Ayodhya Ram Mandir | అయోధ్యలోని భవ్య రామ మందిరం ప్రత్యేకతలు..

Ayodhya Ram Mandir | యావత్తు భారతావని ఎంతో ఆసక్తిగా ఎదురుచూస్తున్న ఉత్తరప్రదేశ్‌ (UP) లోని అయోధ్య రామాలయం (Ayodhya Ram Mandir) ప్రారంభోత్సవానికి సమయం దగ్గరపడుతోంది. ఈ నేపథ్యంలో అయోధ్యలోని భవ్య రామ మందిర ప్రత్యేకతలు గురించి ఇప్పుడు తెలుసుకుందాం..

Ayodhya Ram Mandir | యావత్తు భారతావని ఎంతో ఆసక్తిగా ఎదురుచూస్తున్న ఉత్తరప్రదేశ్‌ (UP) లోని అయోధ్య రామాలయం (Ayodhya Ram Mandir) ప్రారంభోత్సవానికి సమయం దగ్గరపడుతోంది. జనవరి 22న విగ్రహ ప్రతిష్ఠాపన కార్యక్రమం వైభవంగా జరుగనున్నది. ఈ వేడుకలకు ఓ వైపు చకాచకా ఏర్పాట్లు సాగుతున్నాయి. పది రోజుల పాటు జరిగే ప్రతిష్ఠ ఉత్సవాలు జనవరి 16న ప్రారంభమవుతాయి. ఆలయ గర్భగుడిలో రాముని విగ్రహ ప్రతిష్ఠను 22వ తేదీ మధ్యాహ్నం 12.45-1.00 గంటల మధ్య నిర్వహించనున్నట్టు శ్రీరామ జన్మభూమి తీర్థ క్షేత్ర ట్రస్ట్‌ ప్రధాన కార్యదర్శి చంపత్‌ రాయ్‌ ఇప్పటికే ప్రకటించిన విషయం తెలిసిందే. దీంతో ఈ ఆలయ నిర్మాణం, విశేషాలపై ప్రతి ఒక్కరూ ఎంతో ఆసక్తి కనబరుస్తున్నారు. ఈ నేపథ్యంలో అయోధ్యలోని భవ్య రామ మందిర ప్రత్యేకతలు గురించి ఇప్పుడు తెలుసుకుందాం..

ఆలయ ప్రత్యేకతలు..

• భారతీయ సంస్కృతి, వారసత్వాలకు నిలువెత్తు రూపం అయోధ్య రామ మందిరం.
• ఈ రామ మందిరం సాంప్రదాయ నాగర్‌ శైలిలో నిర్మించారు (traditional Nagara style).
• 380 అడుగుల పొడవు, 250 అడుగుల వెడల్పు, 161 అడుగుల ఎత్తుతో ఈ మందిరాన్ని నిర్మించారు.
• మందిరం మొత్తం మూడు అంతస్తుల్లో నిర్మించారు. ఒక్కో అంతస్తు 20 అడుగుల ఎత్తుతో ఉంటుంది.
• ఈ ఆలయంలో మొత్తం 392 స్తంభాలు, 44 గేట్లు ఉన్నాయి.
• ప్రధాన గర్భగుడిలో శ్రీరాముడి ఐదేళ్ల బాలరాముడిగా (శ్రీరామ్‌ లల్లా విగ్రహం) కొలువు దీరనున్నాడు. మొదటి అంతస్తులో శ్రీరామ్‌ దర్బార్‌ ఉంటుంది.
• ఈ ఆలయంలో మొత్తం ఐదు మండపాలు ఉంటాయి. నృత్య మండపం, రంగ మండపం, సభా మండపం, ప్రార్థన మండపం, కీర్తన మండపాలు ఉంటాయి.
• రామాలయంలోని మొత్తం గోడలు, స్తంభాల మీద అనేక రకాల దేవతమూర్తులను చెక్కారు. రామాయణ ఘట్టాలను చిత్రించారు.
• రామాలయంలోకి తూర్పు దిశ నుంచి ప్రవేశం ఉంటుంది.
• ఇక్కడి సింగ్ ద్వార్ గుండా 32 మెట్లు ఎక్కి లోపలికి వెళ్లాల్సి ఉంటుంది.
• దేవాలయానికి వచ్చే వికలాంగులు, వృద్ధుల సౌకర్యార్థం ఆలయంలో ర్యాంప్‌లు, లిఫ్టులు ఏర్పాటు చేశారు.
• ఆలయం చుట్టూ 732 మీటర్ల పొడవు, 14 అడుగుల వెడల్పుతో దీర్ఘచతురస్కాకారంలో గోడ నిర్మించారు.
• నాలుగు మూలల్లో నాలుగు దేవాలయాలు నిర్మించారు. వీటిల్లో సూర్యభగవానుడు, దేవి భగవతి, గణపతి, శివుడి ఆలయాలున్నాయి. ఉత్తర భుజంలో మా అన్నపూర్ణ దేవాలయం, దక్షిణం వైపు హనుమంతుని మందిరాలు ఉన్నాయి.
• మందిర్ సమీపంలో పురాతన కాలం నాటి చారిత్రక బావి (సీతాకూపం) ఉంది.
• శ్రీ రామ జన్మభూమి మందిర్ కాంప్లెక్స్‌లో మహర్షి వాల్మీకి, మహర్షి వశిష్ఠ, మహర్షి విశ్వామిత్ర, మహర్షి అగస్త్య, నిషాద్ రాజ్, శబరీమాత, అహల్య దేవిల మందిరాలున్నాయి.
• కాంప్లెక్స్ నైరుతి భాగంలో కుబేర్ తిలపై ఉన్న పురాతన శివాలయాన్ని పునరుద్దరించారు. జటాయువును ప్రతిమతో పునర్నిర్మించారు.
• ఇనుము వాడకుండా ప్రత్యేక శిలలతో అందంగా నిర్మించారు.
• మందిర నిర్మాణంలో నేల, గోడలు, మెట్లు, పైకప్పు.. ఇలా అంతటా రాతినే వినియోగించారు. ఎక్కడా ఇనుము, స్టీల్‌, సిమెంట్‌, కాంక్రీటును వాడలేదు. యూపీ, గుజరాత్‌, రాజస్థాన్‌ నుంచి ప్రత్యేక శిలలను తెప్పించారు.
• మందిర్ పునాది 14-మీటర్ల మందపాటి రోలర్-కాంపాక్ట్ కాంక్రీట్ (RCC)తో నిర్మించారు. ఈ కాంక్రీట్ కృత్రిమ శిలా రూపాన్ని ఇస్తుంది.
• భూమిలోని తేమతో ఆలయానికి భవిష్యత్తులో నష్టం వాటిల్లకుండా ఉండేందుకు 21 అడుగుల ఎత్తులో గ్రానైట్‌తో పునాది నిర్మించారు.
• ఆలయానికి సమీపంలోని కరసేవక్‌పురంలో 30 ఏండ్ల కిందటే రాతిని చెక్కే పనులను ప్రారంభించారు. గత 30 ఏండ్లుగా దేశం నలుమూలల నుంచి సేకరించిన రెండు లక్షల ఇటుకలను ఆలయ పీఠం కోసం వాడారు.
• బాహ్య వనరులపై ఆధారపడకుండా ఉండేందుకు.. ఆలయం కాంప్లెక్స్‌లో మురుగునీటి శుద్ధ కర్మాగారం, నీటి శుద్ధి కర్మాగారం, అగ్నిమాపకాల నుంచి భద్రత కోసం నీటి సరఫరా, స్వతంత్ర విద్యుత్ కేంద్రాలను నిర్మించారు.
• 25,000 మంది పట్టే సామర్థ్యంతో యాత్రికుల సౌకర్య కేంద్రం నిర్మించబడుతోంది. ఇది యాత్రికులకు వైద్య సదుపాయాలు, లాకర్ సౌకర్యాన్ని అందిస్తుంది.
• కాంప్లెక్స్‌లో స్నానపు గదులు, వాష్‌రూమ్‌లు, వాష్‌ బేసిన్లు, ఓపెన్ ట్యాప్‌లు మొదలైన వాటితో ప్రత్యేక బ్లాక్ కూడా ఉంటుంది.
• మందిర్ పూర్తిగా భారత సాంప్రదాయ, స్వదేశీ సాంకేతికతను ఉపయోగించి నిర్మించబడుతోంది. 70 ఎకరాల విస్తీర్ణంలో 70% పచ్చగా ఉండేలా పర్యావరణ-నీటి సంరక్షణకు ప్రత్యేక ప్రాధాన్యతనిస్తూ దీనిని నిర్మిస్తున్నారు.
• శ్రీ రామ జన్మభూమి తీర్థ క్షేత్ర ట్రస్ట్ పర్యవేక్షణలో ఈ ఆలయ నిర్మాణం జరుగుతోంది.
• ప్రపంచంలోనే మూడో అతిపెద్ద హిందూ ఆలయంగా నిలవనుంది. ప్రస్తుతం అంకోర్‌వాట్‌లోని దేవాలయ సముదాయం ప్రపంచంలోనే అతిపెద్ద ఆలయంగా రికార్డుల్లో ఉన్నది. తర్వాతి స్థానాన్ని తమిళనాడులోని తిరుచిరాపల్లిలో ఉన్న రంగనాథ స్వామి ఆలయం ఆక్రమించింది.
• ప్రధాన ఆలయాన్ని ఎల్‌ అండ్‌ టీ కంపెనీ నిర్మించగా, ఉపాలయాలు, ఇతరత్రా నిర్మాణాలను టాటా కన్సల్టెన్సీ ఇంజినీర్స్‌ లిమిటెడ్‌ నిర్మిస్తోంది.
• రిక్టర్‌ స్కేల్‌పై 10 తీవ్రతతో భూకంపాలు వచ్చినా, మరే విధమైన విపత్తులు వచ్చినా కనీసం 2,500 ఏండ్లపాటు ఆలయం వాటిని తట్టుకొనేలా డిజైన్‌ చేశారు.
• ఆయోధ్య ఆలయ ప్రాంగణంలో 27 నక్షత్రాలకు సూచికగా 27 మొక్కలను గతంలో నాటారు. భక్తులు తమ జన్మ నక్షత్రాన్ని, రాశిని అనుసరించి ఆయా చెట్ల కింద కూర్చొని ధ్యానం చేసుకోవడం కోసమే ఈ వాటికను ఏర్పాటు చేశారు.
• వసుధైక కుటుంబం అన్న భారతీయ భావనను ప్రతిబింబించేలా.. ప్రపంచవ్యాప్తంగా ఏడు ఖండాల్లోని 115 దేశాల్లో నదులు, సముద్రాల నుంచి తీసుకొచ్చిన నీటిని, 2,587 ప్రాంతాల నుంచి తీసుకొచ్చిన మట్టిని రామాలయ నిర్మాణంలో వినియోగించారు.
• ఒడిశాలోని కోణార్క్‌ సూర్య దేవాలయం గర్భగుడిలోని మూల విరాట్‌పై సూర్య కిరణాలు పడినట్లుగానే, రామమందిరంలోని బాల రాముడి విగ్రహంమీద శ్రీరామనవమి రోజు సూర్యకిరణాలు ప్రసరించేలా అయోధ్య ఆలయ నిర్మాణాన్ని చేపట్టారు.
• ఇక ఆలయ నిర్మాణానికి రూ.1,400 కోట్ల నుంచి రూ.1,800 కోట్ల వరకూ ఖర్చు అవుతుందని అంచనా.
• ఈ ఆలయానికి 05-08-2020లో శంకుస్థాపన చేశారు.
• మందిరం నిర్మాణం 2026కి సంపూర్ణమవుతుందని అంచనా.

Also Read..

Jitendra Awhad | శ్రీరాముడు మాంసాహారి.. ఎన్సీపీ నేత వివాదాస్పద వ్యాఖ్యలు

Arvind Kejriwal | విచారణ పేరుతో అరెస్ట్‌ చేసేందుకు కుట్ర.. ఈడీ సమన్లపై కేజ్రీవాల్‌

Bomb Threats | రామ మందిరంతో సహా పేల్చేస్తామంటూ యూపీ సీఎంకు బెదిరింపులు.. ఇద్దరు అరెస్ట్‌