లండ‌న్ మేయ‌ర్‌గా మ‌రోసారి సాదిక్ ఖాన్ ఎన్నిక‌

పాకిస్తాన్ సంతతికి చెందిన 51 ఏండ్ల‌ బ్రిటిష్ పౌరుడు సాదిక్ ఖాన్ రెండోసారి లండన్ మేయర్‌గా ఎన్నికయ్యారు

May 9, 2021 / 09:25 PM IST

లండ‌న్ మేయ‌ర్‌గా మ‌రోసారి సాదిక్ ఖాన్ ఎన్నిక‌

లండ‌న్ : పాకిస్తాన్ సంతతికి చెందిన 51 ఏండ్ల‌ బ్రిటిష్ పౌరుడు సాదిక్ ఖాన్ రెండోసారి లండన్ మేయర్‌గా ఎన్నికయ్యారు. స్థానిక ఎన్నికల్లో పార్టీ నిరాశకు గురైనందున.. సాదిక్ ఖాన్‌ విజయం లేబర్ పార్టీకి కొంత సంతోషాన్ని మిగిల్చింది. ఖాన్ 2016 ఎన్నికల్లో మొదటిసారి గెలిచి బ్రిటన్ రాజధాని న‌గ‌రానికి తొలి ముస్లిం మేయర్ అయ్యారు. ఈసారి ప్రధాన ప్రత్యర్థి ప్రధాన మంత్రి బోరిస్ జాన్సన్ కన్జర్వేటివ్ పార్టీకి చెందిన షాన్ బెయిలీని ఓడించి మ‌రీ రెండో సారి లండ‌న్ మేయ‌ర్ పీఠాన్ని అధిష్ఠించనున్నారు.

లేబర్ పార్టీ త‌ర‌ఫున బ‌రిలో నిలిచిన సాదిక్‌ ఖాన్ 55.2 శాతం ఓట్లు సాధించగా, కన్జర్వేటివ్ పార్టీ అభ్యర్థి బెయిలీకి 44.8 శాతం ఓట్లు వచ్చాయి. అయితే, ఈసారి ఖాన్ ఐదేండ్ల‌ క్రితం కంటే తక్కువ తేడాతో గెలిచాడు. ఉపాధి కల్పించడంతోపాఉ లండన్ పర్యాటక ఆర్థిక వ్యవస్థను వేగవంతం చేయడంపై దృష్టి సారించ‌నున్న‌ట్లు ఖాన్‌ నొక్కిచెప్పారు. “భూమిపై అతిపెద్ద నగరాన్ని నడిపించేందుకు లండన్ వాసులు వ్యక్తం చేసిన నమ్మకానికి నేను పూర్తి కృతజ్ఞతతో నమస్కరిస్తున్నాను” అని ఆయన అన్నారు. క‌రోనా వైర‌స్ చీకటి రోజుల తర్వాత లండన్ కోసం మంచి, ప్రకాశవంతమైన భవిష్యత్‌ను సృష్టిస్తానని హామీ ఇస్తున్నాన‌న్నారు.

పార్లమెంటు సభ్యుడిగా ఉన్న సాదిక్‌ ఖాన్, బోరిస్ జాన్సన్ స్థానంలో బ్రిటిష్ రాజధాని నాయకుడిగా నియమితులయ్యారు. దాదాపు తొమ్మిది లక్షల జనాభా ఉన్న ఈ నగరం.. హింసకు ప్ర‌ధాన‌ కేంద్రంగా ఉండటం క‌ల‌వ‌రానికి గురిచేస్తుంది.