ఇక సెక‌నులో క‌రోనా ప‌రీక్ష‌లు.. త్వ‌ర‌లో అందుబాటులోకి పోర్ట‌బుల్ కిట్‌

కరోనా ప‌రీక్ష‌ల‌ను ఇక‌పై సెకన్‌లో పూర్తిచేయ‌వ‌చ్చు. కరోనా వైరస్ ఇన్వెస్టిగేష‌న్‌ ప్రక్రియను వేగవంతం చేయడంలో పరిశోధకులు గొప్ప విజయాన్ని సాధించారు. వీరు కొత్త పోర్టబుల్ కొవిడ్-19 పరీక్ష కిట్‌ను అందుబాటులోకి తెచ్చారు.

May 20, 2021 / 09:58 PM IST

ఇక సెక‌నులో క‌రోనా ప‌రీక్ష‌లు.. త్వ‌ర‌లో అందుబాటులోకి పోర్ట‌బుల్ కిట్‌

వాషింగ్టన్ : కరోనా ప‌రీక్ష‌ల‌ను ఇక‌పై సెకన్‌లో పూర్తిచేయ‌వ‌చ్చు. కరోనా వైరస్ ఇన్వెస్టిగేష‌న్‌ ప్రక్రియను వేగవంతం చేయడంలో పరిశోధకులు గొప్ప విజయాన్ని సాధించారు. వీరు కొత్త పోర్టబుల్ కొవిడ్-19 పరీక్ష కిట్‌ను అందుబాటులోకి తెచ్చారు. దీని ద్వారా కేవ‌లంసెక‌న్‌లోనే కరోనా వైర‌స్‌ను నిర్ధారించే ప‌రీక్ష‌లు జ‌రిపేందుకు వీలుంటుంద‌ని ప‌రిశోధ‌కులు తెలిపారు. ఇందుకోసం సెన్సార్ వ్యవస్థను అభివృద్ధి చేశారు. దీని సహాయంతో కరోనాకు కారణమయ్యే సార్స్‌-కొవ్‌-2 వైరస్‌ను సెకనులోనే గుర్తించవచ్చు. ఇప్పటికే ఉన్న పద్ధతులతో పోల్చితే ఇది వేగవంతమైన పరిశోధన పద్ధతిగా వర్ణిస్తున్నారు.

పరిశోధకుల అభిప్రాయం ప్రకారం, ఈ సెన్సార్ మార్కెట్లో ఉన్న గ్లూకోజ్ టెస్ట్ స్ట్రిప్ట్‌తో సమానంగా ఉంటుంది. ఈ సెన్సార్‌తో పాటు చిన్న సైజు మైక్రోఫ్లూయిడ్ ఛానల్ ఉంటుంది. మైక్రోఫ్లూయిడ్ ఛానల్ లోపల కొన్ని ఎలక్ట్రోడ్లు ఉంటాయి. వీటిలో ఒకదానికి బంగారు పూత ఉంటుంది. ద్రవ నమూనాలో కరోనా-సంబంధిత యాంటీబాడీ రసాయన పద్ధతి ద్వారా బంగారు ఉపరితలంపై అంటుకుంటుంది. ఈ విధంగా కరోనా ఇన్వెస్టిగేష‌న్‌కు తీసుకునే సమయాన్ని చాలా వరకు తగ్గించవచ్చు.

ఈ సెన్సార్ సిస్టంను వాక్యూమ్ సైన్స్ అండ్ టెక్నాలజీ బీ జర్నల్‌లో ప్రచురించారు. ఈ ప‌ద్ధ‌తి ద్వారా ఇతర వ్యాధులను కూడా గుర్తించవచ్చు అని ఫ్లోరిడా యూనివ‌ర్సిటీకి చెందిన మింఘాన్ జియాన్ తెలిపారు.