ముగ్గురు వ్యక్తుల అరెస్ట్
కారు, ద్విచక్ర వాహనం స్వాధీనం
వివరాలు వెల్లడించిన సీపీ తరుణ్జోషి
హన్మకొండ సిటీ/ వర్ధన్నపేట, ఏప్రిల్ 25 : ఎవరి కంటపడకుండా గంజాయిని రాష్ట్ర సరిహద్దులు దాటించి సొమ్ము చేసుకోవాలనుకున్న ముఠా సభ్యులను టాస్క్ఫోర్స్, వర్ధన్నపేట పోలీసులు అదుపులోకి తీసుకొని రూ. 10 లక్షల విలువైన 100 కిలో గంజాయిని స్వాధీనం చేసుకున్నట్లు వరంగల్ పోలీస్ కమిషనర్ తరుణ్ జోషి తెలిపారు. ఈ మేరకు ఆయన తన కార్యాలయంలో వివరాలు వెల్లడించారు. భద్రాచలం జిల్లా జగదీశ్ కాలనీకి చెందిన కారు డ్రైవర్ కొండిశెట్టి సత్యనారాయణ ఆర్థిక ఇబ్బందుల నేపథ్యంలో సులభంగా డబ్బులు సంపాదించేందుకు గంజాయి వ్యాపారాన్ని ఎంచుకున్నాడు. ఇందుకోసం తనకు పరిచయం ఉన్న రాజు, ప్రవీణ్తో పాటు ఖమ్మం జిల్లా మామిండ్లగూడేనికి చెందిన రమాదేవి, మహబూబాబాద్ జిల్లా గార్ల మండలం పిన్నరెడ్డిగూడేనికి చెందిన వినోద్తో జతకట్టాడు. ఒడిశాలోని కుంట ప్రాంతంలో గుర్తు తెలియని వ్యక్తుల వద్ద తక్కువ ధరకు గంజాయి కొనుగోలు చేసి కారు వెనుక భాగంలో ప్రత్యేకంగా తయారు చేయించిన ప్రాంతంలో ప్యాకెట్లను భద్రపరిచి హైదరాబాద్, ముంబై, సూరత్, పుణేకు తరలించి అధిక ధరకు విక్రయించేవారు. వచ్చే సొమ్మును అందరూ సమానంగా పంచుకునేవారు.
అదే పద్ధతిలో వస్తూ…
ఈనెల 23వ తేదీన రాజు, ప్రవీణ్ సహకారంతో కుంటలో 100 కిలోల గంజాయిని కొనుగోలు చేసి అక్కడి నుంచి సత్యనారాయణ, వినోద్కుమార్, రమాదేవి కొత్తగూడెం నుంచి మహబూబాబాద్ మీదుగా తొర్రూరుకు చేరుకున్నారు. పోలీసుల తనిఖీలను గుర్తించేందుకు వీలుగా బైక్పై రమాదేవి, వినోద్కుమార్ ముందు వెళ్తుండగా, వెనుక కారులో సత్యనారాయణ వస్తున్నాడు. టాస్క్ఫోర్స్ పోలీసులకు పక్కా సమాచారం రావడంతో వెస్ట్జోన్ డీసీపీ శ్రీనివాస్రెడ్డి ఆదేశాల మేరకు వర్ధన్నపేట సమీపంలోని ఇల్లంద గ్రామ శివారులో ఉన్న రాజరాజేశ్వరాల యం వద్ద పోలీసులు వాహన తనిఖీలు చేపట్టారు. ఆ సమయంలో ద్విచక్రవాహనంపై ఉన్న ఇద్దరు వ్యక్తులు, కారులో వస్తున్న సత్యనారాయణ తమ వాహనా లు వదిలి పారిపోయేందుకు యత్నించారు. అక్కడే ఉన్న పోలీసులు వారిని ఆదుపులోకి తీసుకొని వాహనాలను తనిఖీ చేయగా గంజాయి రవాణా చేస్తున్నట్లు గుర్తించారు. నిందితులను అరెస్టు చేసి కారు, ద్విచక్రవాహనం, సెల్ఫోన్లు స్వాధీనం చేసుకున్నట్లు సీపీ వివరించారు. కాగా ముఠాలోని రాజు, ప్రవీణ్ పరారీలో ఉన్నారని ఆయన పేర్కొన్నారు. నిందితులను అరెస్టు చేయడంలో ప్రతిభ కనబరిచిన వర్ధన్నపేట ఏసీపీ రమేశ్కుమార్, టాస్క్ఫోర్స్ ఇన్స్పెక్టర్ శ్రీనివాస్జీ, వర్ధన్నపేట సీఐ విశ్వేశ్వర్, వర్ధన్నపేట, రాయపర్తి ఎస్సైలు వంశీకృష్ణ, నాగరాజు, టాస్క్ఫోర్స్ హెడ్కానిస్టేబుల్ సొమలిం గం, కానిస్టేబుల్స్ శ్రీనివాస్, రాజును సీపీ అభినందించారు.