రెమ్‌డెసివిర్ అమ్ముతూ రెడ్‌హ్యాండెడ్‌గా దొరికిన వైద్యుడు.. వీడియో వైర‌ల్‌

అమేథిలోని ఓ ద‌వాఖాన వైద్యుడు రెమ్‌డెసివిర్ ఇంజెక్ష‌న్‌ను అమ్ముతూ రెడ్ హ్యాండెడ్‌గా ప‌ట్టుబ‌డ్డాడు. దాంతో ఆయ‌న‌ను ఇంఛార్జీ సూప‌రింటెండెంట్ ప‌ద‌వి నుంచి అధికారులు తొల‌గించారు

May 9, 2021 / 05:07 PM IST

రెమ్‌డెసివిర్ అమ్ముతూ రెడ్‌హ్యాండెడ్‌గా దొరికిన వైద్యుడు.. వీడియో వైర‌ల్‌

ల‌క్నో : క‌రోనా వైర‌స్ వ్యాప్తి నేప‌థ్యంలో రెమ్‌డెసివిర్ ఇంజెక్ష‌న్‌కు విప‌రీత‌మైన డిమాండ్ పెరిగింది. అవ‌స‌రం ఉంటేనే ఈ ఇంజెక్ష‌న్ తీసుకోవాల‌ని సీనియ‌ర్ వైద్యులు ఎంత‌గా సూచిస్తున్నా ప్ర‌జ‌ల తీరు మాత్రం మార‌డంలేదు. దీంతో ప్ర‌జ‌ల అవ‌స‌రాల‌ను ఆస‌ర‌గా చేసుకుని కొంద‌రు ఈ ఇంజెక్ష‌న్ బ్లాక్ దందా కొన‌సాగిస్తున్నారు. ఇదే కోవ‌లో అమేథిలోని ఓ ద‌వాఖాన వైద్యుడు రెమ్‌డెసివిర్ ఇంజెక్ష‌న్‌ను అమ్ముతూ రెడ్ హ్యాండెడ్‌గా ప‌ట్టుబ‌డ్డాడు. దాంతో ఆయ‌న‌ను ఇంఛార్జీ సూప‌రింటెండెంట్ ప‌ద‌వి నుంచి అధికారులు తొల‌గించారు.

అమెథీ కేంద్రంలోని కొవిడ్ ద‌వాఖాన ఎల్- 2 సూప‌రింటెండెంట్ డాక్ట‌ర్ ఏకే అజీజీకి క‌రోనా పాజిటివ్‌గా తేల‌డంతో ఆయ‌న హోం ఐసోలేష‌న్‌లో ఉంటున్నారు. ఇంఛార్జీ సూప‌రింటెండెంట్‌గా మ‌రో వైద్యుడు డాక్ట‌ర్ ఆర్‌పీ గిరికి బాధ్య‌త‌లు అప్ప‌గించారు. ఈ అవ‌కాశాన్ని ఉప‌యోగించుకున్న ఇంఛార్జీ సూప‌రింటెండెంట్ గిరి.. సంద‌ట్లో స‌డేమియా అన్న చందంగా త‌న చేతిలో ఉన్న రెమ్‌డెసివిర్ ఇంజెక్ష‌న్ల‌ను అమ్మ‌కానికి పెట్టాడు. ఓ పేషెంట్ అటెండెంట్ ఈ విష‌యాన్ని వీడియో తీసి సోష‌ల్ మీడియాలో పోస్ట్ చేయ‌డంతో వైర‌ల్‌గా మారింది. దాంతో బ్లాకులో మందులు అమ్ముకుంటున్న ఇంఛార్జీ సూప‌రింటెండెంట్ ప‌ద‌వి నుంచి డాక్ట‌ర్ గిరిని త‌ప్పించి కేసు న‌మోదు చేసి విచారిస్తున్నారు. మందులే కాకుండా ఆక్సిజ‌న్ సిలిండ‌ర్ల‌ను కూడా పెద్ద మొత్తంలో అంబులెన్స్ డ్రైవ‌ర్ల‌కు అమ్ముకున్నార‌న్న ఆరోప‌ణ‌లు కూడా ఈయ‌న‌పై ఉన్నాయి. ఈ విష‌యాల‌న్నింటిపై విచార‌ణ జ‌రుపుతున్న‌ట్లు సీఎంఓ డాక్ట‌ర్ అశుతోష్ కుమార్ దూబే తెలిపారు.

https://twitter.com/raafiyanaz/status/1391335584128331781