IND vs ENG: ఇంగ్లండ్తో జరుగుతున్న ఐదు టెస్టుల సిరీస్లో భాగంగా మిగిలిన మూడు మ్యాచ్లకు బీసీసీఐ కొద్దిసేపటి క్రితమే జట్టును ప్రకటించింది. అయితే ఇందులో అందరూ ఊహించినట్టుగానే విరాట్ కోహ్లీ అందుబాటులో లేకపోవడంతో పాటు కెఎల్ రాహుల్, రవీంద్ర జడేజా రీఎంట్రీలు ఇచ్చారు. కానీ టీమిండియా మిడిలార్డర్ బ్యాటర్ శ్రేయస్ అయ్యర్ను మాత్రం జట్టు నుంచి తప్పించారు. గత రెండ్రోజులుగా అయ్యర్కు వెన్నునొప్పి తిరగబెట్టిందని, అతడు మిగిలిన సిరీస్కు అందుబాటులో ఉండడని వార్తలు వస్తున్నా బీసీసీఐ మాత్రం ఆ విషయంలో స్పష్టతనివ్వలేదు. అయ్యర్ను జట్టులో చేర్చని సెలక్టర్లు.. అతడికి గాయమైనట్టు గానీ, ఫామ్ లేమితో తప్పించామని గానీ ప్రకటించలేదు. మరి అయ్యర్ను ఎందుకు తీసేసినట్టు..? అన్నది చర్చనీయాంశంగా మారింది.
గతేడాది ఐపీఎల్ సీజన్కు ముందు వెన్ను నొప్పితో దూరమై ఆసియా కప్ నాటికి తిరిగి జట్టులో చేరిన శ్రేయస్.. వన్డే వరల్డ్ కప్లో కూడా రాణించాడు. కానీ తర్వాత మాత్రం అతడు వరుసగా విఫలమవుతున్నాడు. దక్షిణాఫ్రికా టూర్తో పాటు స్వదేశంలో ఇంగ్లండ్తో జరిగిన హైదరాబాద్, వైజాగ్ టెస్టులలో అతడి వైఫల్యం కొనసాగింది. తొలి టెస్టులో రెండు ఇన్నింగ్స్లలోనూ 35, 13 పరుగులు చేసిన అయ్యర్.. వైజాగ్ టెస్టులో 27, 19 పరుగులకే ఔట్ అయ్యాడు.
Shreyas Iyer has been dropped from the Indian Test team. [Sports Tak] pic.twitter.com/1Vtzyf89kt
— Johns. (@CricCrazyJohns) February 10, 2024
స్పిన్ ఆడటంలో దిట్ట అయిన అయ్యర్.. ఇంగ్లండ్తో సిరీస్లో మాత్రం విఫలమవుతున్నాడు. బ్యాటింగ్కు అనుకూలించిన నిర్జీవమైన వైజాగ్ పిచ్లో కూడా అయ్యర్ విఫలమయ్యాడు. రెండో టెస్టు జరుగుతున్న క్రమంలో అయ్యర్తో ద్రావిడ్ సుదీర్ఘంగా చర్చించినప్పుడే అతడి ప్లేస్ ప్రమాదంలో ఉన్నట్టు వాదనలు వచ్చాయి. వరుసగా అవకాశాలిచ్చినా విఫలమవుతున్న అయ్యర్ను తాజాగా మూడు టెస్టుల సభ్యులలో చేర్చకపోవడంతో అతడికి నిజంగానే గాయమైందా..? లేక గాయం సాకుతో వేటు వేశారా..? అన్న అనుమానాలు వెల్లువెత్తుతున్నాయి. అయ్యర్కు రిప్లేస్మెంట్గా కూడా సెలక్టర్లు స్పెషలిస్టు బ్యాటర్ను జట్టులోకి ఎంపికచేయలేదు. అయ్యర్ను ఎంపికచేయని సెలక్టర్లు అంతగా పేసర్ల అవసరం లేని ఈ సిరీస్లో మరో పేసర్ ఆకాశ్ దీప్ను చేర్చారు. కెఎల్ రాహుల్, జడేజాలు తిరిగి జట్టులోకి వచ్చినా వాళ్లు రాజ్కోట్ టెస్టులో ఆడతారా..? లేదా..? అన్నది అనుమానమే. ఈ నేపథ్యంలో అయ్యర్ స్థానాన్ని ఎవరు భర్తీ చేస్తారు..? అన్నది ఇప్పుడు టీమిండియా అభిమానులను వేధిస్తున్న ప్రశ్న.