KU | ఉద్యోగార్థులు, పారిశ్రామికవేత్తలుగా ఎదగాలి : కేయూ వీసీ ప్రతాప్‌రెడ్డి

కాకతీయ యూనివర్సిటీ విద్యార్థులు ఉద్యోగాన్వేషకుల నుంచి ఉద్యోగార్థులుగా, పారిశ్రామికవేత్తలుగా, ఇన్నోవేటర్లుగా ఎదగాలని కేయూ వీసీ ప్రొఫెసర్‌ కర్నాటి ప్రతాప్‌రెడ్డి అన్నారు.

హనుమకొండ చౌరస్తా, ఫిబ్రవరి 6 : కాకతీయ యూనివర్సిటీ విద్యార్థులు ఉద్యోగాన్వేషకుల నుంచి ఉద్యోగార్థులుగా, పారిశ్రామికవేత్తలుగా, ఇన్నోవేటర్లుగా ఎదగాలని కేయూ వీసీ ప్రొఫెసర్‌ కర్నాటి ప్రతాప్‌రెడ్డి అన్నారు. కేయూ-హైదరాబాద్‌ టీహబ్‌ సంయుక్త నిర్వహణలో విశ్వవిద్యాలయ ఆడిటోరియంలో ‘ఓరియంటేషన్‌ సెషన్‌’లో ఆయన ముఖ్యఅతిథిగా పాల్గొని ప్రసంగించారు. విద్యార్థుల లక్ష్యసాధనకు టీహబ్‌, కేహబ్‌లు శిక్షణ, అభివృద్ధి కార్యక్రమాలను చేపడుతున్నాయని, ఇందుకు సంబంధించిన అవగాహన ఒప్పందాలు కూడా కుదుర్చుకున్నట్లు తెలిపారు.

రానున్న రెండేళ్లలో విద్యార్థులు ఏ స్థానంలో ఉండాలి, తదనుగుణంగా వారి ఆలోచనలు ఎలా ఉండాలనే అంశాలపై దృష్టి సారిస్తూ, ఇన్నోవేషన్‌ ఇంక్యుబేషన్‌, స్టార్ట్‍అప్స్​‍ స్థాపనకు టీహబ్‌, కేహబ్‌లు సమగ్ర శిక్షణ అందించనున్నట్లు చెప్పారు. ప్రతి ఒక్కవిద్యార్ధి ప్రారంభంలో సాధారణ వ్యక్తులుగానే ఉంటారని కానీ వారి లక్ష్యాలు, నిబద్ధత, అంకితభావమే వారిని అసాధారణ వ్యక్తులుగా మారుస్తుంద, గ్రామీణ-పట్టణ, ధనిక-పేద అనే భేదాలు ఎలాంటి అడ్డంకులు కావని స్పష్టం చేశారు.

ఇన్నోవేటర్లు, పారిశ్రామికవేత్తలుగా విద్యార్థులను తీర్చిదిద్దడమే ప్రధాన లక్ష్యంగా, వారిని భవిష్యత్తులో ఉద్యోగదాతలుగా మార్చేదిశగా ఈ కార్యక్రమం రూపుదిద్దుకుందని తెలిపారు. రిజిస్ట్రార్‌ ప్రొఫెసర్‌ వల్లూరి రామచంద్రం మాట్లాడుతూ నూతన ఆలోచనలను ఆచరణలోకి తీసుకురావడం, సాంకేతిక పరిజ్ఞానంతో సమస్యలను విశ్లేషించడం, వాటికి స్థిరమైన వ్యాపార పరిష్కారాలు రూపొందించడమే ఈ కార్యక్రమం ఉద్దేశ్యమని, విద్యార్థుల్లో నాయకత్వ లక్షణాలు, సృజనాత్మక ఆలోచన శక్తి, వ్యాపార నైపుణ్యాలను పెంపొందించడంపై ప్రత్యేక దృష్టి సారిస్తున్నట్లు వెల్లడించారు.