జీ-7 ఆరోగ్య మంత్రుల సమావేశానికి భార‌త్‌కు ఆహ్వానం

వ‌చ్చే నెల 3, 4 తేదీలలో ఆక్స్‌ఫ‌ర్డ్ విశ్వవిద్యాలయంలో జరుగనున్న జీ-7 ఆరోగ్య మంత్రుల సమావేశంలో పాల్గొనేందుకు భారతదేశానికి ఆహ్వానం అందింది.

May 20, 2021 / 09:10 PM IST

జీ-7 ఆరోగ్య మంత్రుల సమావేశానికి భార‌త్‌కు ఆహ్వానం

లండన్ : వ‌చ్చే నెల 3, 4 తేదీలలో ఆక్స్‌ఫ‌ర్డ్ విశ్వవిద్యాలయంలో జరుగనున్న జీ-7 ఆరోగ్య మంత్రుల సమావేశంలో పాల్గొనేందుకు భారతదేశానికి ఆహ్వానం అందింది. ఈ స‌మావేశాన్ని వ‌ర్చువ‌ల్‌గా జ‌రుప‌నున్నారు. ఈ విష‌యాన్నిబ్రిటిష్ ప్ర‌భుత్వం గురువారం స్ప‌ష్టం చేసింది. కొవిడ్-19 కి వ్యతిరేకంగా జ‌రుగుతున్న‌ ప్రపంచ పోరాటంలో తన పాత్ర కోసం ఆక్స్‌ఫ‌ర్డ్ విశ్వవిద్యాలయాన్ని స‌మావేశం నిర్వ‌హ‌ణ కోసం ఎంపిక చేశారు.

ఈ స‌మావేశంలో ప్రపంచ ఆరోగ్య భద్రత, యాంటీ మైక్రోబయల్ రెసిస్టెన్స్, క్లినికల్ ట్రయల్స్, డిజిటల్ హెల్త్ త‌దిత‌ర అంశాల‌పై చర్చించనున్నారు. వారం రోజుల తర్వాత జూన్ 11-13 తేదీల్లో కార్న్‌వాల్‌లో జరుగనున్న జీ-7 నాయకుల శిఖరాగ్ర సమావేశంలో ఇక్క‌డ చ‌ర్చించిన అంశాల‌ను తెలియ‌జేస్తారు. బ్రిట‌న్‌ ప్రెసిడెన్సీ క్రింద ఈ శిఖరాగ్ర సమావేశం జరుగనున్న‌ది.

ఈ బృందంలో బ్రిటన్, కెనడా, ఫ్రాన్స్, జర్మనీ, ఇటలీ, జపాన్, యునైటెడ్ స్టేట్స్, యూరోపియన్ యూనియన్ ఉన్నాయి. ఈ దేశాల ఆరోగ్య మంత్రులు వ్యక్తిగతంగా హాజరవుతారు. జీ-7 ప్రెసిడెన్సీకి ఆహ్వానించబడిన దేశాలతో రెండు రోజుల చర్చల్లో భారత్, దక్షిణ కొరియా, ఆస్ట్రేలియా, దక్షిణాఫ్రికా పాల్గొంటాయని బ్రిటిష్ ప్రభుత్వం తెలిపింది.