బ‌హు భార్య‌త్వానికి మ‌ద్ద‌తు.. లా ప్రొఫెస‌ర్‌కు ఇక్క‌ట్లు

బ‌హు భార్య‌త్వానికి మ‌ద్ద‌తుగా మాట్లాడిన ఓ న్యాయ క‌ళాశాల ప్రొఫెస‌ర్ ఇబ్బందుల్లో ప‌డ్డాడు. ఈ వ్యాఖ్య‌లు చేయ‌డంతో ఆయ‌న‌ను స‌ద‌రు యూనివ‌ర్శిటీ అధికారులు స‌స్పెండ్ చేశారు.

June 14, 2021 / 04:24 PM IST

బ‌హు భార్య‌త్వానికి మ‌ద్ద‌తు.. లా ప్రొఫెస‌ర్‌కు ఇక్క‌ట్లు

బీజింగ్ : బ‌హు భార్య‌త్వానికి మ‌ద్ద‌తుగా మాట్లాడిన ఓ న్యాయ క‌ళాశాల ప్రొఫెస‌ర్ ఇబ్బందుల్లో ప‌డ్డాడు. ఈ వ్యాఖ్య‌లు చేయ‌డంతో ఆయ‌న‌ను స‌ద‌రు యూనివ‌ర్శిటీ అధికారులు స‌స్పెండ్ చేశారు. కొంతమంది మేధావులకు బహుభార్యాత్వాన్ని పొందేందుకు అనుమతించాలని ఆయ‌న ఇటీవ‌ల వీ చాట్‌లో సూచించడంతో ఈ స‌మ‌స్య వ‌చ్చి ప‌డింది. ఈస్ట్ చైనా యూనివర్శిటీ ఆఫ్ పొలిటికల్ సైన్స్‌లో అంతర్జాతీయ చట్టాల‌ను బోధించే అసోసియేట్ ప్రొఫెసర్ బావో యినాన్ తన వీచాట్ వేదిక‌గా చైనా కళాశాలలు, విశ్వవిద్యాలయాల్లో ప‌నిచేస్తున్న‌ ఉపాధ్యాయులకు వివాహానికి సంబంధించి ప్రత్యేక హక్కులు ఉండాలని రాశారు.

ఈ నివేదికను హాంకాంగ్‌లోని సౌత్ చైనా మార్నింగ్ పోస్ట్‌లో సోమవారం ప్రచురించారు. ఆన్‌లైన్‌లో తప్పుడు ఆలోచనలు ఇచ్చినందున బావో యినాన్‌ను విధుల నుంచి తొలగించాలని ఇక్కడి టీచర్స్ వర్క్ యూనిట్ ఒక ప్రకటనలో డిమాండ్ చేసింది. ఈ యూనిట్ కమ్యూనిస్ట్ పార్టీ వర్క్ కమిటీ క్రింద పనిచేస్తుంది. బావో క‌న్నా ముందు బహు భార్యాత్వాన్ని ఏడాది క్రితం ఫుడాన్ విశ్వవిద్యాలయంలో ఆర్థిక శాస్త్ర ప్రొఫెసర్ యూ-క్వాంగ్ ఎన్‌జీ కూడా సమర్థించారు. దేశంలో లింగ అసమానత సమస్యను పరిష్కరించడానికి చైనా మహిళలను బహుళ వివాహాలు చేసుకునేందుకు అనుమతించాలని ఎన్‌జీ ప్రతిపాదించారు.