గంట‌కు రూ.75 కోట్లు పెరిగిన గౌతం ఆదానీ సంప‌ద‌!

గంట‌కు రూ.75 కోట్లు పెరిగిన గౌతం ఆదానీ సంప‌ద‌! | 69 బిలియ‌న్ల డాల‌ర్ల సంప‌ద గ‌ల గౌతం ఆదానీ.. త‌న కంటే ముందు వ‌రుస‌లో ఉన్న రిల‌య‌న్స్ అధినేత ముకేశ్ ...

May 25, 2021 / 12:53 PM IST

న్యూఢిల్లీ: ఆసియా కుబేరుడిగా అవ‌త‌రించిన రిల‌య‌న్స్ అధినేత ముకేశ్ అంబానీని ఆదానీ గ్రూప్ చైర్మ‌న్ గౌతం ఆదానీ దాటేస్తారా? అన్న సంకేతాలు వెలువ‌డుతున్నాయి. బ్లూం బ‌ర్గ్ బిలియ‌నీర్స్ ఇండెక్స్ ప్ర‌కారం ఈ నెల 23 నాటికి గౌతం ఆదానీ సంప‌ద 69 బిలియ‌న్ల డాల‌ర్లు.. అంటే మ‌న క‌రెన్సీలో అక్ష‌రాల రూ.5.03 ల‌క్ష‌ల కోట్లు.

2021లో 142 రోజుల్లో గౌతం ఆదానీ సంప‌ద‌లో రూ.2.56 ల‌క్ష‌ల కోట్లు (35.2 బిలియ‌న్ల డాల‌ర్లు) జ‌త క‌లిసింది. అంటే ఈ ఏడాది ప్ర‌తి గంట‌కూ రూ.75 కోట్ల మేర‌కు ఆయ‌న సంప‌ద పెరుగుతూ వ‌చ్చింది.

ఇటీవ‌ల బ్లూంబ‌ర్గ్ బిలియ‌నీర్స్ ఇండెక్స్ ప్ర‌కారం ఆసియా కుబేరుల్లో ముకేశ్ అంబానీ త‌ర్వాత స్థానం గౌతం ఆదానీదే. ఇంత‌కుముందు రెండో స్థానంలో ఉన్న చైనా బాటిల్డ్ వాట‌ర్ టైకూన్ జోంగ్‌షాన్‌షాన్‌ను దాటేశారు ఆదానీ.

సంప‌ద రూపేణా ప‌రిశీలిస్తే ఫ్రాన్స్ బిలియ‌నీర్ బెర్నార్డ్ అర్నాట్ ఈ ఏడాది వ్య‌క్తిగ‌తంగా సంపాదించిన సంప‌ద 47.9 బిలియ‌న్ల డాల‌ర్లు. దీని ప్ర‌కారం బెర్నార్డ్ అర్నాట్ త‌ర్వాత వ్య‌క్తిగ‌త సంప‌ద పెంచుకున్న బిలియ‌నీర్ మ‌న గౌతం ఆదానీ.

అంతే కాదు దేశంలోని 19 మంది ఇత‌ర భార‌తీయ కుబేరుల సంప‌ద 24.5 బిలియ‌న్ల డాల‌ర్ల కంటే గౌతం ఆదానీ వ్య‌క్తిగ‌త సంప‌దే ఎక్కువ‌.

ఆదానీ గ్రూప్ సంస్థ‌లు ఆదానీ గ్రీన్‌, ఆదానీ ఎంట‌ర్‌ప్రైజెస్‌, ఆదానీ గ్యాస్‌, ఆదానీ ట్రాన్స్‌మిష‌న్ త‌దిత‌ర సంస్థ‌ల షేర్లు భారీగా దూసుకెళ్లాయి. ఒక‌వైపు క‌రోనా మ‌హ‌మ్మారి అంద‌రినీ వ‌ణికిస్తున్నా.. ఆదానీ గ్రూప్ షేర్లు ధ‌గ‌ధ‌గ‌లాడాయి.

ఏడాది కాలంలో ఆదానీ టోట‌ల్ గ్యాస్ 1145 శాతం గ్రోత్ సాధించింది. ఆదానీ ఎంట‌ర్ ప్రైజెస్ 827 శాతం, ఆదానీ ట్రాన్స్‌మిష‌న్ 617 శాతం అభివ్రుద్ధి చెందాయి. ఆదానీ గ్రీన్ ఎన‌ర్జీ, ఆదానీ ప‌వ‌ర్ 433, 189 శాతం పెరిగాయి. ఇక ఆదానీ ప‌వ‌ర్ 142 శాతం అడ్వాన్స్ అయ్యింది.