Genetic Fossil : 7,200 ఏండ్ల క్రితం మహిళ శరీరంలో డీఎన్‌ఏ గుర్తింపు

Genetic Fossil : జకార్తా : ఇండోనేషియాలో 7,200 సంవత్సరాల క్రితం మరణించిన ఒక మహిళ అవశేషాల్లో పురాతన డీఎన్‌ఏను పురావస్తు శాస్త్రవేత్తలు కనుగొన్నారు. ఇది ప్రారంభ మానవుల వలసల గురించి గతంలో తెలిసిన వాటిని సవాలు చేస్తున్నది...

August 26, 2021 / 05:11 PM IST

Genetic Fossil : 7,200 ఏండ్ల క్రితం మహిళ శరీరంలో డీఎన్‌ఏ గుర్తింపు

జకార్తా : ఇండోనేషియాలో 7,200 సంవత్సరాల క్రితం మరణించిన ఒక మహిళ అవశేషాల్లో (Genetic Fossil) పురాతన డీఎన్‌ఏను పురావస్తు శాస్త్రవేత్తలు కనుగొన్నారు. ఇది ప్రారంభ మానవుల వలసల గురించి గతంలో తెలిసిన వాటిని సవాలు చేస్తున్నది.

బెస్సే అనే మారుపేరు గల యువతికి చెందిన అవశేషాలను ఇండోనేషియా ద్వీపమైన సులావేసిలోని లియాంగ్ పన్నింజ్ గుహలో శాస్త్రవేత్తలు గుర్తించారు. 2015 లో కూడా ఇదే ప్రాంతంలో తవ్వకాలు జరిగాయి. ఈ తవ్వకాల గురించి, అతిపురాతన మహిళకు చెందిన అవశేషాల్లో డీఎన్‌ఏను గుర్తించినట్లు నేచర్ జర్నల్‌లో అధ్యయనం ప్రచురించారు. ప్రాచీన మానవ డీఎన్‌ఏను ఆసియా, ఆస్ట్రేలియా ప్రధాన భూభాగం మధ్య సముద్రంలోని ద్వీపాలు, వాలెసియాలో కనుగొన్నారు.

బెస్సే లోపలి చెవి ఎముక పెట్రస్ భాగం నుంచి డీఎన్‌ఏను సేకరించినట్లు పరిశోధనకు సహ-నాయకత్వం వహించిన గ్రిఫిత్ యూనివర్సిటీకి చెందిన ప్రొఫెసర్ ఆడమ్ బ్రమ్‌ చెప్పారు. చెక్కుచెదరకుండా ఉన్న ఈ డీఎన్‌ఏ చాలా అరుదైనదని ఆయన తెలిపారు.

టెస్టియన్ సంస్కృతికి చెందిన మొట్టమొదటి అస్థిపంజరం కూడా బెస్సేదే. ఇది 1,500-8,000 సంవత్సరాల క్రితం దక్షిణ సులవేసిలో నివసించిన వేటగాళ్ల కుటుంబానికి చెందినదిగా భావిస్తున్నారు. ఖననం చేసే సమయంలో ఆమె వయస్సు 17 నుంచి 18 సంవత్సరాలు ఉంటుందని గుర్తించారు. ఆమె అవశేషాలతో పాటు చరిత్రపూర్వ రాతి ఉపకరణాలు, ఎరుపు రంగు ఓచర్ కనుగొన్నారు. ఆమె సమాధిలో వేటాడిన అడవి జంతువుల ఎముకలు కూడా ఉన్నాయి.