క‌న్న‌తండ్రే వివ‌క్ష చూపిస్తున్నాడు.. ఏం చేయాలి?

November 13, 2021 / 05:05 AM IST

నా మిత్రురాలు యూకేలోని టాప్‌ యూనివర్సిటీలో ఎంబీఏ చేసింది. ఆమె తండ్రి పెద్ద వ్యాపారవేత్త. నా స్నేహితురాలి భర్త మాత్రం పెద్దగా చదువుకోలేదు. కానీ, వీళ్ల కంపెనీలో డైరెక్టర్‌గా ఉన్నారు. ఇంత చదువుకున్నా తండ్రి తనకు ఎలాంటి ప్రాధాన్యం ఇవ్వడం లేదని నా ఫ్రెండ్‌ బాధపడుతూ ఉంటుంది. వ్యాపార విషయాల్లో ఎంత మంచి సలహా ఇచ్చినా పట్టించుకోరట. ఆమె భర్త మాటకు మాత్రం ఎంతో విలువ ఇస్తారట. తన తండ్రి లింగ వివక్ష చూపుతున్నాడని తన ఆరోపణ. ఈ సమస్యకు పరిష్కారం ఉందా?

– ఓ స్నేహితురాలు

జ : మీ ఫ్రెండ్‌ మానసికంగా కుంగిపోవడం బాధాకరమైన విషయమే. తనను మామూలు స్థితికి తీసుకురావడంలో మీ పాత్ర చాలా ఉంటుంది. అయితే వాళ్ల నాన్న ఒక్క వ్యాపారం విషయంలోనే తననూ, తన సలహాలనూ నిర్లక్ష్యం చేస్తున్నారా? లేకపోతే చిన్నప్పటి నుంచీ లింగ వివక్ష ఉందా? అన్నది గమనించాల్సిన విషయం. ఈ విషయాల్లో మీ స్నేహితురాలికి స్పష్టత ఇవ్వాలి. ఒకవేళ ఈ ఒక్క విషయంలో మాత్రమే అయితే.. బాల్యం నుంచీ తండ్రి చూపిన ప్రేమ, ఆప్యాయతలను ఆమెకు గుర్తు చేయాలి. తన కోసం తండ్రి పడిన కష్టాన్ని తెలియపర్చాలి. తద్వారా తండ్రిపై ఆమె అభిప్రాయం మారే అవకాశం ఉంది. అలాగే, వ్యాపార పనులకు కొన్నిరోజులు దూరంగా ఉండమని చెప్పండి. ఆమెను విహారయాత్రకు తీసుకెళ్లమని భర్తకు సలహా ఇవ్వండి. దీనివల్ల ఆలూమగల మధ్య మానసిక సామీప్యం పెరుగుతుంది. అయినా, ఆమెలో మార్పు రాకపోతే కౌన్సెలింగ్‌కు తీసుకెళ్లడం మంచిది.

సహానా రబీంద్రనాథ్‌
లైఫ్‌ కోచ్‌ అండ్‌ థెరపిస్ట్‌ SWITCH NOV
హైదరాబాద్‌

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి