Khagen Murmu | ఎన్నికల్లో పాల్గొనే ఏ పార్టీ నేతలైనా తమ గెలుపుకోసం శాయశక్తులా కృషి చేస్తుంటారు. ప్రచారంలో భాగంగా ఓటర్లను ప్రసన్నం చేసుకునేందుకు ఎలాంటి పనులైనా చేస్తారు. స్థానిక హోటళ్లలో దోశలు వేయడం, పొలంలో నాట్లు వేయడం, పిల్లలకు స్నానాలు చేయించడం వంటివి చేస్తూ వార్తల్లోకెక్కుతుంటారు. అయితే, ఓ అభ్యర్థి (BJP candidate) తన ఎన్నికల ప్రచారంలో ఓ మహిళకు ముద్దు పెట్టడం (kisses woman) ఇప్పుడు వివాదానికి దారితీసింది.
పశ్చిమబెంగాల్ ఉత్తర మాల్దా (Maldaha Uttar) నియోజకవర్గం బీజేపీ సిట్టింగ్ ఎంపీ అభ్యర్థి ఖగేన్ ముర్ము (Khagen Murmu) తన పార్లమెంటరీ నియోజకవర్గంలో ఎన్నికల ప్రచారం నిర్వహించారు. ఈ సందర్భంగా ఇంటింటికీ తిరుగుతూ తనను గెలిపించాలంటూ ఓటర్లకు విజ్ఞప్తి చేస్తున్నారు. ఈ క్రమంలో ఓ హహిళ చెంపపై ముద్దు పెట్టాడు. ఇందుకు సంబంధించిన దృశ్యాలు ప్రస్తుతం నెట్టింట వైరల్ అవుతున్నాయి. ఇది చూసిన అధికార తృణమూల్ కాంగ్రెస్ పార్టీ.. బీజేపీపై తీవ్ర స్థాయిలో విమర్శలు గుప్పిస్తోంది. ఈ మేరకు ఎక్స్ ఖాతాలో ఓ పోస్టు పెట్టింది.
‘మీరు ఇప్పుడు చూస్తోంది నమ్మలేకపోతే.. దాని గురించి మేం స్పష్టంగా చెప్పదలుచుకున్నాం. బీజేపీ ఎంపీ, ఉత్తర మాల్దా అభ్యర్థి ఖగేన్ ముర్ము తన ప్రచారంలో ఓ మహిళకు ఇష్టానుసారంగా ముద్దులు పెట్టాడు. మహిళా రెజ్లర్లను లైంగికంగా వేధించే ఎంపీల నుంచి బెంగాలీ మహిళలపై అభ్యంతరకర పాటలు రాసే నాయకుల వరకు.. బీజేపీ శిబిరంలో మహిళా వ్యతిరేక రాజకీయ నాయకులకు కొదవే లేదు. మహిళల విషయంలో మోదీ పరివార్ ఎలా ఉందో చూడండి. ఇక వారు అధికారంలోకి వస్తే ఏం చేస్తారో ఊహించవచ్చు’ అంటూ తృణమూల్ కాంగ్రెస్ తన ట్వీట్లో పేర్కొంది.
If you cannot believe what you just saw, let us clarify. Yes, this is BJP MP & Maldaha Uttar candidate @khagen_murmu kissing a woman on his own accord on his campaign trail.
From MPs that sexually harass women wrestlers to leaders who make obscene songs about Bengali women, BJP… pic.twitter.com/f0PKdaDDn5
— All India Trinamool Congress (@AITCofficial) April 9, 2024
ఇది బెంగాలీ సంస్కృతికి తీవ్ర విరుద్ధం
పలువురు అధికార పార్టీ నేతలు కూడా ఖగేన్ ముర్ము చర్యను తీవ్రంగా తప్పుబడుతున్నారు. ఇక తృణమూల్ కాంగ్రెస్ మాల్దా జిల్లా వైస్ ప్రెసిడెంట్ దులాల్ సర్కార్ ఈ ఘటనను ఖండించారు. ఇది బెంగాలీ సంస్కృతికి తీవ్ర విరుద్ధమన్నారు. ఓట్లు అడిగే సమయంలోనే నేతలు ఇలా ప్రవర్తిస్తే.. ఇక ఎన్నికల్లో గెలిచిన తర్వాత ఎలా ఉంటారో అర్థం చేసుకోవాలంటూ వ్యాఖ్యానించారు. ఈ అంశంపై ప్రజలే తగిన నిర్ణయం తీసుకుంటారన్నారు.
ఆడబిడ్డని ముద్దు పెట్టుకోవడంలో తప్పేంటి..?
అయితే, తనపై వస్తున్న విమర్శలపై ఖగేన్ ముర్ము తనదైన రీతిలో బదులిచ్చారు. ఓ ఆడ బిడ్డని ముద్దు పెట్టుకోవడంలో తప్పేముందంటూ విమర్శకులను ప్రశ్నించారు. తనపై కుట్రపూరిత ఆరోపణలు చేస్తున్నారని మండిపడ్డారు. ఈ ఘటనపై తృణమూల్ కాంగ్రెస్ చేసిన వ్యాఖ్యలపై తాను ఫిర్యాదు చేస్తానని హెచ్చరించారు. ఇలాంటి చిత్రాలను వక్రీకరించడం ద్వారా పార్టీలు, వ్యక్తుల పరువు తీస్తున్నారని మండిపడ్డారు.
వారిది డర్టీ మైండ్..
అంతేకాదు.. సదరు మహిళ కూడా బీజేపీ అభ్యర్థి చర్యను సమర్థించింది. వైరల్ పిక్లో అశ్లీలతను ఎత్తిచూపిన వారిపై ఆమె తీవ్ర స్థాయిలో విరుచుకుపడింది. ఓ వ్యక్తి తన కుమార్తెలాంటి స్త్రీని ముద్దుపెట్టుకుంటే తప్పేంటి..? అని ప్రశ్నించింది. ‘ఓ వ్యక్తి తన సొంత కూతురులాంటి స్త్రీని ముద్దుపెట్టుకుంటే తప్పేంటి..? దాంతో మీకొచ్చిన సమస్య ఏంటి..? ఇలాంటి సంఘటనలను సోషల్ మీడియాలో నెగటివ్గా ప్రచారం చేయడంలోనే వారి మనస్తత్వం ఏంటో తెలిసిపోతోంది. వారిది చెడు మనస్తత్వం. ఖగేన్ ముర్ము నన్ను కూతురిలా భావించి ముద్దు పెట్టుకునే సమయంలో మా అమ్మ, నాన్న కూడా అక్కడే ఉన్నారు’ అంటూ ఆమె తెలిపింది. ప్రస్తుతం ఈ ముద్దు ఘటన స్థానిక రాజకీయాల్లో తీవ్ర వివాదానికి దారి తీసింది.
Also Read..
TDP | టీడీపీలో చేరిన వైసీపీ ఎమ్మెల్సీ మహ్మద్ ఇక్బాల్
Cat | బావిలో పడ్డ పిల్లిని రక్షించేందుకు వెళ్లి ఐదుగురు వ్యక్తులు మృతి
Devara Movie | కరణ్ జోహార్ చేతికి ‘దేవర’ నార్త్ ఇండియా థియేట్రికల్ రైట్స్