Telangana | రోడ్లకు నిధులు తక్కువ వసూళ్లు ఎక్కువ.. రాష్ట్రంలో ఎన్‌హెచ్‌ల అభివృద్ధికి కేంద్రం ఖర్చు చేసింది రూ.20 వేల కోట్లే

రాష్ట్రంలో జాతీయ రహదారుల అభివృద్ధికి మోదీ సర్కారు ఇచ్చింది శూన్యమనే చెప్పవచ్చు. తెలంగాణకు తొమ్మిదేండ్లలో రూ.1.25 లక్షల కోట్ల విలువైన జాతీయ రహదారులు మంజూరు చేసిన కేంద్రం.. ఖర్చు చేసింది మాత్రం రూ.20 వేల కోట్లే. ఇదే సమయంలో రాష్ట్రంలోని వాహనదారుల నుంచి టోల్‌ రూపంలో రూ.9 వేల కోట్లకుపైగా వసూలు చేసింది.

• దీని కంటే టోల్‌, రోడ్‌ సెస్సే అధికం
• రూ.1.25 లక్షల కోట్లు ఇచ్చినట్టు గొప్పలు చెప్తున్న మోదీ సర్కారు

Telangana | హైదరాబాద్‌, మే 11 (నమస్తే తెలంగాణ): రాష్ట్రంలో జాతీయ రహదారుల అభివృద్ధికి మోదీ సర్కారు ఇచ్చింది శూన్యమనే చెప్పవచ్చు. తెలంగాణకు తొమ్మిదేండ్లలో రూ.1.25 లక్షల కోట్ల విలువైన జాతీయ రహదారులు మంజూరు చేసిన కేంద్రం.. ఖర్చు చేసింది మాత్రం రూ.20 వేల కోట్లే. ఇదే సమయంలో రాష్ట్రంలోని వాహనదారుల నుంచి టోల్‌ రూపంలో రూ.9 వేల కోట్లకుపైగా వసూలు చేసింది. పెట్రోలు, డీజిల్‌ అమ్మకాల ద్వారా వసూలు చేసిన రోడ్డు సెస్సు దీనికి అదనం. కొత్త జాతీయ రహదారుల ఏర్పాటు, రాష్ట్ర రహదారులను జాతీయ రహదారులుగా అప్‌గ్రేడ్‌ చేయడం లాంటి పనులను కేంద్ర రోడ్డు రవాణా, రహదారుల మంత్రిత్వశాఖ చేపడుతుంది. గతంలో కేసీఆర్‌ ప్రభుత్వం తెలంగాణలో ప్రధాన ప్రాంతాలను కలిపే 14 స్టేట్‌ రోడ్లను జాతీయ రహదారులుగా గుర్తించి, నాలుగు లేన్లుగా అభివృద్ధి చేయాలని ప్రతిపాదనలు, డీపీఆర్‌ సమర్పించింది. మోదీ సర్కారు అవసరమనుకున్న రహదారులకే అనుమతులు మంజూరు చేసింది. తొమ్మిదేండ్లలో రూ.1.25 లక్షల కోట్ల విలువైన పనులు మంజూరు చేసి, అందులో రూ.20 వేల కోట్లు మాత్రమే ఖర్చు చేయడం తెలంగాణ పట్ల మోదీ సర్కారు వివక్షను స్పష్టం చేస్తున్నది.

కేంద్రం ఖజానా నుంచి ఇచ్చేది శూన్యం

వాస్తవానికి కేంద్రం జాతీయ రహదారుల అభివృద్ధికి తమ ఖజానా నుంచి ఖర్చుచేసేది శూన్యమే. రోడ్ల నిర్మాణ పనులు నిర్వహించే ఏజెన్సీలే టోల్‌ ట్యాక్స్‌ రూపంలో వాహనదారుల నుంచి సొమ్ము వసూలు చేసుకుంటాయి. కేంద్రం రోడ్‌ సెస్సు రూపంలో పెట్రోల్‌, డీజిల్‌పై ప్రతి లీటర్‌కు రూ.30 చొప్పున ఏటా రాష్ట్రం నుంచి రూ.వేల కోట్లు వసూలు చేస్తున్నది. రాష్ర్టాల నుంచి సాలీనా రూ.5 లక్షల కోట్లు పిండుకుంటున్నది. దీన్నిబట్టే కేంద్రం తెలంగాణ నుంచి ఎన్ని నిధులు వసూలు చేసిందో, రాష్ట్రంలో రహదారుల అభివృద్ధికి ఎంతిచ్చిందో అర్థం చేసుకోవచ్చు.

జాతీయ రహదాల అభివృద్ధి వివరాలు

• ప్రస్తుతం రాష్ట్రంలో 30 జాతీయ రహదారులు 4,983 కిలోమీటర్ల మేర విస్తరించి ఉన్నాయి. వీటిలో 2,682 కి.మీ. రోడ్లు కేంద్రం నియంత్రణలో, 2,301 కి.మీ. ఆర్‌అండ్‌బీ నియంత్రణలో ఉన్నాయి.
• గత తొమ్మిదేండ్లలో తెలంగాణకు కేంద్ర రోడ్డు రవాణా, రహదారుల మంత్రిత్వశాఖ రూ.1,21,862 కోట్ల విలువైన 113 ప్రాజెక్టులను మంజూరు చేసింది.
• వీటిలో రూ.22,492 కోట్ల విలువైన 87 ప్రాజెక్టులు రాష్ట్ర ఆర్‌అండ్‌బీ పరిధిలో, రూ.99,370 కోట్ల విలువైన 26 ప్రాజెక్టులు ఎన్‌హెచ్‌ఏఐ పరిధిలో ఉన్నాయి.
• ఇవికాకుండా సీఆర్‌ఐఎఫ్‌ కింద కేంద్రం తొమ్మిదేండ్లలో తెలంగాణకు రూ.3,314 కోట్ల విలువైన 245 పనులు మంజూరు చేసింది. ఖర్చు రూ.2,021 కోట్లే.
• రాష్ట్ర ఆర్‌అండ్‌బీ పరిధిలోని జాతీయ రహదారులు, కేంద్రం పరిధిలోని జాతీయ రహదారులు, సీఆర్‌ఐఎఫ్‌ నిధులు కలిపి తొమ్మిదేండ్లలో తెలంగాణకు రూ.1.25 లక్షల కోట్లు మంజూరు చేసిన కేంద్రం.. అందులో రూ.20,351 కోట్లు మాత్రమే విడుదల చేసింది.
• సీఆర్‌ఐఎఫ్‌ కింద చేపట్టే పనులకు కేంద్రం మంజూరు చేసిన నిధుల కంటే రాష్ట్ర ప్రభుత్వం అధికంగా నిధులు ఖర్చు చేస్తుండటం గమనార్హం. సీఆర్‌ఐఎఫ్‌ నిధుల కోటా పెంచాలని కేసీఆర్‌ కేంద్రానికి విజ్ఞప్తి చేసినా ఫలితం లేకపోయింది.
• రాష్ట్రంలోని 1,612 కిలోమీటర్ల రోడ్లపై 32 టోల్‌ప్లాజాల ద్వారా కేంద్రం రూ.9 వేల కోట్లు వసూలు చేసింది.
• రాష్ట్రంలో జాతీయ రహదారుల అభివృద్ధికి కేంద్రం ఖర్చు చేసిన రూ.20,351 కోట్ల నుంచి రూ.9 వేల కోట్ల టోల్‌ వసూళ్లను మినహాయిస్తే మోదీ సర్కారు రూ.11,351 కోట్లు మాత్రమే వెచ్చించినట్టు లెక్క. రాష్ట్రంలో వసూలు చేసిన రోడ్‌ సెస్సును కూడా మినహాయిస్తే తెలంగాణలో రహదారుల అభివృద్ధికి కేంద్రం చేసిన ఖర్చు శూన్యమనే చెప్పవచ్చు.