Steve Smith | ఆధునిక క్రికెట్ దిగ్గజాలలో ఒకడిగా గుర్తింపు పొందిన స్టీవ్ స్మిత్ కథ ముగిసినట్టేనా? కెరీర్ చరమాంకంలో ఉన్న స్మిత్ భారత్ వేదికగా జరుగుతున్న వన్డే వరల్డ్ కప్లో స్థాయికి తగ్గట్టుగా ఆడటంలో విఫలమవుతున్నాడు. టెస్టులలో నిలకడగా ఆడుతున్న ఈ మాజీ ఆసీస్ సారథి వన్డేలలో మాత్రం ఆ మ్యాజిక్ రిపీట్ చేయలేకపోతున్నాడు. ఈ మెగా టోర్నీలో స్మిత్.. నాలుగు మ్యాచ్లు ఆడి విఫలమయ్యాడు. గత నాలుగు మ్యాచ్లలో స్మిత్ స్కోర్లు.. 46, 19, 0, 7గా ఉన్నాయి. పాకిస్తాన్తో మ్యాచ్లో స్మిత్ ఏడు పరుగులే చేసి ఔట్ అవడంతో స్టార్ బ్యాటర్ కథ ముగిసినట్టేనని విశ్లేషణలు వినిపిస్తున్నాయి.
తన సుదీర్ఘ కెరీర్లో శతాధిక టెస్టులు ఆడిన స్మిత్.. 9,320 పరుగులు చేశాడు. కానీ వన్డేలతలో మాత్రం 148 మ్యాచ్లు ఆడి 5,119 పరుగులు సాధించాడు. టీ20లలో అయితే స్మిత్ను కంగారూ టీమ్ ఎప్పుడో పక్కనబెట్టేసింది. ఈ వన్డే వరల్డ్ కప్ కు ముందు యాషెస్ సిరీస్లో ఫర్వాలేదనిపించిన స్మిత్.. ఇదే ఏడాది మార్చిలో భారత్ వేదికగా జరిగిన మూడు వన్డేల సిరీస్లో కూడా విఫలమయ్యాడు. ఆ సిరీస్లో 22 పరుగులే చేసిన స్మిత్.. సెప్టెంబర్లో ముగిసిన సిరీస్లో ఫర్వాలేదనిపించాడు. ఆ సిరీస్ లో 41, 0, 74 పరుగులతో రాణించడంతో స్మిత్ మళ్లీ ఫామ్లోకి వచ్చినట్టే అనిపించింది.
Steven Smith in White ball ICC Tournaments other than ODI WC 2015
Innings – 34
Not Out- 7
Runs – 777
Average – 28.6
RPI – 22.8
50+ scores – 5 pic.twitter.com/06d8QcDT2z— Virarsh (@Cheeku218) October 20, 2023
కానీ తాజాగా అతడు మళ్లీ తడబడుతున్నాడు. చెన్నైలో భారత్ తో జరిగిన మ్యాచ్లో 46 పరుగులు చేసిన స్మిత్.. తర్వాత సఫారీలతో మ్యాచ్లో 19 పరుగులే చేయగలిగాడు. శ్రీలంకతో మ్యాచ్లో డకౌట్ అయిన స్మిత్.. తాజాగా పాకిస్తాన్తో ఏడు పరుగులకే నిష్క్రమించాడు. గత పది వన్డేలలో స్మిత్ చేసింది ఒక్కటంటే ఒక్కటే అర్థ సెంచరీ. వన్డేలలో స్మిత్ సెంచరీ చేసి ఏడాది దాటింది.
వన్డేవరల్డ్ కప్లో తొలుత వరుసగా రెండు మ్యాచ్లు ఆడిన ఆసీస్.. తర్వాత లంకతో నెగ్గినా స్మిత్ మాత్రం అదే మూడ్లో ఉన్నాడు. ఒకప్పుడు క్రీజులోకి వస్తే పాదరసంలా కదులుతూ వికెట్ల మధ్య పరిగెత్తే స్మిత్లో ప్రస్తుతం ఆ జోరు కనిపించడం లేదు. గతంలో పూర్తి ఆత్మవిశ్వాసంతో బ్యాటింగ్ చేసే స్మిత్ కళ్లల్లో ఇప్పుడు నిరాశ, నిస్పృహలు కొట్టొచ్చినట్టు కనిపిస్తున్నాయి. ఈ ఏడాది వన్డేలలో 9 ఇన్నింగ్స్ ఆడిన స్మిత్.. 23.22 సగటుతో 209 పరుగులు మాత్రమే చేయగలిగాడు. ఇందులో ఒక అర్థ సెంచరీ మాత్రమే ఉండగా మూడుసార్లు డకౌట్ అయ్యాడు. యువ ఆటగాళ్లు అవకాశాల కోసం ఎదురుచూస్తున్న తరుణంలో స్మిత్ ఇదే ఆట కొనసాగిస్తే మరో రెండేళ్లు అయినా ఆడాల్సిన అతడి వన్డే కెరీర్ వరల్డ్ కప్ తర్వాత ముగిసినా ఆశ్చర్యపోవాల్సిందేమీ లేదని క్రికెట్ విశ్లేషకులు అభిప్రాయపడుతున్నారు.