర్భంతో ఉన్నవారు నిత్యం 85 మిల్లీగ్రాములు, బాలింతలు 120 మిల్లీగ్రాముల వరకు శరీరానికి అందేలా చూడాలి.

ఏం చేస్తుంది..?

అధిక రక్తపోటు రాకుండా చూస్తుంది.
అతినీలలోహిత కిరణాల నుంచి చర్మాన్ని రక్షిస్తుంది.
డీఎన్‌ఏ రిపేరింగ్‌, దెబ్బలు మానడంలో సహాయపడుతుంది.
తీవ్రమైన శ్వాసకోశ ఇన్‌ఫెక్షన్లు, టీబీ నుంచి మనల్ని కాపాడుతుంది.
ఈ విటమిన్‌లోని యాంటీ ఆక్సిడెంట్ గుణాలు క్యాన్సర్లు వచ్చే అవకాశాలను తగ్గిస్తాయి.

ఎలా పొందాలి..?

విటమిన్‌ సీ ముఖ్యంగా నిమ్మజాతి పండ్ల నుంచి పొందవచ్చు. ఆరెంజ్‌, నిమ్మ, కివి, పైనాపిల్‌, చెర్రీ, బ్లూబెర్రీ, బొప్పాయి, టమాట, బ్రొకోలి నుంచి ఎక్కువ మొత్తంలో సీ విటమిన్‌ లభిస్తుంది. ఇవేకాకుండా పాలు, జామ, దుంపలు, క్యాబేజీ, ఉసిరి, టర్నిప్, ముల్లంగి ఆకులు, ఎండు ద్రాక్ష, క్యాప్సికమ్‌లో కూడా లభిస్తుంది.

లోపిస్తే ఏంటి..?

విటమిన్‌ సీ లోపించడం వల్ల అనేక ఆరోగ్య సమస్యలను ఎదుర్కోవాల్సి ఉంటుంది. సీ విటమిన్‌ లోపిస్తే.. చర్మం పొడిబారడం, చిగుళ్ల నుంచి రక్తం కారడం, శరీరంలో రక్తం లేకపోవడం, గాయాలు మానడానికి ఎక్కువ సమయం పట్టడం, రోగనిరోధక శక్తి తగ్గడం, కీళ్ల నొప్పులు, దంతాల బలహీనత లక్షణాలు కనిపిస్తాయి.

మరి ఎక్కువైతే..?

శరీరానికి నిత్యం ఎంత మోతాదులో సీ విటమిన్‌ అవసరమో అంతే అందించేలా చూసుకోవాలి. ఎక్కువ మొత్తంలో అందితే ప్రమాదమే అని నిపుణులు హెచ్చరిస్తున్నారు. శరీరంలో ఎక్కువ మొత్తంలో ఐరన్‌ పెరిగేలా చేస్తుంది. వీటితోపాటు కడుపు నొప్పి, వికారం, వాంతులు, గుండెల్లో మంట, తలనొప్పి, నిద్రలో ఇబ్బంది వంటి సమస్యలను ఎదుర్కోవాల్సి వస్తుంది.