కామాంధుల కార‌ణంగా ఇంత‌మంది మ‌హిళ‌లు ఉద్యోగాలు మానేస్తున్నారా?

December 10, 2021 / 05:46 AM IST

human rights day ( నేడు మానవ హక్కుల దినోత్సవం )| స్త్రీ అక్షరాస్యత పెరుగుతున్నది. పురుషులతో సమానంగా అన్ని రంగాల్లో రాణిస్తున్నారు. ఎంత ఉన్నతస్థాయికి వెళ్లినా.. పనిచేసే చోట మాత్రం ప్రశాంతత లేకుండా పోతున్నది. లైంగిక వేధింపులకు గురికావాల్సి వస్తున్నది. పేరుకు చట్టాలున్నా, ఆచరణలో మాత్రం ఆశించిన ఫలితాలను ఇవ్వడం లేదని జాతీయ మానవ హక్కుల కమిషన్‌ తాజా అధ్యయనం రుజువు చేస్తున్నది. ఆ నివేదిక సారాంశం..

ఇదీ పరిస్థితి..

లైంగిక వేధింపులతో చట్టాన్ని ఆశ్రయిస్తున్న వారు 47 శాతం.
మౌనంగా వేధింపులను భరిస్తున్న వారు 24 శాతం.
ప్రశ్నించే ధైర్యం చేయలేని వారు 19.5 శాతం.
ఉద్యోగాలు మానేస్తున్న వారు 19.2 శాతం.
చట్టానికి పదునులేదని భావిస్తున్న వారు 65 శాతం.
ఫిర్యాదు చేయడం వల్ల ఉద్యోగం కోల్పోయినవారు 34.3 శాతం.

ఎలాంటి వేధింపులు?

తాకడం ద్వారా 81 శాతం.
అసభ్యమైన వర్ణనలతో 80.4 శాతం.
ద్వంద్వార్థాలతో 61.6 శాతం.
బూతు జోక్స్‌ ద్వారా 45 శాతం.
ఫోన్‌ సంభాషణ ద్వారా 44 శాతం.
అసభ్యకర చూపుల ద్వారా 89 శాతం.
తమ ప్రైవేటు భాగాలు ప్రదర్శిస్తూ 24.2 శాతం.
బహుమతుల ద్వారా 26 శాతం.
పనిభారం తగ్గించేసాకుతో 15.9 శాతం.
ప్రమోషన్లు ఆశ చూపి 17.6 శాతం.
తప్పులు వెతకడం ద్వారా 35 శాతం.
వేతనాల కోత ద్వారా 25.3 శాతం.
అవమానించడం ద్వారా 17.2 శాతం.
కఠినమైన బాధ్యతల ద్వారా 10.9 శాతం.
ఇంక్రిమెంట్లను ఆపేయడం ద్వారా 10 శాతం.

పరిష్కారం?

రాజ్యాంగ అధికరణం 19 (1) జీవనోపాధి స్వేచ్ఛను ప్రసాదించింది. కానీ సకల అర్హతలతో, దీటైన నైపుణ్యంతో వృత్తి ఉద్యోగాల్లో అడుగుపెడుతున్న మహిళలకు అడుగడుగునా అవరోధాలే. ఈ లైంగిక వేధింపులను అరికట్టేందుకు భారత ప్రభుత్వం 2013లోనే చట్టం చేసింది. 10 మందికన్నా ఎక్కువ మహిళలు ఉన్న కార్యాలయాలు కచ్చితంగా లైంగిక వేధింపులను నిరోధించేందుకు ఓ అంతర్గత ఫిర్యాదుల కమిటీని ఏర్పాటు చేయాల్సి ఉంది. ఫిర్యాదు అందిన వెంటనే ఆ అంతర్గత కమిటీ విచారణను ప్రారంభించి, 90 రోజుల్లో ఆ ప్రక్రియను పూర్తి చేయాలి. ఆ సూచనలను ఆయా సంస్థలు తప్పనిసరిగా అమలు చేయాల్సిందే. లైంగిక వేధింపులకు పాల్పడినట్లు రుజువైతే సదరు ఉద్యోగిపై 509తో పాటు, వివిధ సెక్షన్ల కింద కేసు నమోదు చేయాలి. నేరం రుజువైతే జరిమానాతోపాటు జైలు శిక్ష కూడా విధించవచ్చు.

✍ మ్యాకం రవికుమార్‌

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి