Visit:
జూలూరుపాడు, మార్చి 02 : భద్రాద్రి కొత్తగూడెం జిల్లా జూలూరుపాడు మండలం పెద్ద హరిజన వాడ గ్రామస్తులు భక్తిభావంతో రామనామ స్మరణతో భద్రాచలం వైపు తమ పవిత్ర పాదయాత్రను సోమవారం ప్రారంభించారు. భక్తులు గత నెల రోజులుగా అత్యంత నియమ నిష్టలతో, కఠిన ఉపవాసాలతో సిద్ధం చేసుకున్న ‘వలసిన గోటి తలంబ్రాలను’ భద్రాచలం శ్రీ సీతారామచంద్రస్వామి దేవాలయంలో సమర్పించనున్నారు. గ్రామానికి చెందిన భక్తులు సంప్రదాయక నారింజ, పసుపు రంగు దుస్తులు ధరించి, నారింజ రంగు దేవుని జెండాలతో గ్రామం నుండి బయల్దేరారు.
చేతితో (గోటితో) వలిచిన బియ్యంతో చేసిన తలంబ్రాలను అత్యంత పవిత్రంగా భావిస్తారు. ఈ తలంబ్రాలను సిద్ధం చేయడానికి గ్రామస్తులు గత నెల రోజుల పాటు భక్తిశ్రద్ధలతో కఠిన నియమాలను పాటించి శ్రమించారు. తమ శ్రమను, భక్తిని భగవంతునికి సమర్పించే ఈ కార్యక్రమం గ్రామంలో ఒక పవిత్రమైన పండుగ వాతావరణాన్ని నెలకొల్పింది. తమ గ్రామం నుండి బయల్దేరిన భక్తులకు గ్రామ పెద్దలు, ఇతర గ్రామస్తులు ఘనంగా వీడ్కోలు పలికారు. పెద్ద హరిజనవాడ నుండి భద్రాచలం వరకు సాగే ఈ సుదీర్ఘ పాదయాత్ర గ్రామస్తుల గాఢమైన భక్తికి, సంప్రదాయాల పట్ల వారికి ఉన్న గౌరవానికి నిదర్శనం. భగవంతుని ఆశీస్సులతో తమ పాదయాత్ర విజయవంతంగా సాగి సీతారాముల దర్శనం, తలంబ్రాల సమర్పణ సజావుగా సాగాలని గ్రామస్తులు ఆకాంక్షిస్తున్నారు.
