Rahul Dravid: వ‌ర‌ల్డ్ క‌ప్ ముందుంది.. మార్పులు మంచివి కావు.. ద్రావిడ్ కాంట్రాక్ట్ పొడిగింపుపైపై గంభీర్ కామెంట్స్

Rahul Dravid: రాహుల్ ద్రావిడ్ కాంట్రాక్టును పొడిగిస్తూ భార‌త క్రికెట్ నియంత్ర‌ణ మండ‌లి (బీసీసీఐ) తీసుకున్న నిర్ణ‌యంపై భార‌త మాజీ క్రికెట‌ర్ గౌతం గంభీర్ స్పందించాడు.

Rahul Dravid: టీమిండియా హెడ్‌కోచ్ రాహుల్ ద్రావిడ్ కాంట్రాక్టును పొడిగిస్తూ భార‌త క్రికెట్ నియంత్ర‌ణ మండ‌లి (బీసీసీఐ) తీసుకున్న నిర్ణ‌యంపై భార‌త మాజీ క్రికెట‌ర్ గౌతం గంభీర్ స్పందించాడు. వ‌న్డే వ‌ర‌ల్డ్ కప్‌లో భార‌త్‌ను దిగ్విజ‌యంగా న‌డిపిన ద్రావిడ్‌తో పాటు కోచింగ్ స్టాఫ్ కాంట్రాక్టును పొడిగించ‌డం స‌రైన నిర్ణ‌య‌మేన‌ని అన్నాడు. వ‌చ్చే ఏడాది టీ20 వ‌ర‌ల్డ్ క‌ప్ ఉన్న నేప‌థ్యంలో మార్పులు చేర్పులు చేయ‌డం కూడా మంచిదికాద‌ని తెలిపాడు.

ద్రావిడ్ కాంట్రాక్టును పున‌రుద్ధ‌రించిన త‌ర్వాత గంభీర్ స్పందిస్తూ… “టీ20 వ‌ర‌ల్డ్ క‌ప్ ముందుంది. దానికి మ‌రో ఏడు నెల‌ల స‌మ‌య‌మే ఉంది. ఈ స‌మ‌యంలో కోచింగ్‌, స‌పోర్ట్ స్టాఫ్‌లో ఎలాంటి మార్పులు చేయ‌కూడ‌దు. ఇంకో మంచి విష‌యం ఏంటంటే ఈ ప్ర‌తిపాద‌న‌ను ద్రావిడ్ ఆమోదించ‌డం. టీమిండియా ఇదే ఆధిక్యాన్ని భ‌విష్య‌త్‌లో కూడా చాటుతుంద‌ని నేను ఆశిస్తున్నా. వ‌న్డేలు, టెస్టుల‌తో పోల్చితే టీ20 అనేది చాలా విభిన్న‌మైన ఫార్మాట్‌. ఈ ఫార్మాట్‌లో స‌వాళ్లు అధికంగా ఉంటాయి..” అని చెప్పాడు.

 

#WATCH | On extension for Rahul Dravid as head coach of Team India, former cricketer Gautam Gambhir says,” It’s a good thing because the T20 World Cup is around the corner and you don’t want to change the entire support staff, and it is good that Rahul has accepted it..… pic.twitter.com/R3DAcpOJNg

— ANI (@ANI) November 29, 2023

ద్రావిడ్ హెడ్‌కోచ్‌గా బాధ్య‌త‌లు తీసుకున్న త‌ర్వాత భార‌త్ వ‌రుస‌గా మూడు ఐసీసీ టోర్నీలు ఆడింది. 2022లో టీ20 ప్ర‌పంచ‌క‌ప్ ఆడిన భార‌త్ సెమీస్ చేర‌గా ఈ ఏడాది వ‌ర‌ల్డ్ టెస్ట్ ఛాంపియ‌న్‌షిప్ (డ‌బ్ల్యూటీసీ) ఫైన‌ల్ చేరింది. కొద్దిరోజుల క్రిత‌మే వ‌న్డే వ‌ర‌ల్డ్ క‌ప్ ఫైన‌ల్ దాకా వెళ్లి ర‌న్న‌ర‌ప్‌తో స‌రిపెట్టుకుంది. వ‌న్డే ప్ర‌పంచ‌క‌ప్‌లో భార‌త్ వ‌రుస‌గా ప‌ది మ్యాచ్‌ల‌లో విజ‌యాలు సాధించిన విషయం తెలిసిందే.