ముగిసిన తొలివిడత నామినేషన్లు

ఉమ్మడి వరంగల్‌ జిల్లాలో శనివారంతో తొలివిడత గ్రామ పంచాయతీ ఎన్నికల నామినేషన్ల పర్వం ముగిసింది. అయితే సాయం త్రం ఐదు గంటలకే నామినేషన్ల ప్రక్రియ ముగియనుండగా ఆ సమయానికే అభ్యర్థులు భారీగా తరలివచ్చి క్యూలో నిల్చున్నారు.

• అష్టమి, నవమిలతో ఆలస్యంగా కేంద్రాలకు..
• రాత్రి పొద్దుపోయే వరకు అభ్యర్థుల బారులు
• నేటి నుంచి రెండో విడత ప్రారంభం

నమస్తే తెలంగాణ నెట్‌వర్క్‌, నవంబర్‌ 29 : ఉమ్మడి వరంగల్‌ జిల్లాలో శనివారంతో తొలివిడత గ్రామ పంచాయతీ ఎన్నికల నామినేషన్ల పర్వం ముగిసింది. అయితే సాయం త్రం ఐదు గంటలకే నామినేషన్ల ప్రక్రియ ముగియనుండగా ఆ సమయానికే అభ్యర్థులు భారీగా తరలివచ్చి క్యూలో నిల్చున్నారు. శుక్ర, శనివారాల్లో అష్ట మి, నవమి తిథులు కావడంతో అనేక మంది అభ్యర్థులు శుభ ముహుర్తాలు చూసుకొని నామినేషన్లు దాఖలు చేయడానికి కేంద్రాలకు వచ్చారు. సెంటిమెంట్‌, శుభ తిధులతో కలిసి అభ్యర్థులు కటుంబ సభ్యులు, అనుచరులతో భారీగా హాజరయ్యారు.

దీంతో నామినేషన్‌ కేంద్రాల వద్ద రద్దీ కొనసాగింది. సాయంత్రం 5 గంటల లోపు క్యూలో ఉన్న అభ్యర్థులకు అధికారులు టోకెన్లు ఇచ్చి నామినేషన్లు వేసేందుకు అవకాశం కల్పించారు. ఒక్కొక్క క్లస్టర్‌లో వం దల సంఖ్యలో క్యూలైన్‌లో నిలబడడంతో రాత్రి పొద్దుపోయే వరకు అధికారులు నామినేషన్లు స్వీకరించారు. కాగా, మీ సేవ కేంద్రాల్లో సర్వర్‌ సమస్య తలెత్తడంతో అభ్యర్థులు తీవ్ర ఇబ్బందులు ఎదుర్కొన్నారు. నామినేషన్‌కు అవసరమైన సర్టిఫికెట్లు, బిల్లు లు, రశీదులు పొందడంలో ఆలస్యం చోటు చేసుకోవడంతో పలు చోట్ల ఆగ్రహం వ్యక్తం చేశారు.

నేటి నుంచి రెండో విడత..

ఉమ్మడి జిల్లాలో ఆదివారం నుంచి రెండో విడత గ్రామ పంచాయతీ ఎన్నికల నామినేషన్ల ప్రక్రియ ప్రారంభం కానుంది. ఇందుకోసం అధికార యం త్రాంగం అవసరమైన అన్ని ఏర్పాట్లు పూర్తిచేసింది. వరంగల్‌ జిల్లాలోని దుగ్గొండి మండలంలో 34 జీపీలు, 282 వార్డులు, గీసుగొండలో 21 జీపీలు, 188 వార్డులు, నల్లబెల్లిలో 29 జీపీలు, 252 వార్డు లు, సంగెంలో 33 జీపీలు, 286 వార్డులు, మొత్తం 117 జీపీలు, 1008 వార్డు స్థానాలకు నామినేషన్లు స్వీకరించేందుకు అధికారయంత్రాంగం 35 నామినేషన్‌ (క్లస్టర్లను) కేంద్రాలను ఏర్పాటు చేసింది. హనుమకొండ జిల్లాలోని ధర్మసాగర్‌ మండలంలో 19 జీపీలు, 186 వార్డులు, హసన్‌పర్తిలో 15 జీపీ లు, 138 వార్డు, ఐనవోలులో 17 జీపీలు, 170 వా ర్డులు, వేలేరులో 12 జీపీలు, 106 వార్డులు, పరకాల మండలంలో 10 జీపీలు, 94 వార్డులకు నామినేషన్లు స్వీకరించనున్నారు.

జనగామ జిల్లాలోని జనగామ మండలంలో 21జీపీలు, 198 వార్డులు, నర్మెటలో 17 జీపీలు, 148 వార్డులు, తరిగొలప్పులలో 15 జీపీలు, 126 వార్డులు, బచ్చన్నపేటలో 26 జీపీ లు, 238 వార్డులు, మహబూబాబాద్‌ జిల్లాలోని బయ్యారంలో 29 జీపీలు, 252 వార్డులు, చిన్నగూడూరులో 11 జీపీలు, 96 వార్డులు, దంతాలపల్లిలో 18 జీపీలు, 166 వార్డులు, గార్లలో 20 జీపీలు, 184 వార్డులు, నర్సింహులపేటలో 23 జీపీలు, 194 వార్డులు, పెద్ద వంగరలో 26 జీపీలు, 192 వార్డులు, తొర్రూరు మండలంలోని 31 జీపీలు, 276 వార్డులకు నామినేషన్లు స్వీకరించనున్నారు. ములుగు జిల్లాలోని ములుగు మండలంలోని 19 జీపీలు, 172 వార్డులు, వెంకటాపూర్‌లోని 23 జీపీలు, 200 వార్డులు, మల్లంపల్లిలో 10 జీపీలు, 90 వార్డులు, భూపాలపల్లి జిల్లాలోని చిట్యాల, టేకుమట్ల, భూపాలపల్లి, పలిమెల మండలాల్లో రెండో విడత నామినేషన్లు స్వీకరించనున్నారు.

ఓటర్లు కాదు.. అభ్యర్థులు!

స్టేషన్‌ఘన్‌పూర్‌, నవంబర్‌ 29 : ఈ ఫొటోలో క్యూలో ఉన్న వారంతా ఓటర్లు అనుకుంటున్నారా? అయితే మీరు తప్పులో కాలేసినట్లే.. వీరంతా పంచాయతీ ఎన్నికల్లో పోటీ చేసేందుకు నామినేషన్‌ సమర్పించడానికి వచ్చిన అభ్యర్థులు. మొదటి విడత ఎన్నికలకు శనివారం చివరి రోజు కావడం, శుక్ర, శనివారాల్లో అష్ట, నవమి తిథులుండడంతో చాలా మంది నామినేషన్‌ వేయలేదు. దీనికి తోడు కుల ధ్రువీకరణ పత్రాలు తీసుకుందామంటే మీ సేవ సర్వర్‌ మొరాయించడం, బ్యాంకు ఖాతా తెరవడం, ఇంటి పన్ను చెల్లించడం, ప్రతిపాదిత వ్యక్తుల ప్రతాలు సమకూర్చుకున్నారు. శనివారం సాయంత్రం 4 గంటలకు నవమి ఘడియలు దాటి దశమి రావడంతో ఒక్కసారిగా అభ్యర్థులు నామినేషన్‌ కేంద్రాలకు చేరుకొని ఇలా బారులు తీరారు. కాగా, అభ్యర్థులు అధిక సంఖ్యలో తరలిరావడంతో అధికారులు కొన్ని చోట్ల అర్ధరాత్రి వరకు కూడా నామినేషన్లు స్వీకరించారు.