పెద్దపల్లి, ఏప్రిల్ 27 (నమస్తే తెలంగాణ): ఎన్నికలు జరుగలేదు.. ఫలితాలు వెలువడలేదు. కానీ.. కాంగ్రెస్ పెద్దపల్లి ఎంపీ అభ్యర్థి గడ్డం వంశీకృష్ణ పేరు మాత్రం.. సోషల్ మీడియాలో ఎంపీగా చెలామణి అవుతుండటం చర్చనీయాంశమవుతున్నది. పెద్దపల్లి కాంగ్రెస్ ఎంపీ అభ్యర్థి పేరిట ఫేస్బుక్లో ఫిబ్రవరి 3న ‘గడ్డం వంశీకృష్ణ ఎంపీ’ అని ఖాతా ఓపెన్ అయి ఉంది. అంతేకాదు.. ఫేస్బుక్ డీపీగా గడ్డం వంశీకృష్ణ ఫొటో, కవర్ ఫొటోలో ముఖ్యమంత్రి రేవంత్రెడ్డి, తన తండ్రి, చెన్నూరు ఎమ్మెల్యే వివేక్ వెంకటస్వామి ఫొటోలు కనిపిస్తున్నాయి.
ఈ ఎఫ్బీ ఖాతా తెరిచిన సమయానికి గడ్డం వంశీకృష్ణ ఎంపీ అభ్యర్థిత్వం కూడా ఖరారు కాలేదు. వర్క్స్ ఎట్ విశాఖ ఇండస్ట్రీస్, లైవ్స్ ఇన్ హైదరాబాద్ పేరుతో ఫేస్బుక్లో పోస్టింగ్లు చేస్తుండటంపై సొంత పార్టీ నుంచే అభ్యంతరం వ్యక్తమవుతున్నది. దీనిపై నెటిజన్లు విమర్శల వర్షం కురిపిస్తున్నారు. పలువురు ఆయనకున్న పదవీ వ్యామోహానికి ఇదొక నిదర్శనమంటూ పేర్కొంటున్నారు. ఎన్నికల్లో గెలువకముందే ఆయన వ్యవహారశైలి ఇలా ఉంటే.. గెలిచిన తర్వాత ఎలా ఉంటుందోనని పలువురు చర్చించుకుంటున్నారు. అయితే.. ఇది ఆయన అధికారిక ఖాతానా? లేక మరెవరైనా కావాలని గడ్డం వంశీకృష్ణ పేరుమీద ఎఫ్బీ ఖాతా ఓపెన్ చేశారా? అన్న విషయం తెలియరాలేదు.