Amit Shah | మైనర్లపై లైంగికదాడికి ఉరి.. ఐపీసీ, సీఆర్పీసీ, ఎవిడెన్స్‌ చట్టాల స్థానంలో కొత్త చట్టాలు: కేంద్ర మంత్రి అమిత్‌ షా

బ్రిటిష్‌ కాలం నాటి ఐపీసీ, సీఆర్పీసీ, ఎవిడెన్స్‌ చట్టాల స్థానంలో కొత్త చట్టాలను తీసుకొస్తున్నట్టు కేంద్ర హోం మంత్రి అమిత్‌షా వెల్లడించారు. ఇందుకు సంబంధించిన బిల్లులను ఆయన శుక్రవారం లోక్‌సభలో ప్రవేశపెట్టారు. ఇండియన్‌ పీనల్‌ కోడ్‌(ఐపీసీ)-1860 స్థానంలో భారతీయ న్యాయ సంహిత(బీఎన్‌ఎస్‌)-2023, క్రిమినల్‌ ప్రొసీజర్‌ యాక్ట్‌(సీఆర్‌పీసీ)-1898 స్థానంలో భారతీయ నాగరిక్‌ సురక్ష సంహిత(బీఎన్‌ఎస్‌ఎస్‌)-2023, ఇండియన్‌ ఎవిడెన్స్‌ యాక్ట్‌-1872 స్థానంలో భారతీయ సాక్ష్య(బీఎస్‌)-2023 బిల్లులను తీసుకొచ్చారు.

• మూక హత్యలకు మరణదండన గ్యాంగ్‌రేప్‌కు పాల్పడితే జీవితఖైదు
• ఉగ్రవాదానికి కొత్త నిర్వచనం
• ఉగ్రచర్యలకు పాల్పడితే మరణశిక్ష
• నేర సంబంధిత చట్టాల్లో మార్పులు
• ఐపీసీ, సీఆర్‌పీసీ, ఎవిడెన్స్‌ చట్టాల స్థానంలో మూడు కొత్త చట్టాలు
• లోక్‌సభలో కేంద్రం బిల్లులు

Amit Shah |  న్యూఢిల్లీ, ఆగస్టు 11: బ్రిటిష్‌ కాలం నాటి ఐపీసీ, సీఆర్పీసీ, ఎవిడెన్స్‌ చట్టాల స్థానంలో కొత్త చట్టాలను తీసుకొస్తున్నట్టు కేంద్ర హోం మంత్రి అమిత్‌షా వెల్లడించారు. ఇందుకు సంబంధించిన బిల్లులను ఆయన శుక్రవారం లోక్‌సభలో ప్రవేశపెట్టారు. ఇండియన్‌ పీనల్‌ కోడ్‌(ఐపీసీ)-1860 స్థానంలో భారతీయ న్యాయ సంహిత(బీఎన్‌ఎస్‌)-2023, క్రిమినల్‌ ప్రొసీజర్‌ యాక్ట్‌(సీఆర్‌పీసీ)-1898 స్థానంలో భారతీయ నాగరిక్‌ సురక్ష సంహిత(బీఎన్‌ఎస్‌ఎస్‌)-2023, ఇండియన్‌ ఎవిడెన్స్‌ యాక్ట్‌-1872 స్థానంలో భారతీయ సాక్ష్య(బీఎస్‌)-2023 బిల్లులను తీసుకొచ్చారు. ప్రజలకు సత్వర న్యాయం అందించడంతో పాటు ప్రజల ప్రస్తుత అవసరాలు, ఆకాంక్షలకు అనుగుణంగా న్యాయవ్యవస్థను మార్చేందుకు తాజా మార్పులకు శ్రీకారం చుట్టామని అమిత్‌షా అన్నారు. ఈ బిల్లులు ఆమోదం పొంది చట్టాలుగా మారితే, నేర న్యాయవ్యవస్థ పూర్తిగా మారిపోతుందని, ప్రతి ఒక్కరూ గరిష్ఠంగా మూడేండ్లలో న్యాయం పొందేందుకు అవకాశం ఉంటుందని పేర్కొన్నారు. కొత్త బిల్లుల ఉద్దేశం శిక్షించడం కాదని, బాధితులకు న్యాయం అందించడమని పేర్కొన్నారు. అయితే ఇదే సమయంలో నేరాలను ఆపేందుకు శిక్షలు కూడా ఉంటాయని అన్నారు.

స్టాండింగ్‌ కమిటీలకు బిల్లులు

బిల్లును తదుపరి పరిశీలన కోసం పార్లమెంటరీ స్టాండింగ్‌ కమిటీకి (హోం వ్యవహారాలు) పంపారు. ఏడు దశాబ్దాల భారత ప్రజాస్వామ్యంలోని అనుభవాలు.. సీఆర్‌పీసీతో పాటు క్రిమినల్‌ చట్టాలను సమగ్రంగా మార్చడానికి కారణమని ప్రభుత్వం పేర్కొన్నది.

లైంగిక దాడికి 10 ఏండ్లకుపైగా శిక్ష

హత్యలు, మహిళలపై లైంగిక దాడులకు సంబంధించి కొత్త నిబంధనలు చేర్చారు. హత్యానేరానికి మరణశిక్ష లేదా జీవిత ఖైదు పడుతుంది. లైంగిక దాడుల నిందితులకు కనీసంగా 10 ఏండ్లు లేదా జీవిత ఖైదు శిక్ష విధిస్తారు. అలాగే సామూహిక లైంగిక దాడుల కేసుల్లోని నిందితులకు కనీసంగా 20 ఏండ్లు శిక్ష ఉంటుంది లేదా జీవిత ఖైదు పడుతుంది. కొత్త బిల్లుల ప్రకారం.. లైంగిక దాడి తర్వాత బాధిత మహిళ మరణిస్తే లేదా అచేతన స్థితికి(కోమా లాంటి స్థితి) చేరితే, దోషికి 20 ఏండ్లు తగ్గకుండా కఠిన శిక్ష విధించొచ్చు. దాన్ని జీవిత ఖైదుకు పొడిగించడం లేదా మరణ శిక్ష కూడా వేయవచ్చు. 12 ఏండ్ల కంటే తక్కువ వయసున్న బాలికలపై లైంగిక దాడికి పాల్పడితే, ఆ నిందితుడికి 20 ఏండ్లు తక్కువ కాకుండా శిక్ష పడుతుంది. దీన్ని జీవిత ఖైదు లేదా మరణ శిక్ష వరకు పొడిగించవచ్చు.

పెండ్లి పేరుతో లైంగికదాడికి పాల్పడితే నేరమే..

మహిళలను మోసం చేసి, వారిని లైంగికంగా లోబరుచుకొనే ఘటనలకు సంబంధించి కూడా కీలక మార్పులు చేపట్టారు. కొత్త నిబంధనల ప్రకారం గుర్తింపును దాచి పెండ్లి చేసుకోవడం లేదా పెండ్లి, ఉద్యోగం, ప్రమోషన్‌ పేరుతో మహిళలపై లైంగిక దోపిడీకి పాల్పడడం నేరం కిందకు వస్తుంది. జరిమానాతో పాటు 10 ఏండ్ల వరకు శిక్ష ఉంటుంది.

క్షమాభిక్ష విషయంలో మార్పులు

శిక్ష పడిన నేరస్తులకు క్షమాభిక్ష విషయంలో కూడా పలు కొత్త నిబంధనలు తీసుకొచ్చారు. క్షమాభిక్ష లేదా శిక్ష రద్దును ప్రభుత్వాలు తమ రాజకీయ అవసరాల కోసం వినియోగించుకోకుండా.. మరణశిక్షను కేవలం జీవిత ఖైదుగా మార్చుకోగలరని నిబంధన చేర్చారు. కొత్త మార్పు ప్రకారం జీవిత ఖైదు పడిన ఏడేండ్ల వ్యవధిలోపే ఆ నేరస్తుడికి క్షమాభిక్ష పెట్టే అవకాశం ఉంటుంది. ఇటీవల విడుదలైన బీహార్‌కు చెందిన క్రిమినల్‌-పొలిటీషియన్‌ ఆనంద్‌ మోహన్‌ అంశాన్ని అమిత్‌షా ప్రస్తావించారు.

హిందీ పేర్లతో బిల్లులు.. భాషా సామ్రాజ్యవాదం: స్టాలిన్‌

ఐపీసీ, సీఆర్పీసీ, ఇండియన్‌ ఎవిడెన్స్‌ చట్టాల స్థానంలో కేంద్రం కొత్తగా ప్రవేశపెట్టిన బిల్లులకు హిందీ పేర్లు పెట్టడంపై తమిళనాడు సీఎం, డీఎంకే చీఫ్‌ స్టాలిన్‌ అభ్యంతరం వ్యక్తం చేశారు. ఇది హిందీని బలవంతంగా రుద్దే ప్రయత్నంలో ఓ భాగమని విమర్శించారు. దీన్ని ‘భాషాపరమైన సామ్రాజ్యవాదం’గా స్టాలిన్‌ అభివర్ణించారు. హిందీ పేర్లు పెట్టే చర్యలను ప్రతిఘటిస్తామని పేర్కొన్నారు. హిందీ బలవంతంపై తమిళనాడులో చారిత్రక వ్యతిరేకత ఉన్నదని, ఈ బిల్లుల తర్వాత ప్రధాని మోదీకి ‘తమిళ్‌’ పదాన్ని ఉచ్చరించే హక్కు లేదని ఆగ్రహం వ్యక్తం చేశారు. మూడు బిల్లులు భారత వైవిధ్యాన్ని దెబ్బతీసే ప్రయత్నమని శుక్రవారం ఎక్స్‌(ట్విట్టర్‌) పోస్టులో పేర్కొన్నారు.

రాజద్రోహానికి కొత్త రూపు

కేంద్రం తీసుకొచ్చిన బిల్లుల్లో ఏండ్లుగా చర్చనీయాంశంగా ఉన్న పలు ప్రధానఅంశాలున్నాయి. భారతీయ న్యాయ సంహిత బిల్లులో రాజద్రోహం(ఐపీసీ 124ఏ) రద్దు, మూకహత్యలు, మైనర్లపై లైంగిక దాడుల నేరాలకు మరణశిక్ష విధించేలా నిబంధనలు ఉన్నాయి. రాజద్రోహం చట్టాన్ని పూర్తిగా తొలగించనున్నారు. దీన్ని కొత్త రూపంలో తీసుకొస్తామని ప్రభుత్వం పేర్కొన్నది. దీని కింద దేశ వ్యతిరేక చర్యలకు పాల్పడితే జీవిత ఖైదు విధించనున్నారు. ‘రాజద్రోహం’గా ఉన్న చట్టం కొత్తగా ‘దేశద్రోహం’గా మారుతుందని అధికారులు పేర్కొన్నారు. వేర్పాటువాదం, సాయుధ తిరుగుబాటు, విధ్వంసక కార్యకలాపాలు, దేశ సార్వభౌమాధికారం, సమగ్రతకు ముప్పు కలిగించే చర్యలకు గరిష్ఠంగా జీవిత ఖైదు విధింపు ఉంటుంది. మూక హత్యలు, మైనర్లపై లైంగిక దాడులకు పాల్పడితే మరణశిక్ష విధిస్తారు.

మారనున్న చట్టాలు…

ఇప్పుడు ఉన్న చట్టాలు

ఇండియన్‌ పీనల్‌ కోడ్‌(ఐపీసీ)-1860
క్రిమినల్‌ ప్రొసీజర్‌ యాక్ట్‌(సీఆర్‌పీసీ)-1898
ఇండియన్‌ ఎవిడెన్స్‌ యాక్ట్‌-1872

కొత్తగా రానున్న చట్టాలు

భారతీయ న్యాయ సంహిత-2023
భారతీయ నాగరిక్‌ సురక్ష సంహిత-2023
భారతీయ సాక్ష్య(బీఎస్‌)-2023

నేరాలకు గరిష్ఠ శిక్షలు ఇలా..

• దేశ సార్వ భౌమాధికారం, సమగ్రతకు ముప్పుజీవిత ఖైదు
• సామూహిక లైంగిక దాడి కనిష్ఠంగా 20 ఏండ్ల నుంచి జీవిత ఖైదు
• మైనర్‌పై లైంగిక దాడికి పాల్పడితే మరణశిక్ష
• మూక హత్యలకు పాల్పడితేమరణశిక్ష

కొత్త బిల్లులలో కీలక అంశాలు

• మూడు బిల్లుల్లో మొత్తంగా 300కు పైగా మార్పులు చేపట్టారు.
• మొదటిసారిగా రూ.5 వేల కంటే తక్కువ విలువైన వస్తువుల చోరీ, పరువు నష్టం, మద్యం మత్తులో పబ్లిక్‌లో అసభ్య ప్రవర్తన వంటి చిన్న నేరాలకు పాల్పడితే ‘సమాజ సేవ’ను శిక్షగా విధిస్తారు.
• పోలీసు అధికారి లేదా లేదా ఎవరైనా ప్రభుత్వ ఉద్యోగి, భద్రతా దళాలకు చెందిన సభ్యుడు లైంగికదాడికి పాల్పడితే, 10 ఏండ్ల తక్కువ కాకుండా లేదా జీవిత ఖైదు విధించొచ్చు.
• ఒక వ్యక్తి ఆత్మహత్య చేసుకొనేందుకు కారణమైతే 10 ఏండ్ల వరకూ జైలు శిక్ష. జరిమానా కూడా పడే అవకాశం.
• ఎఫ్‌ఐర్‌ నమోదు నుంచి కేసు డైరీ, చార్జిషీట్‌, తీర్పు వరకు మొత్తం ప్రక్రియ అంతా డిజిటలైజేషన్‌.
• ఏండేండ్లు లేదా అంత కంటే ఎక్కువ శిక్ష పడే కేసుల్లో ఫోరెన్సిక్‌ బృందం నేరం జరిగిన ప్రాంతానికి వెళ్లి పరిశీలించాలి.
• 2027 నాటికి దేశంలోని అన్ని కోర్టులు కంప్యూటరీకరణ. త్వరలోనే ఈ-ఎఫ్‌ఐఆర్‌ల నమోదుకు శ్రీకారం.
• కేసులపై 90 రోజుల్లోగా చార్జిషీట్‌ వేయాలి.
• దర్యాప్తు 180 రోజుల్లో పూర్తి చేసి, కోర్టు విచారణకు వెళ్లాలి. విచారణ తర్వాత 30 రోజుల్లోగా తీర్పు.
• లైంగిక నేరాల్లో బాధితుల స్టేట్‌మెంట్‌, వీడియో రికార్డింగ్‌ తప్పనిసరి.
• బాధితుల వాదనలు వినకుండా, ఏండేండ్లు లేదా అంతకంటే ఎక్కువ శిక్ష పడే ఏ కేసును ప్రభుత్వం ఉపసంహరించుకోకూడదు.
• సివిల్‌ సర్వెంట్లపై ఫిర్యాదులను నమోదుకు అధికారులు 120 రోజుల్లోగా అనుమతి ఇవ్వడమో లేదా తిరస్కరించడమో చేయాలి.
• ఆస్తి నష్టానికి నేరానికి పాల్పడిన వ్యక్తే పరిహారం చెల్లించేలా నిబంధన.
• తొలిసారిగా ఉగ్రవాదానికి నిర్వచనం ఇచ్చారు. దేశ ఐక్యత, సమగ్రత, భద్రతకు ముప్పు కలిగించే ఉద్దేశంతో, సాధారణ ప్రజానీకాన్ని లేదా అందులోకి ఒక వర్గాన్ని భయపెట్టే ఉద్దేశం లేదా శాంతి భద్రతలకు భంగం కలిగించేలా దేశంలో లేదా ఇతర విదేశాల్లో చర్యలకు పాల్పడే వారిని ‘టెర్రరిస్టు’ అంటారు.
• ఉగ్ర చర్యల కారణంగా ఎవరైనా మరణిస్తే.. నిందితుడికి మరణశిక్ష లేదా జీవిత ఖైదు ఉంటుంది.

#WATCH | Union Home Minister Amit Shah says, "…Under this law, we are repealing laws like Sedition…," as he speaks on Bharatiya Nyaya Sanhita Bill, 2023; The Bharatiya Sakshya Bill, 2023 and The Bharatiya Nagrik Suraksha Sanhita Bill in Lok Sabha. pic.twitter.com/CHlz0VOf7Z

— ANI (@ANI) August 11, 2023